越級媾掂視后 張振朗降服胡定欣
外景返港後胡定欣不時露口風有人追，又話要停工互相了解，咁啱張振朗上月生日收到胡定欣蛋糕師好友設計的「展昭」造型蛋糕，又一齊去捧豹哥(單立文)豹嫂(胡蓓蔚)出騷，戀情見光後胡定欣例牌否認，不過就話唔介意姊弟戀，仲話同張振朗啱晒channel，唔閂後門合乎國情。張振朗唔止在事業上衝一線，感情上亦愈攀愈高端。
胡定欣 好友推波助瀾
圈中姊弟戀熱潮又再湧現，繼Stephy與王子認愛後，又傳出37歲胡定欣與31歲張振朗撻著，二人於3月為新劇《包青天》出發到橫店及新疆拍外景，一拍就50日，朝見口晚見面，相處後擦出愛火花。
去年未埋堆
據知開劇前胡定欣與張振朗從未合作過所以並不熟絡，不過張振朗與謝東閔是好兄弟，而謝東閔亦是「Crazy Runner」的成員，不時與胡定欣一齊去練跑，知情者透露：「Owen(張振朗)係個好有正能量嘅人，每次同佢合作都會好開心，去到橫店同新疆，除咗拍劇根本冇其他娛樂，佢就好識搞氣氛又會搵啲小玩意同劇組一齊玩，完全係開心果，就係咁樣就融化咗定欣喇！定欣同佢相處後覺得個人開心咗好多，佢哋仲會傾吓心事咁，好自然就日久生情。返到香港佢哋keep住有聯絡，Brian(謝東閔)同姚子羚亦鼓勵定欣唔需要顧慮咁多，最緊要係有感覺同開心。不過因為Owen同Apple(陳芷尤)分手冇耐，佢哋唔想惹人話柄，想慢慢了解多啲先，所以好多時出嚟都一大班人，定欣亦成日喺Owen IG留言，私底下都好sweet㗎！」
早前豹哥(單立文)開騷，豹嫂(胡蓓蔚)夫唱婦隨，成班「胡說八道」姊妹加「Crazy Runner」成員拉隊捧場，張振朗亦埋堆一齊影合照，為免露出愛的蛛絲馬跡，他與胡定欣企到離行離列，不過合照曝光後，張振朗的出現已令外界起疑心。
棄尤物追視后
張振朗近年上位如坐穿梭機，加入無綫六年由二打六做到男一，星途算是順暢，不過論演藝年資，與視后胡定欣仍有一定距離。張振朗與陳芷尤多年來一直以「好好朋友」互稱，拍拖多年已經去到同居階段，去年戀情更慢慢浮出水面、歐遊、見家長，男方探班仲探到去新加坡，仲以為轉入直路修成正果，點知今年4月張振朗與陳芷尤同一時間、同一個景點、同一段說話，仲煞有介事強調分手不涉及第三者，分別在個人IG公布分手消息，有指這段感情始終敵不過小花連環埋身，再加上張振朗事業起飛與女友相距愈來愈遠成分手導火線。
雖然成功令胡定欣暗裡著迷，但張振朗形象帶點花弗某程度上會令女方缺乏安全感，據知胡定欣為穩陣起見想觀察一段長時間，知情者透露：「定欣喺情路上真係經歷唔少，每次公開戀情都過唔到三年，都咪話唔信邪，今次佢真係想睇清楚先，唔想再受傷。始終Owen細佢6年，定欣真係想搵結婚對象，冇時間再玩玩吓，其實佢曾經講過再搵男友都要搵個好鍾意小朋友嘅，因為佢都想做媽咪，Owen係好鍾意小朋友，成日都會幫手湊佢兩個姪仔，定欣知道佢好享受家庭生活，直覺上唔會差得去邊，不過相處同磨合上仲要啲時間。」
姊弟戀有經驗
《宮心計2深宮計》早前播完，胡定欣人氣繼續飆升，投入舞台劇《偶然・徐志摩》後又馬 不停蹄飛去加拿大多倫多開演唱會，有愛情滋潤的她未見疲態，每次現身都春風滿面。對於與前度陳道明分手後Dry足兩年終開齋，胡定欣雖否認戀情，但仍忍唔住大讚張振朗：「吓！咁搞笑咁有趣，佢係好男仔嚟嘅。我以前都試過同細過我男仔拍拖，蘇師傅(蘇民峰)話我相學上好適宜搵年紀比自己輕嘅男仔，其實年齡相差大唔係問題，最重要係溝通得來。」談到跟張振朗合作《包青天》很開心，定欣大讚他有上進心，又承認二人傾得埋有共同話題，聲稱到了這個年紀不會挑剔太多。既然不抗拒姊弟戀，唯一嘅顧慮可能係女尊男卑，咁發展住地下情先，等張振朗做埋視帝，到時先公開門當戶對囉！不過馬國明輪咗咁耐都未到佢，張振朗應該要等吓喇！
橫店攻欣50日
二人先去橫店再去新疆，連拍50日外景日對夜對，張振朗、胡定欣、姚子羚與曹永廉等人經常嘻哈玩樂等埋位，睇得出眾人相處得好開心，而張振朗與胡定欣更是形影不離。
溫馨玩自拍
能夠得到視后歡心，張振朗當然有其過人之處，飾演「展昭」的他為氹胡定欣，不時主動撩玩自拍，而胡定欣亦玩得好開心，好受落。
蛋糕洩密
張振朗上月20日生日，晒出「展昭」造型蛋糕，負責製作的蛋糕師正是胡定欣好友，有指是她專誠訂製蛋糕送男方驚喜。
笑住出騷
胡定欣憑《深宮計》再創事業高峰，感情方面亦有著落，難怪心情靚爆，上周五(27日)出發去多倫多登台，胡定欣笑晒口現身機場。
與胡定欣同機的馬浚偉，未有等埋拍檔胡定欣，率先check in入禁區過關。
馬浚偉與胡定欣因劇集《深宮計》帶挈工作不斷，完成11場舞台劇《偶然・徐志摩》後，二人又飛多倫多搵真銀。今次是定欣首次在當地開騷，觀眾對她相當熱情，不時衝上台合照，主辦方更落重本，向無綫買版權做了一比一劇照人形紙牌讓觀眾影相。
皇上皇后完成一連兩場多倫多的演出🎤🤘🏽✌🏽 感謝每位前來捧場的朋友，我地唱得好開心，希望你地都聽得開心…期待好快再黎多倫多唱歌俾大家聽…See you next time!!~😘 @ma_chun_wai #avalonballroomtheatre #fallsview #concert
Nancy Wu 胡定欣（@nwuuu）分享的貼文 於 張貼
視后胡定欣首演舞台劇 飾陸小曼又唱又跳
舞台劇《偶然‧徐志摩》由馬浚偉自監自編自導自演自唱，2016年於香港首演，2017年於內地巡演，今次喺香港重演就邀得胡定欣飾演陸小曼一角，更有姜大衛、馮素波、黃澤鋒、李龍基、林敬剛等好戲之人參與演出。
《偶然 徐志摩》以徐志摩先生短短34年的一生作為主題，揉合其著作、人生觀，以及與他生命中三位重要的女人 – 張幼儀、林徽因及陸小曼之緣聚緣散，結合水袖舞、華爾茲、中國昆曲、多媒體投影等表演藝術元素，喺舞台上重現呢位才子嘅浪漫才情。定欣在劇中扮演的陸小曼，既擅長舞蹈又會唱崑曲。因為定欣本身有中國舞基礎，不嬲都係跳得之人，馬浚偉仲因此特地為定欣加插了一場獨舞，俾佢發揮所長添！
定欣喺自己Instagram上傳練習照片，又真係跳得有板有眼，幾好咁喎！
定欣喺劇中嘅水䄂舞表演都有成兩分鐘㗎！她就話要獨自練習，感覺似孤軍作戰。不過馬仔就大讚定欣悟性高，很快已學會，對她的演出很有信心。
就算喺橫店忙著拍劇之餘，定欣都不敢怠慢，盡量利用拍劇餘暇，參考資料熟讀劇本，務求綵排時能更快進入角色，仲乘機宣傳添！
籌備舞台劇期間，定欣不時都有喺社交平台度更新排練嘅照片，睇得出佢對今次公演都非常上心！
定欣第一次出演舞台劇，佢班「胡說八道」姊妹團梗係齊齊出席支持佢啦！除咗「胡說八道」姊妹團，其他圈中好友都有俾面出席，支持定欣同馬仔～
