造美人｜十強誕生﹗OK姐、芷橋無得留低 OK姐寸嘴自辯
文：東方新地｜圖：《造美人》截圖
《造美人》兩位被淘汰
《造美人》今晚將進行第二輪淘汰，首先由主持強尼開場白：「你哋嚟唔係希望成為一個人哋心目中完美或者好靚嘅人，儘管好多人話你好靚，小部分人話你唔靚，咁係咪需要否定自己呢，呢個留番畀你哋思考。」
《造美人》OK姐、芷橋、Miko、Jonie最低分
強尼：「今日會有兩位參賽者喺我哋呢個比賽中離開，我會叫四個人名出嚟，呢四位係喺呢個camp入面分數最低﹗」先後叫出Miko、 OK姐、芷橋（劉芷橋）、 Jonie，強尼未曾宣布邊個被淘汰，Miko表現最激動，不停爆喊﹗
OK姐出局寸嘴做訪問
第二輪淘汰賽，OK姐同芷橋被foul出局。節目組安排多個單位令大家變靚啲，OK姐無盡力太Hea是死因，OK姐卻用一大堆歪理自辯，被指未有盡力去做運動令自己身形變靚，OK姐寸嘴話：「我唔想迫得自己咁緊，如其好辛苦做完運動，因為太辛苦返去食三個杯麵一個蛋糕，咁咪仲衰，所以我倒不如慢慢去做，唔好太緊﹗我想調整到一個舒適嘅心態去做﹗」
OK姐駁嘴駁舌唔認hea
之後被指儀容管理一直未有做好，OK姐就咁解釋：「其實我戴隱形眼鏡，對眼會好乾，我依家戴兩個鐘已經好辛苦，所以唔想戴﹗…我唔化妝係因為無理由出去兩個鐘，就專登化個妝囉﹗
OK姐強調自己有一直努力改變：「可能我嘅進步同變化太慢，所以你哋感覺唔到我有變﹗係你哋等唔到我改變啫﹗（咁要等到你幾時？）你哋都淘汰咗我咯，點解我要答你，咁係吖嘛﹗我邏輯好強，你哋都淘汰咗我，點解仲要問我要幾時﹗問得太奇怪﹗」OK姐的歪理令節目組以「唔同你爭辯﹗」索性中止訪問﹗OK姐仲覺得自己理據充足﹗
OK姐自爆只想搲贊助
有網民替OK姐不值，留言叫佢爭取多點出鏡機會，點知OK姐鬼拍後尾枕話：「我只想R專業團的技術幫我咋﹗」後來仲叫個網民「低調」﹗OK姐一心不在比賽，難怪全程Hea做，毫不投入，原來只係想搵贊助變靚，毫無鬥心更志不在此﹗
網民：OK姐冇樣叻，最叻講歪理﹗
網民對邊兩位被foul熱烈討論，大部分都認同應該淘汰OK姐同芷橋，對OK姐被foul仲寸嘴，網民留言「乜都姓懶，好快打回原形﹗」、「仲唔知自己衰乜，乜都有佢自己嘅理由﹗」、「冇樣叻，歪理佢最叻，做乜都唔會成功啦」、「芷橋控制唔到情緒，又無進步」、「一個喊到你煩，一個hea到你怕」、「芷橋 & Ok嘅樣同身材都可以改！腦筋應該改唔到嘞。」
三位主持狠批
而三位主持對參賽者評語時，沈殷怡對OK姐睇法：「佢仍然係好收埋自己﹗」娟姐則說：「覺得佢參加嘅心態係嚟學嘢，如果學到當然好，但咁樣對其餘女仔唔公平﹗」強尼亦話：「大家為佢做咗咁多嘢，但係感覺唔到佢落咗幾多功夫同努力落去做，我諗佢未到好渴求好想嗰種心態﹗」
