陳凱琳向江若琳取經籌備婚禮 同鄭嘉穎好事近？
廣告
陳凱琳日前同江若琳、田蕊妮一齊出席護膚品牌活動，期間見佢同江若琳特別好傾，不時咬耳仔密密斟，問陳凱琳係咪向正籌備婚禮中嘅江若琳取經？佢笑言：「我有關心佢哋個婚禮嘅嘢，知係12月23號舉行！」
撰文：東方新地｜圖片：新傳媒圖片庫、陳凱琳IG
陳凱琳 第一次見江若琳
陳凱琳話今次同江若琳係第一次見面，所以特別多嘢傾：「我本身都識Oscar(江若琳未婚夫蕭潤邦)，之前探班Oscar都有送小籠包嚟請大家食。我有關心佢哋個婚禮，知係12月23號舉行，同埋知佢開咗間麵店。」而問佢會唔會喺男友鄭嘉穎面前素顏，佢就話：「睇場合啦，我出街出騷就會化妝，平時喺屋企會簡單啲素顏。」
江若琳有選擇困難症
而江若琳就話自己對婚禮其實冇乜計劃：「因為每日都變緊，女人嘅嘢五時花六時變，好在都有朋友幫手做決定。緣分到時，婚禮到啦！」問佢揀咗婚紗未？佢表示：「我有選擇困難症，所以揀咗好多條裙，有5至6套，不過之後都會留番畀造型師再去篩選。」
田蕊妮 說話要溫柔
除咗陳凱琳同江若琳外，幸福靚太田蕊妮都有份出席活動，問到佢老公杜汶澤攞唔到金像獎有冇失望？佢話：「我諗我失望多啲，因為我比較緊張，宣布時我仲捉住佢隻手！」佢又指最近正忙於錄新碟，不過因為聲帶問題令進度有啲延誤：「可能我有時拍戲太激動，令聲帶有少少變厚咗，醫生要我一個月唔好講嘢，對我嚟講真係冇可能，所以我冇理到佢。不過我依家會溫柔啲咁講嘢，因為要養聲。」
