賴弘國晒與阿嬌地鐵「合照」被笑 阿Sa搞笑留言！
賴弘國晒與阿嬌地鐵「合照」被笑
賴弘國（Michael）近日就嚟咗香港，更喺個人社交網上載與阿嬌嘅合照，不過就唔係同真人，而係同阿嬌嘅廣告相合照，Michael更冧爆留言：「巧遇港鐵女神」仲tag埋老婆添！阿嬌見到亦都秒回老公：「hahahhahaaa」！
阿Sa搞笑留言
個個網友睇見佢兩個隔空甜蜜留言都話好閃，然而阿嬌好姊妹阿Sa就反而搞笑留言，指正賴弘國文法上嘅錯誤，話應該係「港鐵巧遇女神」先啱！
另一方面，距離香港婚禮仲有十幾日，阿嬌依然努力不懈繼續地獄式減肥計劃，日前更喺個人社交網上載自己嘅減肥餐，不過好彩都有有魚有肉，飲食均衡，相信阿嬌一定可以成功瘦身！
鍾欣潼曾體重急升
話說阿嬌嘅體質相比起阿SA其實較容易肥，2015年準備Twins演唱會時，阿嬌就曾因荷爾蒙失調問題及服藥因素，而導致體重急速上升。
而且小腿更係重災區，不過最後阿嬌之後都瘦番，但及後又因與當時仲係男朋友嘅賴弘國（Michael）蜜運，而令佢自爆體重回到113磅，變成「幸福肥」！
阿嬌隨後亦不時喺Instagram哂自己努力做運動嘅點滴，以證自己為身形而努力鐵證！
鍾欣潼自揭飲花膠湯勁減磅
然而，下個月20號就會同賴弘國喺香港擺酒嘅阿嬌最近就喺IG上載一條名為「阿嬌婚前減肥日誌」嘅兩段短片，記錄自己衝刺減肥嘅過程！
阿嬌在片中透露自己依家用梗嘅減肥方法，就係以花膠湯調理身體同補充能量，只吃肉同菜，戒甜食及澱粉質食物，加上做運動，短短幾日已經減了5、6磅，效果顯著！
大爆自己現時體重
阿嬌更公開自己體重，見到目前係51.3kg，即約113磅，骨骼肌18kg，至於體脂就17.5kg，不過阿嬌嘅目標係45kg，即要以99磅弗爆身型成為賴太，結果企喺旁邊嘅教練即刻話「太瘦」！
大呻「唔得」嘅阿嬌仲緊張到用手比劃出婚紗嘅「蜂腰」，為咗做個最靚新娘，難怪佢立志要減多5至6kg！
有片睇！
鍾欣潼於港擺酒準備成點？
鍾欣潼早前宣布將於12月20日於香港擺酒，宴請親朋好友，出席活動時，阿嬌透露依家正準備印喜帖：「已經發咗啲電子喜帖俾朋友，因為怕太遲嘅話，佢哋會抽唔到時間，但都會實體咁補上喜帖。」
賴弘國係個好爸爸？
最近，阿嬌孖住老公賴弘國一齊參加內地節目《爸媽學前班》，當問到佢有冇俾湊BB而嚇親，阿嬌就話：「又唔至於嘅，不過參加呢個節目令我同佢賺到啲一齊相處嘅時間！」期間，阿嬌仲大讚咁話好肯定老公將來可以做到一個好爸爸！
呻於酒店出事老公無反應
阿嬌之後更自爆早前喺武漢嘅酒店房中，遇上「畀鬼壓」搞到佢好驚，而老公知道後更特登提前趕到當地陪伴！阿嬌話：「佢本身都來睇演唱會，跟住知道後即趕搭高鐵嚟，不過佢喺我隔離都幫唔到，我郁到掂到佢都無反應，都救唔到我！」，但老公即刻趕嚟相信都已經夠哂窩心啦！
疑似鍾欣潼同母異父細妹曝光
鍾欣潼娘家一直有請家傭姐姐，因家傭姐姐已照顧阿嬌近20年，故對方可以話係睇住阿嬌大。日前，家傭姐姐要退休回鄉，阿嬌更特此出post表示自己嘅不捨之情，更po出與家傭姐姐嘅對話。
阿嬌更為家傭姐姐特登晒出與姐姐一齊合照嘅全家福相，見到相中有阿嬌、阿嬌媽咪同家傭姐姐外，見到仲有一位五官標緻嘅靚女，望落仲有同阿嬌有幾分相似！有網友就估該位靚女係阿嬌嘅同母異父嘅妹妹，則現年21歲的鍾芝茵。
由於阿嬌向來都好保護妹妹，無咩公開過妹妹個樣，其後阿嬌嘅經理人Mani亦表示相中人其實係阿嬌嘅表姐，才真相大白！不過，相信依家大家都知原來阿嬌個表姐同阿嬌一樣都係個靚女！
鍾欣潼主動發文求關注
日前，鍾欣潼（阿嬌）喺微博公開留言：「孟非老師你好，我是你的死忠粉絲阿嬌，鍾欣潼，能互相關注一下嗎？」由於阿嬌好直接咁喺微博主動發文要求關注，所以令唔少網友都唔敢相信，以為阿嬌俾人偷咗帳號嚟用！
否認被盗帳號
有見及此，阿嬌過咗一陣都再次留言，指自己並冇被盗帳號，解釋咁做嘅原因係最快同最容易可以接觸到孟非老師！
其後，阿嬌仲有啲尷尬咁留言：「老師，不好意思，冒昧的要求把你拉出來了！」仲話已經私訊咗孟非兼等梗對方回覆！阿嬌呢個求關注嘅行為就好似一個小粉絲，認真搞笑！
孟非是誰？
同大家介紹番阿嬌求關注嘅孟非是何許人啦！其實孟非係內地一位知名主持人，以其標誌性嘅光頭形象深入民心，加上口才了得，佢所主持嘅內地節目《南京零距離》更成為當地收視率最高同埋當時全國廣告價格最高嘅電視新聞節目，非常了得！
