【降魔的2.0】監製大爆新劇重要角色獲異能 隱藏XX力量降魔伏妖！
撰文：東方新地｜圖片：新傳媒、劇照、電視截圖
《降魔的》開拍續集！
去年台慶劇《降魔的》播出後深受歡迎，套劇講述一個有陰陽眼的的士司機馬季(馬國明飾)會接載「其他空間」的生物，當中穿插著降魔情節和一些感人的愛情和親情故事，靈異與感動集於一身！而在去年《2019無綫節目巡禮》上，TVB公佈開拍《降魔的2.0》的消息，主要由原班人馬演出，也會有新角色加入！
馬國明去年只得一套《深宮計》出街，但今年將會有三套劇演出，包括《白色強人》、《C9特工》及《降魔的2.0》！
早前《降魔的2.0》喺電視城進行開鏡拜神及試造型，相信劇迷最想知道係咪原班人馬演出？有咩角色加入？續集會加碼去到25集！小馬、芷若、啤啤、石敢當、Key man、莉莉、晶晶、紅眼魔之母都喺度，續集都加咗唔少新角色！
黃智雯將延續上輯「芷若醫生」角色，當中將面對更多生離死別及死亡故事，她早前接受訪問時話：「仲有一樣好特別嘅嘢，就係今次我多咗一個新能力去附助小馬（馬國明扮演）去降魔伏妖，但係乜嘢就要賣關子先，暫時都唔係拍得好辛苦，只係日夜癲倒開大夜班，同埋拍好多坐的士、恐怖情節嘅場面。」
監製大爆新劇重要角色獲異能
雖然黃智雯於訪問中就冇透露自己於新劇會有咩新能力，不過好在最近新劇編審羅佩清終於大爆黃智雯於新劇中會獲得通靈能力！而監製更為此解釋指芷若上次入咗鬼域，所以就唔覺意打通咗隱藏力量，能夠同靈體溝通，有啲似靈媒嘅感覺！
聽落，大家可能會覺得黃智雯變咗女天師，應該同馬明一樣可以降魔伏妖，但係監製反而指芷若只係喺某啲事上幫到手，而呢個新能力同時亦會有助佢同馬明之間關係變得更緊密！照咁講，唔通芷若同馬季喺新一輯有機會發展？！
何遠東 客串現身
何遠東在《降魔的》的龍貓已經去世，但佢喺《降魔的2.0》會以龍貓的身份再度出現，何遠東就話唔能透露太多，但主要係會同馬國明、蔣志光有對手戲！
蔣志光 再次現身
莫有為(蔣志光飾)喺上一集被高壓電電死，估唔到喺續集都有份演出，但未知係做人定扮鬼喇？！
加入新面孔
講到新面孔，係喺番外篇嘅有份演出嘅鄧佩儀同麥凱程！
同樣有份於新一輯演出嘅C君就會做隻咸濕鬼，但有超高能力，黃智雯透露：「有C君會保護我，那些粗重功夫和高難度的動作就留畀C君做，我主要做催淚，故事去到後段我會和小馬一起去闖難關。」
靚女譚凱琪會加入同芷若、啤啤爭小馬，馬國明真係好艷福！
石敢當冇咗！胡鴻鈞飾演豪仔
喺上一輯演石精靈「石敢當」嘅胡鴻鈞，已經完成使命唔會出現，而喺續集佢會以豪仔身份出現，不過今次都係同馬國明勁多對手戲，但佢透露一開始其實二人是敵對關係。
睇番《降魔的》尾聲，馬季去到十字路口大叫「石敢當」，但石敢當最終冇出現，當馬季返回的士時，坐後座的胡鴻鈞話：「小馬，你不認得我了？」馬季反問：「豪仔？」睇嚟係留伏線！
劉佩玥 啤啤翻生？
飾演「啤啤」劉佩玥喺《降魔的》講佢被焗死，估唔到佢喺續集都再現身，仲同芷若爭小馬！
張彥博 反串演出
早前在《跳躍生命線》飾演的「雄姐」嘅張彥博(Bob)，在社交網分享拍攝新劇《降魔的2.0》的造型，見他裝「胸」作勢帶上假髮扮女人，佢留言：「豁出去了，抱歉…讓大家難受 #降魔的2.0 真·妖～」原來佢都有份客串演出！
林凱恩 懷魔種
林凱恩更懷有其骨肉，監製稱會有延續，但BB是否魔種或能否出生，則不會劇透。
趙永洪離巢冇份
續集籌備了一年，TVB人事變動也有發生，所以一年後還能聚集原班人馬演《降魔的2.0》是不容易的事情，好似飾演陸嘉一「些粉」的趙永洪因為已離巢，角色冇得復活。
黃子恆 有得留低
於年前無綫劇集《降魔的》有份演出的黃子恆，雖未見他出現新一輯《降魔的2.0》的造型活記者會，有鑑他與大陸女粉絲Michelle的桃色新聞，有傳令到對方墮胎的負面新聞，問監製方駿釗是否將他飛出劇組，監製表示黃子恆於新一輯屬於客串，戲分不多，至於上一輯他演的角色被惡魔附身，而林凱恩更懷有其骨肉，監製稱會有延續，但BB是否魔種或能否出生，則不會劇透。
2018年黃子恆鬧出與粉絲發生性關係嘅桃色新聞，導致形象受損，唔少人以為佢喺續集被叮走，但原來唔係，黃子恆喺開鏡嗰日雖然冇現身，但監製方駿釗話黃子恆在《降魔的2.0》會客串演出，戲份不算太多，都是劇情的需要才這樣安排。
即時回顧：
《降魔的》6大好戲之人主角配角演技大爆發！
｜龍貓－何遠東飾
龍貓死後見到自己的家人與朋友，得知朋友們善待自己的妻兒，而且對自己滿懷思念，內心十分感動。而他熱淚盈眶地表達自己的心聲時，「我這輩子沒甚麼成就，可大家都還記得我，聊起我，都是歡笑和開心的事，那麼最起碼我也是一個不錯的胖子」，感人催淚。
何遠東把這個好好先生的角色演繹得非常好，角色是一個平凡的人，但他的性格行為卻深深地刻劃在親人朋友的心中。有時候錢，成就又是不是那麼重要呢？其實只要有一班感情深厚的朋友知己就可以滿足了。
｜些粉－趙永洪飾
些粉要去捉精靈，龍貓停車等他不幸中「頭獎」，遭兩人從天而降壓在的士車頂，結果死亡。些粉回頭望見龍貓慘死，當場呆滯。當醫生宣布龍貓正式死亡時，內疚，恨天不公的心情充斥全身，真情流露，怪罪自己捉精靈，死的應該是自己。
趙永洪在這部分的演技真的是大爆發，由一開始見到龍貓死亡的那種呆滯，然後由呆滯到怨恨自己的無能，怨恨天的不公，最後再到傷心與怨悔集合，淚腺爆發；一層又一層地剖析內心的情感，自然不造作的喊技令人動容。
｜馬季－馬國明飾
馬季知道力哥力嫂原來是自己的親身父母的鬼魂，他們一直都陪伴在自己的身邊，馬國明沒有一下子就爆發自己的情感，而是把自己的感情深深地壓抑在心中，只是滿淚盈眶地喊著媽媽，整個人好像在迷失當中。
之後阿moon趕到，馬國明這時才在木無表情的臉上留下一滴眼淚，雖然沒有大嚎大哭，但麻木地流出眼淚更令人感到心痛。這一幕充分地顯示出馬國明成熟的演技，悲傷不只是力竭聲嘶，男人眼眶中布滿眼淚更受感染。
｜力哥力嫂－金剛小儀
力哥力嫂在30年前葬身於麵檔大火，但由於他們並不知道自己已死，因此一直不斷重複過著昔日生活。雖然他們不知道自己已經死亡，但其實鬼魂一直都是陪伴在馬季身邊，守護著他。
這兩個角色雖然出現的時間不多，但已經深受市民的喜愛。他們愛護兒子的演技更是大獲好評，不管是他們拒絕承認馬季是自己的兒子，還是得到解脫之後的深情對話，都令人感觸萬分。
｜毒男鬼－洪永城飾
洪永城客串一個迷戀貝貝娜的鬼魂，他是後援會會長，洪永城在車上伸長條脷非禮貝貝娜。而他的毒男性格演繹得入形入格，不管是被打重要部位出現的高潮眼，還是要去炫耀這件事的興奮表情，都動感十足，完全是一個毒男形象，根本做番自己。不知之後會否重遇這個毒男鬼魂呢？
演員合體跳喪屍舞
《降魔的》深受觀眾歡迎，結局仲留有伏線，套劇嘅編審早喺2018年初透露，已有續集的初步構思，連劇名都有，若在頒奬禮攞奬會加添開拍嘅機會！因此劇集一眾演員當時就拍咗條片叫《降魔的之攪咩鬼習作》齊齊跳舞！《降魔的》劇集一眾演員「小馬」馬國明、「芷若」黃智雯、「龍貓」何遠東、「石敢當」胡鴻鈞、「莉莉」譚嘉儀、「展明」黃子恆、「佩玲」林凱恩、「晶晶」謝雪心及「有為」蔣志光齊齊現身，各人相繼做出撻匙、校倒後鏡、扣安全帶、揸車等嘅動作，加埋背景音樂係〈到此一遊〉，係人都知佢哋想扮喺的士入面啦！
而片中另一亮點就係黃智雯大跳勁舞，雖然便服上陣，但係有舞蹈底子嘅佢跳得非常誘惑同吸睛，最後「天然呆」馬國明就同其他演員扭身扭勢切入鏡頭！而片尾就傳來一句：「十字路口有落呀唔該！」同埋「收到！」睇完條片真係好期待呀！
「龍貓」何遠東之後又喺IG上載大合照同留言：「基於要多謝大家對《降魔的》嘅支持，我地（哋）又點可以唔做多少少嘢去報答大家呢？嗱，真係少少少少！又基於一篇千字文岀現，我地（哋）又點可以唔準備少少片花，去吸住大家個睛呢？嗱，條片真係會吸睛㗎！究竟有冇《降魔的之XXXX》，就睇大家啦！」
編審爆開拍繼續集
「第2屆觀眾在民間電視大獎2017」有結果，《降魔的》成為大贏家，共奪9個大獎，包括民選最佳劇集﹑馬國明膺民選視帝﹑而《降魔的》編審羅佩清則獲「民選最佳劇本」。編審羅佩清仲喺facebook發千字文除了感謝劇迷支持，仲透露計劃拍續集，連劇名都諗好，叫《降魔的之十字路口》，真係好消息！
