【陀槍師姐2021】宣萱投訴陳豪連累瘋狂NG 杜之克親解劇集抽起又播之謎
文：東方新地 ｜圖：東星圖片、無綫娛樂新聞台截圖
《陀槍師姐2021》只有飾演「陳三元」滕麗名、其女「程莎莎」黃美棋及其母「二妹姐」朱咪咪有得留低外，全部是全新角色，並加入搞笑元素，由宣萱、陳豪負責放笑彈。
《陀槍師姐2021》宣萱：「我叫陳豪唔使畀戲我﹗」
《陀槍師姐2021》是宣萱繼《使徒行者2》後與陳豪第二度合作，被問到拍攝時有乜最難忘，宣萱笑住投訴陳豪：「呢套劇係我繼《難兄難弟》之後NG最多嘅劇，應該破咗我紀錄，可能我笑點太低，有場戲係講大隻佬陳豪拎住隻公仔，我狂NG，其實嗰時已經凌晨四、五點，大家都好晏瞓，但係我笑到不停NG，只要佢（陳豪）坐喺度我就忍唔住笑，佢真係好搞笑，我叫佢冇入鏡嗰啲唔使畀戲我，對手冇入鏡都做埋成場戲先叫專業，有冇聽過叫對手唔好畀戲自己㗎？但我真係笑到成泡眼淚水出晒嚟﹗」
宣萱為陳豪破例飲咖啡
《陀槍師姐2021》中飾演「檬Sir」的陳豪，會跟宣萱及滕麗名有感情線，陳豪話拍攝時好開心，氣氛輕鬆，大讚宣萱好照顧大家，更開心是「導」到唔飲咖啡的宣萱入坑，宣萱話：「阿Mo教我飲咖啡，佢每日會帶咖啡機返工，未開工趁大家化緊妝，佢第一時間開著部咖啡機先，拍《使徒行者2》時佢已經沖畀我飲，但係我唔飲咖啡，佢都冇迫我，到今次，佢沖啲BB班都飲得，加啲奶畀我慢慢去試，又OK喎，飲咗之後鍾意咗，依家鍾意咗飲咖啡﹗」在旁的陳豪聽到宣萱話上癮，立即大叫Yes﹗
張嘉兒色誘許紹雄上床
滕麗名有工作在身未能出席《陀槍師姐2021》記招，而身在新加坡的許紹雄、朱咪咪以及在內地開工的羅子溢（前名羅仲謙）都有拍片賀《陀槍師姐2021》出街，飾演許紹雄劇中老婆的張嘉兒在記招上透露：「會同老公（許紹雄）有親熱、有激烈床戲﹗劇中講我哋想要BB，我會著性感睡衣去色誘佢上床（同前輩演床戲有冇壓力？）冇，佢好好嘅﹗佢OK嘅﹗對住佢會成日忍唔到笑﹗」
杜之克親解變陣真相全場爆笑
日前《大步走》預告片出街，無綫亦公布接住《堅離地愛堅離地》播出是《大步走》，正當大家以為《陀槍師姐2021》抽起後，翌日突然再次轉陣，公布《陀槍師姐2021》在周一（25日）晚播出，對於該檔期不斷變陣，無綫高層杜之克出席《陀槍師姐2021》記招時親自解說：「點解有一套劇嘅宣傳片出咗之後，第二日就出《陀槍師姐2021》嘅宣傳片呢，因為我哋時間唔係好夠，製作吓一啲話題，畀大家去討論吓，相信依家全城都關注《陀槍師姐2021》嘅﹗」講完台上台下一齊狂笑，佢自己都忍唔住。
《陀槍師姐2021》搞笑預告：
《陀槍師姐2021》集有型男、Chok男、尖叫女、有搞笑、有火爆、有浪漫、有兩代恩怨，仲有埋黑幫仇殺等元素，梗有一樣啱你睇！
