星空下的仁醫｜鍾嘉欣為老公拒再拍咀戲出土Lin圖大放送

Nov 9 2021

鍾嘉欣（Linda）婚後移居加拿大淡出娛樂圈，只在《再創世紀》中客串，近日熱播劇集《星空下的仁醫》是鍾嘉欣婚後首套主演劇集，演技未有生疏，而且氣場更強勁，演繹多層次喊戲演得令人動容，被推為視后大熱﹗現以家庭為重的鍾嘉欣揚言為了老公拒拍咀戲及激情戲，性感打扮更加唔使諗，想睇嘉欣BB當年有幾索，重溫出道以來的索女相，原來更行過內衣騷，大量Linda美圖大放送﹗

文：東方新地｜圖：《後生仔等埋位》截圖、《星空下的仁醫》截圖、新傳媒圖片

鍾嘉欣接受《星空下的仁醫》飾演其徒弟的林正峰訪問，林正峰對住師傅表現驚青，但就成功令鍾嘉欣爆料，透露拍拖次數、初戀歲數及自揭主動 approach老公的細節﹗鍾嘉欣被林正峰要求講出後生仔流行的「自報status」時，大爆曾拍過三次拖故現時status是M3，鍾嘉欣大方講18歲初戀拍了兩年，並指自己跟前度都能成為朋友﹗林正峰突然切入問有否試過一夜情，Linda驚呼：「one night stand梗係冇啦﹗」

林正峰在《星空下的仁醫》飾演鍾嘉欣的徒弟，戲內戲外二人感情也不錯﹗（圖片來源：IG@niklas_lamcf）

鍾嘉欣冇被邀出席飯局：以前嘅我好cool

林正峰又問有冇試過被老闆邀請出席飯局，鍾嘉欣就答：「我喺呢個圈嘅弱點係太靜、內向同怕醜，但都成為我嘅長處，因為以前嘅我一cut機就好cool，冇人敢埋我身，好似有距離感咁﹗亦有機會我個樣、把聲同啲角色好溫柔，啲人唔會傷害我，所以咁耐以嚟未試過被人要求我做啲唔願意做嘅嘢﹗」

鍾嘉欣早前接受林正峰的《後生仔等埋位》訪問，大方指拍過三次拖，現時的sataus是M3。（圖片來源：《後生仔等埋位》截圖） — 鍾嘉欣早前接受林正峰的《後生仔等埋位》訪問，大方指拍過三次拖，現時的status是M3。（圖片來源：《後生仔等埋位》截圖）

林正峰再直接問Linda老公如何追求她？Linda爽快答：「佢冇approach我，係我approach佢不停問佢嘅喜好﹗我嗰時發現佢電話嘅wallpaper係佢家姐隻狗，同我一樣，我都係用家姐隻狗做電話wallpaper，然後我覺得我哋嘅緣份真係好得﹗」

鍾嘉欣：伸脷嗰啲千祈唔好﹗

鍾嘉欣又表示婚後唔抗拒幕前演出同拍劇，但為了老公現時會拒拍咀戲，Linda話：「雖然老公唔會呷醋，但佢唔會睇我啲親熱戲，佢唔想見到，所以依家我唔會再拍咀戲，錫手同臉珠可以嘅，伸脷嗰啲千祈唔好﹗」林正峰即問以前拍戲是否濕吻戲？Linda自爆原來一直抗拒拍濕吻戲：「以前有啲劇本寫明要嘅，但我冇伸過去囉，好驚，都唔好伸過嚟，嚇死我咩，我會走都走唔切﹗」