賈曉晨狂晒近一歲囡囡正面照網友：好似公仔咁得意！

賈曉晨狂晒近一歲囡囡正面照

賈曉晨（JJ）與老公向好少公開囡囡正面照，自小飯兜出世後，兩公婆都係只喺一家三口嘅全家福度公開呀女正面一次咁多！除此以外，兩公婆都絕少放出小飯兜正面相俾大家睇，皆因全部相都用圖案遮住囡囡個樣。

最近，JJ就一改以往作風，不斷喺個人社交網po出多張小飯兜嘅相，罕有見到囡囡就快一歲嘅正面。從相中可見，小飯兜同父母一樣有對大大嘅眼睛，望落皮膚仲白白滑滑咁！

之後JJ再上載帶呀女出去玩嘅相，見到小飯兜著上厚厚嘅大毛毛外衣，對又圓又大嘅眼仔反而最搶鏡，望落非常可愛，好似一個小小模特兒！

唔少網友睇到小飯兜就嚟一歲嘅樣都大讚呀女個樣好萌，仲好似個洋娃娃！唔知大家又點睇呢？

從賈曉晨擺上網啲相睇得到，小飯兜個樣甚得父母真傳，對眼又圓又大，眼仔碌碌咁，十分精靈！加上下巴尖尖咁，相信第日長大之後都會係一個靚女！

賈曉晨更留言：「親愛的寶貝，我們的小飯兜，從你出生、一周、滿月、百天、到現在半歲，媽咪時時刻刻陪着你，就怕錯過你成長的每一秒鐘，今天你半歲生日了，媽媽要跟大家一起分享這份快樂！希望寶貝身體棒棒的，每天快快樂樂，長大也是個樂觀快樂又聰明的好孩子。」

事實上，賈曉晨之前都有擺囡囡啲相上網，但就唔係正臉。例如有一次，佢就只影愛女嘅半邊面，仲留言話好羨慕小飯兜長長嘅眼睫毛～

2016年，樊少皇與賈曉晨結婚。上年11月，賈曉晨就喺香港養和醫院誕下囡囡「小飯兜」，期後兩公婆一直都冇公開女兒嘅正臉，甚為秘密。

囡囡滿月，樊少皇同賈曉晨都冇俾小飯兜出鏡。

早前JJ公開「小飯兜」企喺BB床上煲熱爆劇《延禧攻略》嘅片段，「小飯兜」仲邊睇邊扭屁股跳舞，勁cute！

但有好多網友都質疑JJ將「小飯兜」擺得離電視太近，容易傷害BB眼睛，令佢有散光！

不過JJ都好快留言回覆網友：「就看了一會兒，關掉了」

賈曉晨(JJ)當媽媽後，不時在網上分享湊女之日常，呢日佢就晒出一張抱住囡囡「小飯兜」食嘢相，相中見JJ一邊食雞翼，另一隻手就抱住囡囡餵佢飲奶，不愧係力王嫂！JJ就話：「練就了一身好本領，又當爹又當媽系列@樊少皇」

關鍵詞