撇低仔女拍拖去睇波！鍾嘉欣孖老公上場館大電視
撰文：Kammy（原文刊於：Sunday Kiss) | 圖片：鍾嘉欣Instagram
鍾嘉欣激罕晒恩愛
現身處加拿大嘅鍾嘉欣獲邀去睇溫哥華嘅新年曲棍球賽事，佢就撇低一對仔女孖老公拍拖去睇比賽，同老公更出現喺場館嘅大電視，大會配以特寫及字幕「鍾嘉欣，藝人、2003年《溫哥華華裔小姐》及2004年《國際華裔小姐》冠軍」嚟介紹佢，而老公Jeremy就坐喺佢身邊！
嘉欣知道上電視之後就不停對住鏡頭揮手，不過佢就用咗個心心圖案遮住老公個樣，而第二張相仲係遠距離拍攝，圈住佢哋坐緊嘅位置，非常搞笑！
不過，正當以為嘉欣唔想老公上鏡，咁就錯喇！嘉欣其後上載同老公上電視嘅片段，片中佢好興奮做V字手勢，在旁嘅Jeremy亦笑晒口，仲同嘉欣深情對望，網民都大讚超級Sweet！
鍾嘉欣素顏陪女砌雪人
上年，34歲的鍾嘉欣為加拿大脊醫老公Jeremy Leung再誕下一仔，成功湊成個「好」字。鐘嘉欣去年於個人社交網上載幾張相，相中嘅嘉欣帶住眼鏡兼素顏Look陪囡囡Kelly用屋前嘅積雪砌小雪人，兩母女神情貫注，十分溫馨！而嘉欣更hashtag打”first snowman”，睇嚟今次應該係囡囡第一次砌雪人！
另一張嘅大屋隱約見到嘉欣老公同細仔原來喺屋內，而且老公Jeremy更喺屋內嘅窗邊睇住兩母女砌雪人。兩公婆分工合作湊仔女，相當合拍！
罕有與老公大放閃光彈
早前，嘉欣罕有大放閃光彈，大晒同老公合照。相中嘉欣就好似少女咁依偎著老公，並留言﹕「Sometimes simpler is better」，睇嚟嘉欣bb喺加拿大過得相當開心兼好享受當地嘅生活！
鍾嘉欣一家四口慶冬至
鍾嘉欣自從仔仔出世後有一段時間沒有更新Instagram，趁住昨日冬至，嘉欣上載2個仔女嘅合照向大家報告近況，其中她表示最近和老公一起專注於照顧兩個小朋友，並表示已經重投工作。
嘉欣一共上載4張相片，其中網民都話大女似足媽咪，細仔就似足爸爸！一家人基因超強勁！
令人動容的情書
好多媽媽喺一胎同二胎次間掙扎，除咗經濟考慮之外，仲會擔心自己嘅愛夠唔夠分畀兩個小朋友。新生第二胎嘅嘉欣，原來都曾經有過呢個諗法，不過母性係自然而發嘅，早前嘉欣望住Jared ，寫上一個封《給兒子的情書》，就將呢份疑慮一掃而空喇！
「Jared：在我遇見你之前，我擔心我的心沒有空間去愛另一個靈魂。 在擁有Kelly之後，我怎麼能愛另一個人呢？ 然而，在你出生後，我現在知道我有足夠的空間來愛你。 你把我的愛帶到了更高層次。 謝謝。Jared，我會珍惜你。」
囝囝真係似爸爸？
Jared出世之後，人人都話佢勁似爸爸！10月尾時嘉欣再PO出囝囝幾張萌照，真心覺得呢兩父子真係唔怕會失散呀！
爸爸係咁樣樣～
囝囝就係咁樣樣！（強烈懷疑影相時馬國明就喺Jared附近！唔係點會將天然呆表現到極致！）
鍾嘉欣產後首現身 坐月中零走樣
鍾嘉欣早前公布在家誕下細仔Jared Anthony Leung，而她有份客串拍攝的無綫新劇《再創世紀》今日舉行記者會，身在加拿大的嘉欣拍攝短片支持。片段中她透露自己是坐月中，偷偷地走出屋外拍片。而片段中的嘉欣相當精神，面尖尖身材亦完全沒有變胖，完全唔似啱啱生完！
鍾嘉欣在家產子
嘉欣喺錄音表示，囝囝Jared係個「大B」，一出世就好多頭髮。家人都話BB好似同家姐Kelly餅印一樣。自己今次選擇咗在家產子，得到專業嘅助產士支援，所以好安全咁生BB。成個生產過程，都好順利，絕對係畢生難忘的經歷。
囝囝超似爸爸
鍾嘉欣去年9月於Instagram 發佈相片，公佈自己囝囝出世喇！嘉欣表示囝囝重7磅14安士，樣子極似爸爸！嘉欣仲表示今胎係在家產子。恭喜曬嘉欣！
鍾嘉欣叫網友估BB性別
鍾嘉欣去年三月宣布再度有喜，不過一直都未公開BB性別。她在個人社交網上載一張摸住巨肚的相片，見到嘉欣於肚上畫上代表男嬰的粉藍色心心，及代表女嬰的粉紅色心心，並留言指老公唔想公開BB性別以作驚喜，但係佢等唔切，及想找出真相！仲問網友，BB係男仔定女仔？
鍾嘉欣晒床照宣布BB性別
鍾嘉欣日前叫大家估佢今呢胎係仔定女，今日就終於開估，見到佢肚上同樣有藍色心心，不過就少了一邊粉紅色心心，原來係想同大家宣布今胎係B仔！嘉欣留言：「JKL are happy to announce that we are expecting a baby boy!!!」「JKL」即係老公Jeremy、女兒Kelly同嘉欣Linda呀！
湊成一個「好」字
嘉欣喺社交網站上載幾張床上照，見到佢身穿短身上衣展示肚皮，擺出不同甫士，懷孕逾七個月依然肥胎不肥人。大量網民都留言恭喜嘉欣與老公湊成一個「好」字！
延伸閱讀：
星二代拜年大合集！謝安琪親子裝搶fo 梁詠琪混血女好靚女
每逢農曆新年，好多名人都會帶埋小朋友齊齊出動拜年，個個星二代換上賀年裝，真係喜慶十足！一齊嚟睇吓今年星二代嘅拜年裝扮啦！
原文刊於：Sundaykiss｜圖片來源：Instagram
