鄭嘉穎48歲恨做老竇 助養港童學湊B

撰文：東方新地｜圖片：新傳媒圖片庫、陳凱琳IG

鄭嘉穎 仔女成群搶抱B

幾時都話愛情最講時機！入行25年的鄭嘉穎，14年因為一套無綫劇《殭》，同13年港姐冠軍陳凱琳戲假情真，拍拖兩個月已經急急公布情侶關係。下個月二人就拍拖三年，感情愈來越愈穩定、女朋友陳凱琳更榮升鄭嘉穎社交網絡發聲筒。日前就公開一張鄭嘉穎拖女相，鄭嘉穎一臉慈愛拖住約三歲的小妹妹在保良局兒童遊樂場玩耍，小妹妹紮紮跳開心到爆，至於配圖文字，Grace就話：「請支持保良局兒童助養計劃！」

互融社交圈

陳凱琳回應本刊解畫，原來鄭嘉穎愛心爆棚，獲邀擔任保良局兒童大使，除助養兒童仲會定期探訪：「其實張相係嘉穎助手影嘅，當日我都冇去現場。佢係助養兒童大使，所以每個月都會去探訪班小朋友，嗰日就陪佢哋去公園玩、又打波、又煮嘢食咁。我哋唔係一齊領養，但係我知嘉穎助養咗幾個小朋友，好錫佢哋，亦都出咗唔少錢畀佢哋讀書、令到佢哋有更好生活。我覺得件事好有意義好有愛心，都有興趣助養埋一份。」

齊認契仔

問到陳凱琳男朋友鄭嘉穎係咪恨結婚生仔恨到出面？Grace笑住話：「哈哈⋯⋯多謝先，咁我同佢都真係好鍾意小朋友，尤其係嘉穎，同賴慰玲囝囝上完契，又幫佢改咗名叫Marat，仲次次見親佢都搶住抱！」都係嗰句，鄭嘉穎有心有力，陳凱琳有仔趁嫩生啦！

兩年嫁得

大學同學、圈中好友一個二個嫁得出，陳凱琳亦不諱言希望兩年內可以結婚，剛過去的聖誕更帶埋男友鄭嘉穎一齊返加拿大拜見岳父岳母。而做完視帝離埋巢的鄭嘉穎，據悉家底豐厚，愛買磚頭投資，近年有心放慢事業腳步，轉移重心成家立室。