鍾仔「賭J」走數鬧上法庭 曼聯迷利物浦迷誓不兩立
廣告
無論你係球迷與否，相信都會知道英超兩大勁旅曼聯同利物浦向來係死敵，除了球隊喺場上鬥過你死我活，雙方球迷亦經常針鋒相對(利申：小編係曼迷)。而無綫劇《三個女人一個「因」》就將呢個情景搬到劇集中，劇中鍾仔(鍾志光)同仇人互鬧「曼狗」、「利狗」，又「賭J」俾人追數等，作為球迷真係非常有親切感…
撰文：東方新地｜ 圖片來源：TVB截圖
袁偉豪 林秀怡被撒陰司紙
上集劇情其中一段講到，袁偉豪同妹妹林秀怡離開律師樓，準備去食番碗「十記牛腩」時，突然被一班人對佢哋撒陰司紙，啲陰司紙仲要有晒佢哋全家的樣子，寫住「賭債肉償」、「男奸女殺」等字句，搞咩咁大鑊啊？
鍾仔「賭J」走數累事
返到屋企，發現原來係老竇利記(鍾志光飾) 賭輸波累事！話說鍾仔喺劇中係英超球隊利物浦的超級球迷，日日都著住印住愛隊的衫同帽，原來佢之前同人打賭，如果利物浦贏唔到就「自行切J(指男性生殖器)」、又下巴輕輕用埋自己屋企男丁條「J」做籌碼！點知利物浦真係輸咗，於是被人追佢找數！
鍾仔：「正一死人曼聯狗！」
邊個同鍾仔咁大仇口？就梗係利物浦世仇曼聯的球迷啦！鍾仔劇中有個曼聯迷仇家叫「曼三冠」(曼聯曾在1999年奪得三大冠軍)，咬住佢唔放，鍾仔都不禁大鬧：「正一係死人曼聯狗！」
仇人見面 份外眼紅
之後鍾仔同曼三冠(張漢斌飾) 鬧上法庭，曼三冠因喺論壇發起追數行動，被控「不誠實使用電腦罪」。仇人見面，份外眼紅，兩個人上到法庭一樣互相怒睥！
「走數仲要發爛渣嘅利狗！」
不過上到法庭唔代表可以和解，曼三冠一開始就話唔認罪，仲反咬鍾仔一口：「有罪嘅都係嗰啲賭輸波仲走數，仲要發爛渣嘅利狗！」
之後繼續講：「啲無品嘅球會，自然就出埋啲無品嘅球迷啦！」
Glory glory Man Utd…
喂大佬你估你喺酒吧講波咩，法庭並唔係表達球迷立場的地方，點知曼三冠完全無視法官，高呼「曼聯王朝千秋萬世，We’ ll never die！」然後振臂唱出曼聯會歌：「Glory glory Man Utd… 」結果就當然係被保安夾走。完。
關鍵詞
三個女人一個「因」
