清水灣1,700萬豪宅新居全公開！Kenny關智斌 珍藏模型大晒冷
成員關智斌(Kenny)早前在其社交平台專頁上載一條「新居大曝光．HOMETOUR」嘅短片，原來二人初出道時公司安排佢哋同住，到多年後才搬開各自住，而成員張致恒(Steven)呢日就去咗Kenny新居仲話會同住一日，睇番Kenny豪宅新居寬敞舒適，裝修有格調，而且露台外望景觀一流，睡房仲放咗好多珍藏模型，究竟Kenny新居係點？等Steven帶大家參觀！
撰文：東方新地 圖片：新傳媒圖片、關智斌fb
關智斌 豪宅新居大公開
Kenny早前在其社交平台專頁上載一條「新居大曝光．HOMETOUR」嘅短片，Kenny在上載短片中留言話：「好多年前其實我同 Steven係同居過嘅，最近搬咗新屋就叫佢上嚟重拾舊歡，係咁咦同佢同居一天啦！」
Steven就到Kenny位於清水灣道嘅低密度豪宅傲瀧(Mount Pavilia)新居小住一天，據知，在內地拍劇狂吸金嘅Kenny，聽父母話買磚頭保值，而佢之前以接近千七萬入Mount Pavilia一單位，環境清幽又有度假feel！
一進到大堂，Steven話畀「高科技」難倒，唔識撳樓層，又大讚未入屋大堂已經夠靚夠氣派！
到喇！Steven撳鐘，Kenny一開門就話佢遲大到，明明約8點但9點至到！
Kenny問Steven點解得咁少衫，啲底衫褲去咗邊？Steven笑騎騎話佢屋企有可以借，結果畀Kenny大鬧冇理由借貼身衣物！
客廳、飯廳
睇睇客廳、飯廳係長方形，好四正好實用，外望仲有個超長露台，Kenny話有時佢會一個人坐喺露台食早餐，好歎！不過Steven笑話個露台又窄又冇冷氣，點解會出去食早餐，Kenny笑話以佢身形嚟講梗係窄，自己就剛剛好。Steven佢望一望個景色，補充話坐喺露台都好舒服！
書房
剛搬入去不久，仲有啲箱未拆，台上除咗放了兩部電腦，仲有個超大書櫃，唔講唔知原來佢好鍾意睇書，特別係烹飪書！
其中一面牆仲係可以用粉筆寫字，佢就寫上「just do what you want to do」！
衣帽間
一入睡房，先係見到衣帽間，有兩個大衣櫃間開咗衣帽間同睡床！
睡房
Kenny話佢間屋得一張床，所以喺度留宿要同佢孖鋪，Steven笑話拍檔好自戀，床頭仲放咗張自己嘅大相，瞓覺都要望住，Kenny話只係未諗到放邊！
智能喇叭
Steven笑Kenny好鍾意人哋話好就會買，Kenny話佢購物前其實有做足功課，好似呢個蘋果智慧喇叭HomePod係其中一例子！
Kenny叫咗一句：hey siri play some BOYZ song，結果播咗佢哋首快歌《Ready to go》！
之後兩子隨歌起舞，佢哋真係好搞笑，雖然比初出道時成熟不少，但依然有點大唔透咁！
自封Chef Kenny
之後Kenny又介紹張閱讀椅，話每晚都會坐喺度睇書，而佢近來最愛睇嘅烹飪書，都係由名廚Jamie Oliver所寫，佢仲話參考過後，近來在家自製沙律再影相放上IG，唔少網友都話以為係街外餐廳所買，咁有水準，又難怪佢沾沾自喜啦！
珍藏模型大晒冷
Kenny好鍾意日本模型，佢特別喺睡房訂咗個大櫃展示佢嘅珍藏，玩具由頂放到櫃底，排得滿滿，Kenny仲話喺日本見過一比一，只是未有買下！睇吓，地下Kenny都放咗塊水松板貼晒佢啲靚仔相！
睇吓，地下Kenny都放咗塊水松板貼晒佢啲靚仔相！
另一衣櫃除了放滿衫，仲有好多珍藏嘅超合金模型，Steven笑問Kenny係咪細個冇玩具玩，有童年大陰影，到大個要買番夠本！
洗手間
入到洗手間，Kenny搞笑話叫Steven浸泡泡浴，睇真啲，原來有淋浴間、也有浴缸，而且仲有好多護膚品，認真貪靚！
大談初出道往事一開始是冤家
參觀完新居，二人又坐下來傾計話當年，唔講唔知，原來二人一開始組團時，大家都看對方不順眼， Steven：「唔知點解一見到面大家都燥底」Kenny就話試過一齊坐車時明明冇交談，只是互望一眼，都會話「望咩呀望！」總之大家看對方不順眼！
只是時間久了，二人關係也慢慢建立，仲合作得好有默契！有一年Kenny生日，Steven豪花萬幾蚊買咗對鑽石耳環畀Kenny，點知Kenny話粒石太細，洗頭時差點沖走，激到Steven紮紮跳！
死老鼠的味道
二人又講番當年在銅鑼灣同居嘅情況，Kenny最難忘的一次係咁嘅：「有兩星期有死老鼠的味道，味道一天比一天厚，初時以為Steven不沖涼，但點會兩個星期唔沖涼㗎！」
Steven解畫，原來因為以前好多粉絲會送禮物，很多時都會送餅乾、零食之類。點知嗰次唔為意，有些食物變壞，Steven仲笑話Kenny的鼻很靈敏，有日一返到屋企好似緝毒犬咁索，追尋臭味來源，Kenny冇佢咁好氣話說：「怎可能聞不到？」
爆Twins是購物狂
佢哋大爆與對方生活的趣事，互指對方經常買大件物件回家，令屋企冇位行，而Kenny笑話其實佢哋唔算購物狂，Twins才是，特別是阿嬌會同款衫但唔同色全部都要買下！
Kenny最後還問Steven：「你想唔想同我再住埋一齊？我就唔想喇，呢度咁乾淨。」Steven答：「做咩唔想呀，呢度咁靚咁大」
BOYZ兌現承諾 合體開騷
相信大家仲記得張敬軒喺六月舉行嘅《HINSIDEOUT演唱會》上，搵嚟關智斌（Kenny）和張致恆（Steven）合體BOYZ，三人在台上合唱嘅震撼場面，全場掌聲叫聲大到拆天，引起極大迴響，網民fans紛紛留言話勾起集體回憶，又請求BOYZ再合體開演唱會，一圓等了他們16年嘅fans心願，終於等到有好消息，BOYZ將於10月16日假Star Hall舉行首個正式售票的演唱會《The Unboxing Live》。
早前Kenny同Steven都喺社交網貼出演唱會海報，以宣布演唱會成真﹗二人笑言最初以為大家講笑：「直至有一日公司突然同我哋講要搞演唱會，其實到依家都唔係太相信﹗」Kenny和Steven近年分開發展，未有合作多時，但默契依舊，拍攝演唱會海報時，準備了BOY’Z初出道時拍下嘅少男寫真、舊報章雜誌放在一個盒度，二人攬頭攬頸去拆盒，寓意「BOYZ回憶的盒子」，演唱會上帶大家返回當年青春嘅回憶，唱出大家熟悉嘅歌曲。
Kenny在盒中見到自己當年嘅赤膊露點都忍唔住自嘲一番：「都唔知點解會影呢啲露點排骨相，擺呢啲甫士。」又笑Steven著住件「東莞喱士衫」，二人並預告會將呢啲出土歌衫重現舞台﹗日前Kenny和Steven分別喺IG正式宣布BOYZ將於下月16日Star Hall舉行開演唱會，Kenny喺IG留言：「唔好話你哋，連我自己都諗唔到﹗」
Steven話近日為演唱會宣傳，敷定mask以最佳狀態見人﹗
鄭希怡容祖兒 蔡卓妍
日前BOYZ四出為演唱會宣傳，被粉絲捕獲集郵﹗BOYZ合體開騷公開後，好友們都紛紛留言表示好期待﹗
張敬軒6月舉行唧演唱會請來好朋友BOYZ做嘉賓，BOYZ一甫出場與軒仔一同合唱<死性不改>引爆全場歡呼尖叫不斷，當晚的片段及消息在不同社交網瘋狂洗版。
Kenny因拍攝演唱會海報見到當年拍下的露點相，笑指自己係排骨仔，Kenny今時唔同往日，操得全身健碩肌肉，唔知會唔會喺演唱會上騷吓肌﹗
BOYZ門票被秒殺
很多粉絲在Kenny社交平台留言表示多謝各位粉絲朋友嘅支持，為BOYZ打左枝強心針。佢哋會努力備戰，演唱會當晚使出渾身解數，把最好嘅BOYZ帶畀大家。
BOYZ處男售票演唱會前周五10點公開發售，反應非常熱烈，網頁更加長期繁忙，首頁都入唔到。
Steven好緊張
而Steven表示自己在門票開售前一晚都好緊張，畢竟第一次售票演唱會，所以開賣有咁好成績，佢頓時鬆一口氣。
成軍15年嘅BOYZ下月舉行處男售票騷，門票一開賣已被秒殺。
集體回憶
希望當晚入場嘅粉絲朋友，可以一齊集體回憶。Steven亦透露自己都收到好多訊息表示買唔到飛，奈何佢自己都幫唔到手。
很多粉絲在Kenny社交平台留言表示多謝各位粉絲朋友嘅支持，為BOYZ打左枝強心針。
