邱淑貞強調女兒唔想入行：高抬貴手啦
廣告
昔日性感女神邱淑貞 (豆斗) 的大女沈月愈大愈靚女，16歲已經長得極標緻，同媽媽十足餅印，兩姊妹一樣！沈月除了被電影公司、製作人吼實欲簽入娛樂圈，在社交網亦人氣高企，不過日前邱淑貞出席活動時，再次強調女兒並冇打算入娛樂圈，希望大家俾多啲私人空間佢；另外又唔反對女兒拍拖，不過要帶男朋友俾佢哋見！
撰文：東方新地｜圖片：東方新地、IG
邱淑貞長女沈月 愈大愈索
邱淑貞作為九十年代的性感女神，係唔少男士心目中完美的化身，其長女沈月生得亭亭玉立、氣質出眾，皮膚及標緻面孔都甚有媽媽的影子！沈月相當造型百變，時而清純、時而成熟 ；晒長腿又得跌膊又得，青春無敵認真冇得輸！
其中一次沈月化濃妝加上悉心打扮，一派成熟look和去灣仔參觀塞巴爾藝術展 (Art Basel)，佢上載咗好幾張相上社交網站，相中佢擺出模特兒甫士，當堂被網民大激讚「靚過啊媽」、「索到嘭嘭聲」！沈月每次有新相都大獲好評，於是令佢更加喜歡分享生活照！
猶記得去年郭富城與方媛喺半島酒店舉行婚禮，城城好友沈嘉偉及邱淑貞夫婦當然是座上賓，而沈月亦有跟隨父母出席。不得不提的是沈月呢晚以一身火紅運動裝配黑色低胸衫亮相，再戴埋副紅框黑超，輕易成為眾多嘉賓中最搶鏡的一個！
邱淑貞強調女兒唔想入娛樂圈
日前邱淑貞與老公沈嘉偉出席活動，久未露面的邱淑貞罕有接受訪問，更主動提起女兒沈月。邱淑貞強調女兒冇打算入娛樂圈，連佢自己本人都唔想入行，希望大家俾女兒多啲私人空間。
邱淑貞又稱原本沈月和時下年輕人一樣喜歡活躍於社交網站，閒時分享生活趣事，但現時其IG及微博都已經有一段長時間冇更新，就係唔想再被關注，希望大家「高抬貴手」。
唔反對女兒拍拖
作為女神的後裔，沈月依家亦係公認的「索爆星二代」，會唔會怕女兒身邊有太多狂風浪蝶？邱淑貞就話作為媽媽就係要教導女兒正確的事，而且依家係求學時期，幸好女兒們都好生性！ 而女兒去到呢個年紀，邱淑貞稱當然唔會反對拍拖，但如果女兒有拍拖的話，都希望佢會介紹男朋友俾佢哋識！
