陳伶俐：佢感情生活係… 自爆與19歲大仔有代溝
撰文：東方新地｜圖片：微博、新傳媒圖片庫、陳伶俐Facebook
陳伶俐分享幸福生活
日前，陳伶俐偕老公劉頌銘及細仔出席電影慈善活動，陳伶俐表示自己之前同老公去咗俄羅斯睇世界盃，仲足足睇咗8場，皆因老公是標準球迷，又指覺得今次去俄羅斯同4、5年前好唔同，當地人比以往親切。而且，仲大讚啲嘢好好食，可能不停食嘅關係，結果肥咗6磅。
另外，伶俐就話小朋友都好鍾意睇波，但可惜囝囝年紀太細，所以冇帶埋入場，但就帶咗大仔同行。
陳伶俐成個「空中飛人」
伶俐表示自己早前去咗米蘭一個星期，打理畫廊生意，之後要急急飛番香港同細仔慶祝4歲生日，仲話自己都未得閒番餐廳打點，認真貴人事忙，成個「空中飛人」咁！
陳伶俐自爆與大仔有代溝
至於提到大仔林肯，原來一眨眼就話咁快19歲，伶俐就笑言指大仔依家唔係太高，雖然自己後生時已經生佢，但依家同佢都有代溝，至於大仔嘅感情事就冇同伶俐講，但相信暫時未有拍拖。
陳伶俐晒大仔DSE成績 感謝兒子支持再婚
長子Lincoln現於香港大學修讀工商管理學學士(lBGM)，早前19歲生日，陳伶俐在FB大晒兒子DSE成績單，見佢全部科目都考獲5*或以上，成績好好，見囝囝咁懂事又係高材生，陳伶俐當然好放心！
佢仲寫下給兒子的信，提到當年只得22歲嘅佢未婚懷孕，伶俐話要為自己嘅「任性」負責任，排除萬難把Lincoln帶來這個世上，而離婚後，懂事的Lincoln又鼓勵陳伶俐去拍拖，希望媽媽得到幸福。伶俐在信中講明以後都會全力支持仔仔，又叫佢好好享受大學生活。
給Lincoln的信：
多謝乖仔你，很有心思和努力地…在2017年～我40歲～送了一份很大很大的禮物給我！還對我説：「媽咪，我好想為你做點事…..」我真的感到欣慰…更感動得…流下淚來…（放心，這是開心的淚）
19年前的今天…剛到22歲的我，不理世俗眼光…義無反顧…排除患難，堅決地把你帶來這裡…跟自己説：「要為自己的任性，負上一世責任！一定要好好把你養育成人！」就是這份任性，所以更努力工作…更拼命去生存～靠自己的一雙手，要做好母親的職責！
2010年，你鼓勵我去拍拖，跟我說：「找個男人好好錫你，倍下你去旅行玩下，都成33歳啦！成日做嘢都沒有認真去玩下…..」原來，11歳的你…知道我那廿幾歲的生活瑣碎事……
2012年，我問你：「阿仔，點算好？有人竟然向我求婚…. 」你興奮地説：「梗係結啦！」但我答：「我怕…更怕失去你們…我會內疚的…」你搶著説：「到時我們成家立室，得你自己一個人，我們仲內疚啦！」
説到這裡……涙…今次是感觸感恩的涙…真的要多謝上天送給我「這對寶貝仔」～我的幸福快樂是你們送給我的❤️
今天，你就19歲了！媽咪真的好高興～高興的是你的懂事和生性，令我想起…那些過去…苦與樂…一切一切都是值得的！
多謝你陪我過渡那些年…那些事…！❤️
祝你生日快樂！身體健康！繼續享受你的大學生活～他日你想做什麼，我都一定會全力支持你的！
你也要好好享受和珍惜你的時光！
再一次多謝你…是你…成就了今天的我！
～乖仔Lincoln ～
永遠愛你的媽咪😘
陳伶俐 再婚嫁得好
陳伶俐於12年下嫁新加坡富豪劉頌銘，做咗幸福少奶奶依然唔願停，繼兩年前開畫廊，近日再掟千萬開餐廳。14年為老公誕下金叵羅，加埋同林敏驄之前所生的兩名兒子，已是三子之母的她，可心急追多個女？
劉太陳伶俐接受本刊記者訪問時，坦言已經放棄這個諗法：「我40歲之前就好心急，但依家41歲，驚自己兼顧唔到，順其自然啦！」老公是新加坡隱形富豪胡嘉烈後人，家族顯赫，最重要奶奶思想開通，從來冇催促，得到夫家上下厚愛，伶俐可以事業家庭兩兼顧！
陳伶俐 愈忙愈有魄力
陳伶俐的富豪老公劉頌銘是新加坡人，近日她就孖老公在銅鑼灣開設新加坡餐廳，將當地美食砂煲田雞粥引入香港。繼兩年前開設畫廊，近日進軍飲食界，三子之母陳伶俐卻不嫌辛苦：「我鍾意做嘢，愈忙愈有魄力！加上自己過咗40歲，諗法唔同咗，唔想再嘥時間，想做自己鍾意又有滿足感嘅嘢！」
陳伶俐同老公投資千萬開新加坡餐廳，餐廳籌備逾一年，由於要為餐廳及畫廊兩邊忙碌，這幾個月她就足足瘦了十幾磅，現時只剩107磅，雖然咁辛苦，但她就表示遺傳了父母潮州人性格，鍾意忙碌工作，愈忙愈興奮！
萬千寵愛
陳伶俐坦言現階段可以專注自己興趣創業，除了多謝老公大力支持，亦多得大仔二仔成就她的夢想。「我託賴幾開心，囝囝好獨立好生性，成就咗媽咪去做自己鍾意嘅嘢，的確係幾感動，佢哋好似好朋友咁，有時又似男朋友咁去關心我，無論有乜開心唔開心，佢哋都會同我傾，加上佢哋好懂性，可能知道我好早做媽咪，以前有好多夢想未實現，所以佢哋好Backup我呢個年紀做番自己鍾意嘅嘢。」
陳伶俐話要多謝老公同大仔二仔都好支持她成就自己的夢想。
食神韜韜都有到場為陳伶俐開店剪綵，真係事業、家庭樣樣掂！
大仔街頭表演
19歲大兒子林肯現於香港大學修讀工商管理學學士(lBGM)，讀書叻外還有表演天份。陳伶俐一提兒子就滔滔不絕：「佢唱歌真係幾好，我都畀好多朋友聽過，不過佢好低調，唔想我講，佢怕見咗報，會影響佢嘅社交圈子，但我好開心，原來佢聖誕嘅時候，去咗尖沙咀街頭表演，最緊要佢做自己開心嘅嘢，我又唔會迫佢，只要唔好做壞事，唔好傷害人，佢做咩我都會支持佢！」
陳伶俐表示三個兒子相處融洽：「雖然大嗰兩個仔，同細仔年紀都有段距離，但佢哋好鍾意同細佬玩，細仔就最幸福，係人都鍾意，萬千寵愛！」
陳伶俐同老公結婚五年多，至今仍非常恩愛，不時孖住出埠放閃，早前兩公婆又去了日本旅行，一起浸溫泉享受二人世界。
奶奶錫晒
婚後同老公搬入山頂布力徑獨立屋，陳伶俐更深得奶奶痛錫，獲贈位於新加坡聖淘沙價值億半港元的豪宅，問她同奶奶的相處之道，陳伶俐就表示：「始終佢哋係長輩，我覺得盡量配合番長輩要求，都係好簡單嘅事，大家坦白同尊重，譬如覺得有咩嘢唔妥，就一定會出聲，唔會收收埋埋，大家係互相尊重！」
問伶俐奶奶可有給她生B壓力？陳伶俐就大讚奶奶：「佢係新加坡人，仲係大學生，你知嗰陣時嘅大學生，真係好Yeah！奶奶思想好開通，冇畀壓力我！」
陳伶俐婚後搬入夫家位於山頂布力徑過億獨立屋，同老爺奶奶一齊住，婆媳關係更好到經常一齊行街食飯，奶奶更送她新加坡市值億半豪宅做禮物。
