基因強大 贏在起跑線！最索星二代逐個捉
撰文：東方新地｜圖片：新傳媒圖片庫、琦琦IG
關禮傑女兒 關楓馨
藝人關禮傑大女關楓馨（Fabienne）智慧與美貌並重，被問到會否參加選美，爸爸關禮傑就指要視乎女兒的意願，不過最好先完成學業。Fabienne又靚又叻，又有一個錫佢的男朋友，爸爸唔使擔心啦！
任達華琦琦囡囡 有43吋長腿
話說任達華同琦琦個獨女任晴佳。13歲女身高已經超過5呎7吋，眼大鼻高、樣子甜美，隨意一身白T、熱褲平底鞋，又pure又true。五官完全集合父母優良DNA，不過一對又直又長的43吋長腿，更加搶晒鏡！
年紀細寧推job
今次就話係客串玩票性質做一次暑期工model，其實天生咁嘅條件又有影帝爸爸同超模媽媽教路，唔行天橋唔做幕前，真係好浪費，華哥講到明代女推咗唔少job，當中仲包括有真人騷㖭，中港台都𥄫住呢位長腿星二代，雖然親手推咗唔少錢走，不過華哥話一啲都唔會手軟，全因為囡囡仲細，暫時唔考慮住咁話呀！大家死咗條心等多幾年先啦！
李嘉慧大女Valerie 高人一等
份屬琦琦同行、九十年代又係香港超模的李嘉慧婚後一生就係三個女，大女Valerie又係深得媽媽真傳，12歲已經腳長長高人一等，五官亦生得甜美。
甄子丹大女Jasmine 間尺腳
唔係只得名模至基因強勁，宇宙最強甄子丹同太太汪詩詩個14歲大女Jasmine都生得高䠷，還有一對筆直長腿。
陳奕迅女康堤高過媽咪
不得不提，陳奕迅同徐濠縈愛女陳康堤13歲女已經高過媽咪，氣質出眾還有時裝觸覺，絕對又係遺傳基因作崇。康堤著住同款風乾濕褸，好似孖妹，身形比例比阿媽更優勝。
仙氣林愷鈴 美腿吸睛
近年一眾明星的後裔備受關注，其中龔慈恩女兒林愷鈴 (Ashley) 今年只係18歲，身高1.73米，五官標緻身材均勻更有一對修長美腿，影相拍照有台型更有仙氣！
林愷鈴仙氣靚相吸人氣
得媽媽指點後識打扮識影相，更對自己外型愈來愈有信心，Ashley社交網終有大量高質仙氣靚相，比起當年在電視圈以氣質取勝的龔慈恩餅印得嚟更加青出於藍。
許紹雄囡囡 小性感
藝人許紹雄的女兒許惠菁（Charmaine）今年5月係佢21歲生日，不嬲愛錫女兒的許紹雄就當然同個女大搞生日派對，慶祝一番啦！當日派對上，除了有許紹雄一家人，佢哋兩公婆更邀請到圈中好友韓馬利、羅樂林及陳志健等人出席。而Charmaine當日就著上一條黑色低胸誘視裙，盡顯性感之餘，唔通想表達自己唔再係細路女？
剛剛踏入21歲嘅Charmaine，同爸爸媽媽溫馨合照，老竇許紹雄亦有留言祝賀愛女：「我女兒Charmaine，祝你生日快樂、身體健康！」
上山詩鈉女兒 Hilary
藝人上山詩鈉雖已年過半百，不過樣貌身材都保養得甚好，係圈中有名的「美魔女」。女兒Hilary完全遺傳到媽媽的美貌，小時候已經係十足的美人胚子，現時長大後更是散發陣陣仙氣，係公認的「至索星二代」！Hilary與媽媽感情要好，不時孖住出席公開場合，唔少人大讚佢哋似姊妹！
梁家輝大女 Nikkie
影帝梁家輝大女Nikkie有一雙水汪汪的大眼睛，笑容甜美，而且擁有魔鬼身材，IG已有兩萬幾followers！Nikkie長年在外國讀書，習慣了外國人較開放的風氣，早年曾上載性感露半球、夜店狂歡及攬啜友人等相片，不過事後極速刪除，相信係因為激嬲咗嚴父家輝！
Nikkie非常愛自拍，IG有大量自拍靚相，亦當然唔少得晒身材啦！
邱淑貞大女 沈月
邱淑貞(豆斗)作為九十年代的性感女神，係唔少男士心目中完美的化身，不過佢自1999年嫁俾時裝公司I.T.老闆沈嘉偉後就淡出幕前。豆斗結婚後替老公誕下三個女兒沈月、沈日及沈晨，其中長女沈月生得亭亭玉立、氣質出眾，皮膚及標緻面孔都甚母親的影子！雖然沈月平日多以淡妝或素顏示人，不過都足以睇到佢係個美人，相信過多幾年後能與母親匹敵！
苗僑偉女兒 苗彤
「三哥」苗僑偉與太太戚美珍兩人都是獨當一面的藝人，女兒苗彤便盡得兩人優良基因，五官精緻之餘，笑容相當迷人，唔少人都覺得佢有潛力加入娛樂圈！早年苗彤在著名學府英屬哥倫比亞大學 (UBC)畢業，三哥夫婦專誠飛到加拿大參加其畢業禮，幸福得羨煞旁人。苗彤讀書叻又靚女，贏晒！
王麗嘉愛晒奶
今年廿三歲嘅王麗嘉(Irisa)被外界稱為「王家最強基因」，無他嘅，皆因Irisa得父母優良DNA，擁有5尺11寸身高及標緻五官，而最令人留意嘅就緊係連老竇王敏德都多次投訴呀女太性感，經常晒嘅34D豐滿上圍啦！不過，鬼妹仔性格嘅Irisa就一於無理老竇，繼續多次晒奶！
近日，Irisa接受傳媒訪問，佢指自己15歲就去咗美國讀書，讀廣告畢業，因自覺自己唔適合坐喺office，仲話人愈大就愈鐘意面對鏡頭，所以大學返港後嘗試學媽咪做模特兒及時下流行嘅KOL工作。
對於獲外界指自己擁「王家最強基因」，Irisa就謙虛笑指其實得個樣似爹地，其他嘢就係一個mix，又話覺得爹地幾靚仔又夠幽默，而媽咪就會寵仔女多啲。
Irisa無論係驕人嘅上圍定9頭身比例超長腿，都令唔少人非常羨慕！不過，佢就表示唔覺自己平日好性感，而且對於外界對佢衣著或身材嘅評價，佢就覺得冇咩所謂，最緊要自己鐘意同舒服就夠！
王麗嘉斥香港人太保守
Irisa有咁火辣嘅身材，佢就指香港太保守，雖然自己一早就慣咗被街外人「掃」望，坦言因自己都幾高，但啲男人由佢胸口位勁近咁望，好似成世人未見過人有胸咁！
佢仲話如果香港係個太保守嘅社會，啲人應該唔好望！大概，Irisa係想大家唔好經常將注意力放咗落佢噴血嘅上圍上！
王麗嘉想做「縮胸」手術
事實上，原來Irisa有諗過做「縮胸」手術，因認為有時著衫會唔靚，又寒背咁，但佢就指會等日後科技好啲先去做，因為唔想留條疤痕喺身上！咁大家第日咪冇嘢睇？
經常漏奶嘅Irisa更指自己因上圍大過一般人，所以想設計泳衣俾啲身材比例唔似普通人嘅人著，就好似佢咁。原來Irisa係搵唔啱適合自己嘅泳衣，先會不經意咁露出半球，咁大家就體諒一下啦！
