陳展鵬 單文柔再晒新一輯婚照 隔空甜蜜對話！
撰文：東方新地｜圖片：Instagram、新傳媒圖片庫
41歲陳展鵬 宣布迎娶28歲單文柔
41歲視帝陳展鵬、與28歲落選港姐單文柔去年三月爆出戀情，其後一直都將戀情低調處理，不過昨晚煎Pang宣布拉埋天窗啦！
陳展鵬致各傳媒友好：「各位親愛的傳媒朋友、各位好友，多謝大家一直對我的支持和包容。今日，好高興同大家宣布，我要結婚啦！一路以來，我都全情投入工作，直至Phoebe的出現，讓我們感受到幸福和信任。對於感情方面比較傳統的我，是時候用我最大的努力去建立一個美滿的家。多謝大家的關心，希望得到你們的祝福。」
求兩次婚 抱得美人歸
Phoebe接受傳媒訪問，大爆展鵬求過兩次婚，第一次在香港趁佢瞓覺時，用一隻自己摺嘅心形紙戒指戴喺佢手，我醒咗先發現，雖然好冧但單文柔都say no，佢記得我鍾意手工藝，或者花心思嘅嘢，之後第二次喺英國，佢搵咗條街好多人又有巴士嘅大街再跪低求婚，佢最期待嘅畫面終於出現，咁感動當然點頭say yes啦！
展鵬着上簡單西裝配對波鞋，非常隨意！
10月簽字結婚
二人將於10月簽字結婚，又會同兩邊屋企人食晚飯慶祝，佢哋都希望有個低調、屬於自己嘅美好回憶嘅婚禮，好多細節仍在安排中，問到係咪雙喜臨門有bb？單文柔否認，仲話冇諗過自己咁早結婚，但最終被男友真誠打動。
噚日陳展鵬一公開與女友嘅婚訊後，兩位都收到唔少人嘅祝福！不過，今日二人就於噚晚同今朝不斷於個人社交網隔空放閃！首先，噚晚開始就由準新郎展鵬率先post出一張個人照，留言：「時間到了」
之後準新娘Phoebe亦同樣喺個人社交網post出一張個人照，留言話：「系咪呢度呢？」
展鵬就話：「唔等啦！」齋咁睇留言都感覺到佢有幾心急娶女友！
Phoebe就指：「天氣好好！好舒服❤️」
之後，展鵬就上載一張二人相遇嘅相，仲留言話：「係佢啦」
Phoebe就sweet爆晒出一張華麗轉身相，話：「佢見到我啦」
到咗今朝，二人又再度出post誓要閃爆大家眼睛，展鵬晒個人相指：「May I ?」
Phoebe就馬上隔空回應話：「SURE!!!」
兩分鐘後，Phoebe就再post出二人互相對望嘅合照：「多謝你讓我成為你生命中的女主角」
之後，展鵬同樣晒出同一張合照，並回應對方話：「也是唯一的」
唔少網友見狀都紛紛留言不斷恭賀兩位準新郎新娘！
除此以外，展鵬亦喺今早09:09於微博晒出同女友Phoebe嘅影婚照花絮，似乎係想意寓二人「長長久久」！
二人感情 先苦後甜
煎Pang日前出席活動時春風滿面，原來人逢喜事，有記者問到點睇二人倫敦之行被途人偷拍，他大方承認去了一星期：「佢喺英國讀書，算係舊地重遊，現場有好多華人，我都有同啲小朋友影合照，冇所謂。向來低調處理，她比較辛苦，呢兩年我有好多緋聞同唔太好嘅新聞出現，佢都喺我身邊，陪住我，我好感激佢，我性格唔係好Sweet，行動勝於一切，希望之後先苦後甜。」
他更以行動表示對女友一條心，在半年已將IG內大部分女藝人和女性朋友統統刪除。
擔任港姐星級評判 邂逅單文柔
睇番單文柔選港姐時啲相，依家明顯靚咗好多！單文柔在倫敦藝術大學倫敦時尚學院，修讀布料設計學士課程。大學畢業後曾任職布料設計員，2016年參加港姐，在首圈十強出局。同年底入TVB藝訓班，之後主要做兒童節目主持。而單文柔在選港姐期間，邂逅了擔任港姐星級評判的煎Pang！
與單文柔同屆嘅港姐有劉穎鏇、張寶兒、蘇韻姿、馮盈盈！
戀情起初不為fans接受
加入TVB已近十年的陳展鵬憑《城寨英雄》成為視帝，事業走上頂峰，更同胡定欣因《城》成為螢幕情侶，人人認定他們是一對，可以有情人終成眷屬，惟煎Pang被踢爆暗撻單文柔。
戀情曝光後，一度令煎Pang人氣急跌，單文柔也被鬧係壞女人，但煎Pang未有袖手旁觀，不但處處維護，更罕有地大方承認對方的女友身份，讓二人感情突飛猛進，隨住時間久了fans都開始接受戀情，更有網友話佢哋愈來愈合襯！
性格純品又溫柔
煎Pang性格內向又悶蛋，向來對感情事低調處理，單文柔也配合男友作風，未有把感情事掛嘴邊。煎Pang去年才首度開腔談感情事，表示二人相識大半年，他大讚女方好純品，相處過程十分開心。而自己也屬適婚年齡，若然將來結婚，定會大方公開喜事，果然講得出做得到！
愛屋及烏 孝順陳媽媽
煎Pang都係圈中出名嘅孝順仔，入行多年來都係同媽咪住，據知單文柔唔介意和陳媽媽同住，也與陳媽媽相處得不錯，知道陳母身體唔好，而煎Pang又出埠，她也會代為照顧。識得愛屋及烏，難怪煎Pang認為她非娶不可！
愛低調拍拖行善
臨近農曆新年，煎Pang帶住單文柔去咗筲箕灣護老院探訪一班老友記，單文柔同班義工幫手將一袋袋禮物送畀老友記，又陪啲老友記玩手工，被班老友記集郵，煎Pang當然唔會say no啦，見到班老友記個個笑晒口，一定過咗個好開心嘅晏晝，拍拖都不忘做善事！抵讚！不過煎Pang究竟幾時賜女友一個名份啫？
啱嘴形
單文柔是去年她選港姐時認識，她在英國住咗多年，也在當地讀Fashion。而煎Pang又對當地的時裝很感興趣，二人一開始有共同的話題，煎Pang覺得二人好啱嘴形！
為煎Pang學煮中餐
Phoebe早前有份做《美女廚房》，她透露自己平時都很喜歡下廚，但比較鍾意煮西餐，她從節目中偷了不少師，因為知道男友愛吃中餐，所以為陳展鵬開始學習煮中餐，仲要男友做其白老鼠㖭！
其實煮得好唔好食其次，最重要有心為愛人下廚，甚有做老婆嘅條件，難怪煎Pang咁快決定結婚！
二人對戀情向來低調，而煎Pang近年漸漸帶女友出席公開場合，之前更約埋黎諾懿夫婦拍拖睇騷！
