野外步出2｜奶仔方紹聰變催淚大師 連環搞喊朱智賢 李君妍
撰文：東方新地 圖片：《野外步出2》官方發相、截圖
《野外步出2》第3集朱智賢行山
《野外步出2》一周只在J2台播出兩集，今晚(11月8日)播出的第3集請來朱智賢做嘉賓，同奶仔一齊挑戰人氣高級行山路線 -「鳳凰山虎吼石河」及「一線生機」，雖然山路非常難行，但硬淨的朱智賢絕對應付得到。
朱智賢當場灑淚
據知朱智賢與奶仔在傾心事一環，憶起往事一時感觸當場灑淚。去年4月朱智賢被揭與人夫黎振燁在車廂偷食蛋糕，幾乎令自己前途盡毀，好彩得到男友謝東閔原諒及支持，朱智賢才得以重生，經一事長一智，她非常珍惜現在的一切。不過，當奶仔希望她分享一件「最軟弱的事」時，朱智賢卻認為是養育17年的愛犬離世的一日：「我喺車，我抱住佢嗰一刻，佢慘叫嗰時，我喊到癲咗！當時我係慌到不得了，佢一嗌我就癲咗……我知道佢聽唔到、睇唔到，我捉實佢隻手，好想佢感受到我，因為我知道我作為佢嘅主人，我相信佢離開呢個世界最尾嗰一刻，要有佢最愛嘅主人陪喺佢身邊，我拖住佢隻手，睇住醫生幫佢打針。」而朱智賢亦非常後悔當日自己去了看電影，所以令愛犬痛苦多兩小時。
朱智賢談起自己的經歷與往事，當場灑淚。（圖片來源：《野外步出2》官方發相）
《野外步出2》第4集蔡嘉欣、李君妍打野戰
至於明晚(11月9日)播的第四集《野外步出2》，女嘉賓有蔡嘉欣與李君妍，奶仔笑言香港女仔除了最鍾意收花，仲好鍾意收兵，所以呢集就搵兩位女嘉賓一嚐當兵滋味，齊齊接受槍械、攻擊戰術及手榴彈訓練。打完野戰又例牌傾吓偈，李君妍回憶起婆婆的往事，在鏡頭前傷心流淚。
奶仔點解搞喊女嘉賓
奶仔唔止帶隊行山叻，催淚都有一手，他多次在節目中令女嘉賓講到喊，究竟有咩方法，奶仔說：「啲女嘉賓同我去活動相處咗成日，大家打開心窗說真話，加強咗信任度，佢哋好願意分享自己嘅內心說話，好容易一時感觸流淚，絕對係一個舒緩壓力嘅好方法。」
