鄭嘉穎十級戒備 巨肚陳凱琳破禁出關

撰文：東方新地｜圖片：東方新地、Instagram

鄭嘉穎陳凱琳8月峇里大婚

今年8月，鄭嘉穎在峇里迎娶陳凱琳，於Bvlgari Resort Bali舉行盛大婚禮，當時已有傳二人是雙喜臨門，但依照中國傳統，未夠三個月怕BB小器，正常冇人會公告天下，而當時鄭嘉穎與陳凱琳亦矢口否認有喜。

陳凱琳 鄭嘉穎公布喜訊

由於時間的關係，事隔三個月的11月22日晚上10時許，呢對新婚夫婦在IG上載溫馨擁抱合照，表示喺感恩節呢個大日子，宣布家庭將會有一位新成員，陳凱琳成功陀B！難怪近月鄭嘉穎每次出活動見人都由心笑出來，原來即將做人父難掩喜悅。

陳凱琳：「我都想生孖胎！」

婚後陳凱琳出席活動接受訪問：「我都想生孖胎，我有龍鳳胎基因，可能生孖胎或一男一女，我屋企仲有個家姐，我同細佬係龍鳳胎，三個好熱鬧，可以玩，不過我又聽過係隔代遺傳。」咁想生幾多個小朋友？陳凱琳坦言：「三個，因為我自己都係三個(家中三姊弟)，感覺好似個完整家庭咁，坐架五人車啱啱好。」

鄭嘉穎變緊張大師

為照顧陳凱琳，鄭嘉穎有備而戰，早已向身邊好友取經，深入了解孕婦在懷孕期間所遇到的種種問題，據知情者透露：「嘉穎變咗緊張大師，Grace(陳凱琳)有咗仲不停出活動，佢就日哦夜哦叫佢小心，又驚佢做嘢會好攰。見到佢次次都著四吋高踭鞋，嘉穎不知幾擔心，所以除咗之前接落嘅 job，佢已經禁止佢未來幾個月再接job，希望Grace可以留喺屋企養胎。」

雙方媽咪幫手照顧

據知嘉穎又對陳凱琳表示，如果頂唔順要出街都一定要有朋友陪，唔畀佢一個人周圍逛，日常方面佢又吩咐雙方媽咪幫手照顧，令Grace食得好有湯水飲。不過Grace唔鍾意成日留喺屋企，所以唔辛苦同唔長時間嘅job，佢都仲好想接。

陳凱琳陀B狂出活動

婚後的陳凱琳幾乎絕跡無綫的活動，連台慶夜都未有現身，不過就出席不少商場活動及時裝品牌的活動。過去三個月，她每次出現都悉心打扮，纖薄身形的她刻意選擇遮掩到微隆凸肚的衣服，甚至腳踏四吋高踭鞋，所以從來無人發現她已經懷胎幾個月。

巨肚陳凱琳破禁出關

日前本刊拍得陳凱琳獨自現身銅鑼灣鬧市，先去shopping再去買熱飲，收埋大肚幾個月的她，這日穿上一件鬆身恤衫，凸起的肚皮終於避無可避表露無遺。記者目測其巨肚最少已有五個月，但四肢仍十分纖瘦。拎住杯熱飲邊行邊飲的她，最後走到戲院買定飛，再會合女友人入場。

背面睇勁Slim

友人傍實回家

陳凱琳睇完戲散場後即搭的士返回北角寓所，看來她亦緊從老公鄭嘉穎吩咐，盡量不要周圍去，去睇戲都要有人陪，在女友人護送下最後安全返家。

收肚高手

肚皮一日比一日大，陳凱琳早前出席香水品牌活動時，身穿一件露肩白色大花造型連身褲，繼續把上半身隆起的腹部完全遮蓋。但她仍然穿上四吋高踭鞋赴會，表示心情興奮又緊張，並自爆懷孕後情緒好波動需要減壓，就連睇卡通片有感動位都會喊。

黃智賢爆料

陳凱琳被傳媒追問時，唔肯講陀B幾多個月，對BB性別都話要保持神秘不能透露。但早前鄭嘉穎好友黃智賢已爆料，話鄭嘉穎在陳凱琳照超聲波時大嗌：「好大條呀！」故外界揣測是小王子的機會較高。

準人父興奮到爆

鄭嘉穎早前係新片宣傳，分享喜悅時開心到同大家講定恭喜發財，他說：「心情開心過攞獎同中六合彩，難以形容，好喜悅非筆墨能形容，太太叫我唔好講咁多關於BB嘅嘢，佢比較緊張，大家問番佢，依家全家上下都緊張到不得了。」又表示第一次從超聲波睇到BB個樣，是一個難忘經歷：「 你問我太太啦！佢叫我唔好講咁多，話驚我講錯嘢，只 可以講BB屬豬，其他交畀佢講。」50歲前做爸爸的願望順利達成，鄭嘉穎下一個目標應該是陳凱琳希望生三個先夠數的生育計劃。

準人父為B轉性

自從遇上陳凱琳，曾被指為人寸寸貢的鄭嘉穎亦有所轉變，做完人夫做人父，嘉穎笑多咗變得寬容，陳凱琳功不可沒。

星級契媽契爺

鄭嘉穎與陳凱琳在圈中好友甚多，身邊兄弟姊妹多個月前已知陳凱琳懷孕，不過大家守口如瓶，BB一出世就有多位契爺契媽輪住錫，萬千寵愛在一身。