鍾欣潼自揭飲花膠湯勁減5、6磅 為做至索新娘積極瘦身！
撰文：東方新地｜圖片：鍾欣潼ig、影片截圖
鍾欣潼曾體重急升
話說阿嬌嘅體質相比起阿SA其實較容易肥，2015年準備Twins演唱會時，阿嬌就曾因荷爾蒙失調問題及服藥因素，而導致體重急速上升。
而且小腿更係重災區，不過最後阿嬌之後都瘦番，但及後又因與當時仲係男朋友嘅賴弘國（Michael）蜜運，而令佢自爆體重回到113磅，變成「幸福肥」！
阿嬌隨後亦不時喺Instagram哂自己努力做運動嘅點滴，以證自己為身形而努力鐵證！
鍾欣潼自揭飲花膠湯勁減磅
然而，下個月20號就會同賴弘國喺香港擺酒嘅阿嬌，上月就喺IG上載一條名為「阿嬌婚前減肥日誌」嘅兩段短片，記錄自己衝刺減肥嘅過程！
阿嬌在片中透露自己依家用梗嘅減肥方法，就係以花膠湯調理身體同補充能量，只吃肉同菜，戒甜食及澱粉質食物，加上做運動，短短幾日已經減了5、6磅，效果顯著！
大爆自己現時體重
阿嬌更公開自己體重，見到目前係51.3kg，即約113磅，骨骼肌18kg，至於體脂就17.5kg，不過阿嬌嘅目標係45kg，即要以99磅弗爆身型成為賴太，結果企喺旁邊嘅教練即刻話「太瘦」！
大呻「唔得」嘅阿嬌仲緊張到用手比劃出婚紗嘅「蜂腰」，為咗做個最靚新娘，難怪佢立志要減多5至6kg！
有片睇！
阿嬌賴弘國今舉行簽字註冊儀式
阿嬌早前和台灣未婚夫賴弘國於美國舉行婚禮預演後，在周二（18日）二人在香港進行結婚註冊儀式，結婚註冊儀式邀請約近30名親友，見証人生重要時刻，包括英皇集團主席楊受成博士、英皇娛樂行政總裁集團許佩斯小姐、英皇娛樂行政總裁集團營運總裁霍汶希小姐，及英皇一班藝人包括：容祖兒、古巨基、蔡卓妍、關智斌、鄭希怡同老公梁學儲都一早到場。
阿嬌Deep V露背花裙艷光四射
儀式於下午近五點開始，阿嬌身穿粉紅色露背紗裙索到爆，與Michael宣讀完誓辭便交換結婚戒指，之後便情深一吻！及後一眾藝人更起哄同阿嬌講：「我唔捨得你嫁呀！」阿嬌隨即還擊：「我好想你哋嫁呀！」祖兒再話：「嫁出去嘅水等如潑出去嘅女。」開心到講錯嘢！
楊受成博士及Michael父親分別任阿嬌及賴弘國的證婚人，一對新人在眾人見證下簽紙。
賴弘國係個好爸爸？
早前，阿嬌孖住老公賴弘國一齊參加內地節目《爸媽學前班》，當問到佢有冇俾湊BB而嚇親，阿嬌就話：「又唔至於嘅，不過參加呢個節目令我同佢賺到啲一齊相處嘅時間！」期間，阿嬌仲大讚咁話好肯定老公將來可以做到一個好爸爸！
呻於酒店出事老公無反應
阿嬌之後更自爆早前喺武漢嘅酒店房中，遇上「畀鬼壓」搞到佢好驚，而老公知道後更特登提前趕到當地陪伴！阿嬌話：「佢本身都來睇演唱會，跟住知道後即趕搭高鐵嚟，不過佢喺我隔離都幫唔到，我郁到掂到佢都無反應，都救唔到我！」，但老公即刻趕嚟相信都已經夠哂窩心啦！
疑似鍾欣潼同母異父細妹曝光
鍾欣潼娘家一直有請家傭姐姐，因家傭姐姐已照顧阿嬌近20年，故對方可以話係睇住阿嬌大。日前，家傭姐姐要退休回鄉，阿嬌更特此出post表示自己嘅不捨之情，更po出與家傭姐姐嘅對話。
阿嬌更為家傭姐姐特登晒出與姐姐一齊合照嘅全家福相，見到相中有阿嬌、阿嬌媽咪同家傭姐姐外，見到仲有一位五官標緻嘅靚女，望落仲有同阿嬌有幾分相似！有網友就估該位靚女係阿嬌嘅同母異父嘅妹妹，則現年21歲的鍾芝茵。
由於阿嬌向來都好保護妹妹，無咩公開過妹妹個樣，其後阿嬌嘅經理人Mani亦表示相中人其實係阿嬌嘅表姐，才真相大白！不過，相信依家大家都知原來阿嬌個表姐同阿嬌一樣都係個靚女！
