《陀槍師姐2021》梁雪湄陳四喜復出無期 疫下扮獨遊泰國4個月

撰文：東方新地 圖片：梁雪湄IG圖片、劇集影片截圖

梁雪湄冇得做陳四喜

43歲梁雪湄自09年離開無綫之後，鮮有在幕前演出，無綫新劇《陀槍師姐2021》上月尾正式煞科，未知幾時正式出街已經好有話題，不過主演陣容就令人好失望，因為除了滕麗名回歸飾演「陳三元」，還有朱咪咪、黃美棋繼續分別以「二妹姐」同「莎莎」身份登場，其他角色與前作幾乎無關係，令好多觀眾都覺得唔完美，因為陳家始終未齊腳，「陳小生」歐陽震華、「陳四喜」梁雪湄和「陳五福」姚樂怡統統都沒有份參演，當中超過十年冇拍過劇，「電波少女」出身的梁雪湄明明之前公開講過自己非常想復出拍劇，不過無綫方面都無搵她。

梁雪湄禁足酒店房

劇無得拍，被指逆齡生長的梁雪湄繼續做生意人同旅遊達人，本來因疫情影響，大半年無得出埠，搞到梁雪湄心癢癢，去年10月她終於按捺不住，即使外遊要進行硬性的隔離，她都事在必行，執定幾個行李箱好似搬屋咁出發去泰國，在曼谷酒店先進行16日15夜的隔離，期間要接受三次核酸檢查，頭一個星期連房門都唔可以踏出，梁雪湄一日三餐都靠room service，不過她甚為享受，仲話當Staycation一樣，食飽做吓運動打吓機。

白滑梁雪湄出水任睇

在酒店隔離期間，梁雪湄不時自拍騷G奶，四張幾依然堅挺，事業線咁多年都keep到，之後完成隔離才出發去蘇梅，屈了十幾日的梁雪湄簡直大解放，著吊帶性感睡衣浸浴缸，又去私人泳池晒身材，白滑身材任睇，之前在酒店隔離時梁雪湄都是自拍多，但去到蘇梅好唔同，當中好多照片都是男友視角去影，張張都係女神相，究竟邊位男士咁有艷福呢？

梁雪湄樂而忘返

明明有人陪玩，不過梁雪湄就一於低調，由去年10月到現在，4個月來遊遍整個泰國，有錢有時間，令人羨慕又妒忌，由於疫情期間遊客大減，梁雪湄大玩特玩體驗當地的風火人情，有網民問她在泰國留幾個月是否不打算返工，亦有網民留言話佢係靚太。