38歲的譚凱琪宣佈婚訊！曾與丁子高拍拖
少婦聯盟譚凱琪 下嫁餐廳老闆
現年38歲的譚凱琪，出道初期曾與丁子高拍拖，但兩人早於2002年已分手。2012年，她認識餐廳少東莊日宇（Enrico），拍拖8年，今日（20日）再社交媒體上宣佈已婚：「風雨同路，風雨不改，牽著你手，直到永遠。一瞬間已八年了，我們即將往人生另外一個階段進發，期待與您往後的約定！」
譚凱琪 堅拒婚後收山
入行17年的譚凱琪，由小室哲哉徒弟做到無綫花旦，一直以來野心不大新聞也不多，有傳富二代男友莊日宇為她購入九龍塘帝景峰豪宅築愛巢，又將旗下餐廳股份轉到她名下，譚凱琪堅拒婚後收山:「演戲令我有存在感搵到自己嘅方向，好多人話我性格唔適合呢個圈，我只係想做番自己，其實我已經aggressive(進取)咗。雖然我好重視家庭生活，但結咗婚未有小朋友都會繼續打拚。男友好支持我做呢行，傳聞話佢畀間餐廳我打骰，no! 完全唔係，經濟上我哋非常之獨立，你見我仲拍劇就知道唔係真。」
譚凱琪笑言好彩有家姐:「兩邊屋企人都冇畀壓力要我哋結婚生仔，好彩家姐已經有兩個小朋友，我就順其自然啦！去到嗰個階段自然會做嗰個階段嘅嘢。」
電視圈近年女團當道，早年有佘詩曼為首的「七魔女」，後有胡杏兒領軍的「胡說八道會」，不過最炙手可熱的可算是「少婦聯盟」。陳凱琳(Grace)、龔嘉欣(Katy)、譚凱琪(Zoie)、沈卓盈(Jessie)戲裡戲外更成為好友，friend到成立閨蜜團「少婦聯盟」，而佢哋近排喜事重重，繼之前陳凱琳添丁，依家到沈卓盈結婚，相信喜事隆續有來，恭喜晒喇！
《踩過界》形體藝術家
Zoie在2017年《踩過界》其中一個單元有突破戲份，飾演形體藝術家，表現時被男人帶色情眼光看她及有猥瑣行為，於是自衛還擊令男子受傷，劇情中她被控告襲擊他人身體。
《不懂撒嬌的女人》女強人被融化、露全背
2016年 Zoie在《不懂撒嬌的女人》中飾演失婚OL Annie， 育有一個兒子「蝦米仔」，幾經辛苦等到上位做總經理，但就要忍痛放棄兒子的撫養權。 幸好有張達倫飾演的Oscar開解佢，劇集後段，張達倫對兩母子的溫柔成功令Zoie感到被愛，深受感動，於是兩人情不自禁，於海旁熱吻，咀咀咀！
鏡頭一轉，只見兩人剝光豬瞓喺床度，關係進展得十分快！
張達倫情深望住Zoie，而呢個moment，觀眾都十分情深…..望住Zoie的玉背 ！又白又滑，十分誘惑！再一次證明唔識得撒嬌唔緊要，性感一樣好煞食！
性感形象深入民心 《致命復活》、《EU》索爆
Zoie都唔係第一次於劇集展示性感一面，喺《致命復活》同《EU超時任務》中同樣引起觀眾回響！
先講《致命復活》，Zoie有查案的戲份，換上比堅尼泳衣大騷fit爆身材曬太陽，你以爲已經好噴血？接下來佢被死對頭何雁詩將其比堅尼上衣個扣解開咗，剛剛瞓醒的Zoie懵然不知，坐起身伸個懶腰，咩都俾人睇晒，秀出白滑玉背！
《EU超時任務》細細粒Zoie正到戴耀明「動L」
而《EU超時任務》中，飾演記者水晶梨的Zoie為咗查案深入虎穴，換上一身性感黑色短裙色誘戴耀明，中晒美人計的戴耀明即被迷得一陣陣。之後Zoie坐佢隔離時，佢直頭進入忘我狀態！有眼利網民發現戴耀明下體離奇激凸，成條褲撐到勁高，連「小耀明」都交足戲！戴耀明就急急澄清只係條褲摺咗，大家又信唔信呢？
相關囍訊：沈卓盈去年傳婚訊 巴黎婚照曝光
沈卓盈早前離巢工作咗十多年的無綫，立即宣佈婚訊，仲公開同老公Calvin嘅甜蜜浪漫婚照㖭，恭喜晒！沈卓盈喺IG上載婚紗照並留言：「從不期望驚天動地的愛情，只求細水長流的甜蜜。不知不覺間原來我們的緣份源於十年前的一面，可是種子並沒有在那一刻萌芽。猶幸上帝的安排、緣份的牽引，令我們在四年前的那一天再次重遇，讓彼此加深了解，一起學習，一起成長，再一同走向人生的新一頁，成為相依相伴的伴侶。❤」
據知二人喺上年年尾去咗巴黎和英國影結婚相，當然唔少得喺巴黎鐵塔下留倩影，非常浪漫！
沈卓盈接受傳媒訪問透露男友上年年中求婚，過程開心又浪漫！而佢好鍾意法國及英國，所以婚照都喺呢兩個地方影，佢仲話暫時以工作為先，對生BB佢話講緣份。
沈卓盈 男友管接送
34歲的沈卓盈擁有女人夢寐以求的S形身材，多年來外界指她無寶不落，舊愛全是非富則貴，沈卓盈要為自己平反:「拍拖好正常，係每個人生活嘅一部分，只係外界經常過分放大我嘅感情生活，忽略咗我都有畀心機工作，演好每一 部劇。我啲家姐24歲就結婚生仔，所以我自小就對愛情有憧憬，曾經渴望22至24歲就嫁人，希望有個幸福家庭，但依家我覺得緣份最重要，有啱嘅人我會試，唔得亦唔會勉強。」
男友Calvin家族從事內衣生意，對住男友甚有原則的沈卓盈，就快可以打開幸福之門。她說:「現階段我同男友都有共識，行到最後一步就睇時機，佢求婚我先諗啦！女人幾叻都好，最終都係要搵個好歸宿support自己。男友已經去到一個地步唔需要經我就約我啲家姐食飯，連我3歲嘅姨甥女都好鍾意佢，搞到我呷醋。」
