新手爸努力搵奶粉錢 陳柏宇：Abi啲皺紋仲多過我
撰文：東方新地 │ 圖片：新傳媒圖片、陳柏宇IG
陳柏宇 努力搵奶粉錢
符曉薇(Leanne)日前抱住囡囡出院，不過身邊得友人陪伴未見老公Jason現身，原來佢要去中山舉行演唱會，講到生b過程，剖腹生b嘅Leanne話好辛苦，有種撕裂嘅感覺，又不能好好休息，每兩、三小時就被拍醒照顧bb，不過佢話再辛苦都值得！
Leanne又透露，原來Jason要早一日出發上中山，但因為想多同囡囡相處，延至佢出院嘅早上才出發。佢笑言要又以「好恐怖」嚟形容老公，事關佢係名副其實嘅愛女狂！
陳柏宇愛女又愛妻，佢日前留言話：「努力工作，守護住屋企兩個女人」
Jason一返港，又不忙分享b女新相，昨日佢po相仲留言話：「Abi啲皺紋仲多過我」，網民話B女Abigail表情好搞笑，仲笑話Jason出賣囡囡……
你睇，Jason仲扮囡囡表情㖭！話時話，佢哋又好似幾似樣喎！
陳柏宇初為人父 感動落淚
陳柏宇（Jason）上周日喺個人社交網上載一張一家三口嘅溫馨相，激動留言：「我一見到佢就忍唔住喊！Abigail，i choose u！（throw out pokeball）」，正式宣布自己榮升做人父！
據知，今次Jason太太符曉薇（Leanne）剖腹誕下囡囡，B女重5.2磅。喜獲首位千金嘅Jason喺一日內就已經不斷更新自己個人ig，上載3張呀女嘅相！
其後，愛女心切嘅新手爸爸Jason，更隨即為寶貝女開設專屬ig。Ablgail啱啱出世就話咁快有自己嘅個人ig，一睇就知老竇有幾咁高興！
當然，喺Ablgail嘅ig度會見到老竇Jason不斷為愛女更新最新嘅相！
每張相都配有老竇唔同嘅精心留言，好似以下呢張，Jason就寫住：「roar（咆哮）！！」
其實除咗上載囡囡嘅相，Jason仲急不及待同B女開咗個live！而且，喺個live入面仲會聽到Jason嘅一堆bb話！
老婆隔空呷醋
雖然愛女還愛女，都唔可以唔理個老婆嘅 ！Jason老婆都頂唔順老公淨係掛住理個女，結果Leanne就上載張老公甜望囡囡嘅相，留言：「Welcome to the world Abigail 係今日開始陳生眼入面 已經被另一個女人霸佔左 佢已經唔記得咗佢老婆姓乜」老婆擺到明呷梗醋喎陳生！
同時，有網友搞笑留言話：「你睇下佢短短一日post 左幾多個 果個女人張相」Leanne都回覆嗰位網友，指：「你睇到個重點了」，醋意極濃！
話雖如此，Leanne都知老公係錫個女係件超甜嘅事，皆因Leanne都喺自己個ig晒出Jason抱住B女甜笑個樣，相信呢位新手媽咪同人妻自己見到呢個畫面都覺得好冧嘅！
今日Jason又繼續晒女，並留言：「day 2 of my escape.」似乎意指見到囡囡就係「Escape」，可以幫佢逃離工作上嘅忙碌日程，有心靈治療嘅感覺！呢位新手老竇堅冧到爆燈！
