最佳人夫 鍾鎮濤 去到邊型到邊
撰文：東方新地｜圖片：新傳媒圖片庫、鍾鎮濤IG
鍾鎮濤 陪老婆shopping
話說中環置地靚人型人一向多，不過一眼望落去，都係撩牙都撩得有型過人嘅B哥哥最搶鏡。兩公婆約埋女性友人飲完咖啡、吹完水，女人吹水一發不可收捨，B哥哥亦唔介意陪坐，間唔中先發表吓意見，休休閒食完個tea，兩公婆就走去拍拖shopping享受吓二人世界。
做到去到邊型到邊嘅B哥哥竟然仲可以突破型之新境界，之唔係乖乖坐埋一邊畀老婆自己睇嘢，老婆睇啱，就自動波攞出銀包埋埋單，再主動拎埋個名牌大紙袋嗰下囉！男人有風度又錫老婆，邊個女人會唔讚B哥哥型先？
唔使開戲又唔使出埠登台，B哥哥放假第一時間陪老婆范姜。
先喺置地咖啡店約埋女性朋友吹吓水，相戀廿幾年，兩公婆出街依然會對望相視而笑，呢啲咪就係愛囉！
型佬即係型佬，食飽飽撩吓牙，都有台型過人。
一場嚟到，范姜睇吓名店有咩新貨，老婆買嘢坐埋一邊乖乖等、睇啱二話不說攞個銀包出嚟找數，B哥哥呢啲絕對係最佳人夫示範。
當年“表錯七日情”的組合….
鍾鎮濤 Kenny Bee（@bggkenny）分享的貼文 於 張貼
鍾鎮濤自認呷醋岳父 支持阿女入行
B哥向來是個與子女沒有代溝的好爸爸，為了捍衞家庭，B哥工作家庭兩兼顧。為了陪著子女成長，有時更會放棄賺錢，「我唔會為咗賺錢而放棄屋企人。盡量每年都可以同啲仔女去到五次旅行，帶細路去唔同地方見多啲唔同嘅嘢。所以每逢學校假期，我盡量唔會接嘢做。為咗仔女，事業有時都要有所犧牲，如果唔係我大可以去北京住，因為工作主要喺大陸，上去住可能更加幫到我事業。但係為咗陪佢哋我覺得值得。由入學開始，每次見家長、每甩一隻牙、每次睇醫生，我都跟得好足，都係一齊經歷，我冇錯過佢哋成長任何一樣嘢。有好多爸爸因為做嘢，會覺得做乜啲細路突然大咗咁多，佢哋miss咗好多嘢，但我唔會。」
買定樓做嫁妝
影相當日，B哥帶住二女鍾懿與細女鍾幗前來影樓，兩個囡囡與爸爸又錫，關係不言而喻，講到他日女兒要嫁人，B哥十個不情願，對於會否買定每人一層樓當嫁妝，B哥說:「最緊要養大佢哋，讀完書長大後生活基本嘅嘢已經準備晒，車、樓嗰啲基本需要冇問題，但我唔會買架法拉利畀佢哋。我絕對百分之百係呷醋岳父，最好就唔好嫁，陪我幾耐得幾耐啦！其實我要求好簡單，如果有人錫佢哋多過我錫佢哋，咁我就願意畀個女嫁喇！呢啲都係講笑，都係隨緣啦！」
父女檔上陣
四名子女當中，二女鍾懿的表演慾最強，亦遺傳了B哥的音樂天份，對於女兒想入行，B哥持開放態度，「鍾懿鍾意藝術，唱歌亦係最好嘅，佢想入行我一定幫，如果入演藝界會比一般人著數好多，成日都有人想斟佢，我唔係推，不過都係讀書為先，讀書先係對佢哋將來最有保障最有利。佢哋仲細，仲會變。」
「細女鍾幗呢三、四年都話想做科學家，唱歌都係玩吓，佢睇好多天文地理科學書，睇愛因斯坦呀，成日講嘅嘢我都聽唔明，佢最大機會做專業人士，四個仔女個個性格都唔同，你估仲係以前咩，要仔女繼承父業，佢哋鍾意做咩，我都會支持。做咩都好，希望佢哋唔好怕蝕底，呢樣嘢好重要，有時行多步理想達到。」
在B哥眼中，子女永遠是最優秀的，所以經常把他們掛在口邊，女兒的生日他一定會記得，如此痛錫子女，難怪仔女都爭住黐實呢個廿四孝爸爸啦！
自小跟住爸爸走埠與表演的鍾懿，見慣大場面，比起哥哥、姐姐及妹妹，她與B哥相處的時間最多，對於有個像超人無所不能的爸爸，鍾懿說：「好多人話好羨慕我有 個咁型嘅爸爸，話我爸爸唱歌叻、又可以同佢去咁多好靚嘅地方，仲有好多經驗，可以教我好多嘢。我覺得我爸爸最值得我學習嘅就係勇敢同正面。」有個好太太與四個乖仔女陪住走高山低谷，難怪B哥正能量爆燈。
鍾鎮濤：胡亂投資有風險
鍾鎮濤的人生故事，精彩得足以寫成自傳，當年與前妻章小蕙在市好時豪氣大手掃入多項豪宅，其後因金融風暴樓市急轉直下，一度坐擁數億元資產的B哥身家霎眼煙消雲散，更欠下2億元巨債申請破產，02年宣布破產。在財困時與章小蕙離婚，女友范姜素貞卻願意陪伴B哥度難關，4年的破產期不易過，B哥仍然保持樂觀心態，事過境遷感觸良多。
對於投資，B哥見過鬼怕黑，最大領會是絕對不要胡亂投資，他說：「理財方面，真係唔好亂投資，唔識嘅嘢真係唔好亂買。除非買樓啦！起碼有嚿實際嘅嘢喺度，我依家會投資番喺我自己熟嗰行，電影啦、音樂啦，合適嘅project都會投資少少，唔會擺晒成副身家、唔會百分百，係會參與少少。我鍾意唱歌、玩音樂同拍戲，依家會選擇性咁做，以前做仔，依家咪做人老竇囉，以前可以打，依家梗係打唔到啦！近年會去大陸拍電視劇，收入真係好好，佢哋好捨得畀錢，呢樣嘢係sure win。投資唔係一定有錢賺，一定有風險，但係投入自己時間拍電視劇最穩陣最有把握，賺硬，點解唔做呢？」
玩夠先退休
工作基地已轉移到內地的B哥，坦言自己就是最大的本錢，破產後大翻身，他全靠肯捱肯做，現時在國內開工作室、在港又投資千萬搞band房，保守估計一年接超過50場內地登台騷，再加上拍戲拍劇上綜藝節目，收入閒閒地過千萬。對於身家過億，B哥笑言多年來做騷賺唔少，投資的海外物業亦升值，不過仍要返去計計數先知。
破產令解除至今已12年，B哥倒賺過億身家，經濟上無憂，退休享福指日可待，他說：「依家我已經生活得好好，可以話隨時退休，都生活無憂，呢種生活可以維持到嘅。我有樓，不過唔喺香港，唱歌拍戲，一年唱幾十場，其實已經好唔錯，夠我退休。我個人生好豐盛，人到65歲，乜都經歷過，唔係起起落落，而係大起大落。好在呢一刻，我唔係埋怨緊、羨慕緊人哋，我個人心態幾好，唔需要大富大貴，可以養得起仔女、可以一年放幾次假，已經覺得自己喺好多人之上，已經唔錯啦！講番去以前，咪笑一笑囉！」
