家族資產過千億的霍啟剛，同老婆郭晶晶早前參加內地真人騷《極速前進》第三季節目。本來以為富三代唔慌會捱得，頂多玩一兩集會被淘汰，點知兩人過關斬將越戰越勇，竟然擊敗劉翔、吳建豪等勁敵，成為總冠軍！吐氣揚眉，一向怕醜嘅霍啟剛開心到當眾激咀郭晶晶，網友除咗欣賞霍大少溫柔體貼錫老婆，又大讚佢IQ、EQ極高，今次真係賺到錢又賺到人氣啦！

延伸閱讀︰

《嘩鬼上學去之農夫篇》五大爆笑位

吳若希驚爆同有米男友分手

霍啟剛郭晶晶由中國北京出發，去勻雅典、東京、慕尼黑、阿特蘭大、墨西哥城等10個曾經主辦過奧運的城市，尾站係今屆奧運地點巴西。總決賽得番三隊爭冠，霍啟剛郭晶晶擊敗劉翔隊同另一內地小鮮肉組合，成為第三季冠軍，睇得出兩人真係好開心，好有成功感！

決賽一站，三隊要進行多項挑戰，包括鬥快串巴西燒烤，與及同專業運動員比賽打沙灘足排。晶晶跳水就叻，但講到難度系數極高的足排，晶晶簡直無從入手，更不幸觸傷手腕舊患，要用紗布紮住上陣。好彩轉數高的啟剛識得搵機會令對方球員犯錯，終於成功領先另外兩隊。

去到決賽中後段，霍啟剛要挑選滑水，當日風高浪急，三隊代表都飲咗好多海水落肚，劉翔更放棄挑戰，寧願接受罰時兩個鐘！而霍啟剛就率先挑戰成功，仲型爆單手滑水，連甚少讚老公的晶晶都俾like！之後啟剛又同幾十名遊客大跳森巴舞，越玩越放；最後一個環節要搵出節目中曾經去過的國家的代表國旗，由於太難搵得齊，連鬥志超強的晶晶都一度放棄唔想搵，反而啟剛好有毅力，堅持到最後，終於俾佢哋搵齊兼第一個到終點！點估到貴為霍家大少爺的啟剛，原來咁捱得苦喎！

全文完