譚俊彥 楊凱博《特技人》再續父子緣 網民：「二百年後再一起」
撰文：東方新地｜圖片：劇照、TVB劇集截圖
譚俊彥 楊凱博《特技人》再演父子
TVB新劇《特技人》於剛過去的星期一首播，劇集以特技人為主題夠新穎，譚俊彥及朱晨麗呢對組合亦夠晒新鮮，兩人更會為觀眾呈演多場汽車特技場面，都幾令人期待！其中唔少觀眾留意到譚俊彥和小演員楊凱博，係繼之前《天命》飾演嘉慶皇帝和太子綿寧兩父子後，今次在劇中又係演兩仔爺～
楊凱博寸爆老竇譚俊彥
呢對劇中父子確係幾有火花，喺第一集初段已經交足戲，劇情講到凱博為正喺車房工作的譚俊彥送飯，兩仔爺的互動十分抵死，凱博仲寸到老竇冇聲出！
譚俊彥大呻連續三日都係食鐘點女工煮的通心粉，超級難頂，凱博竟然話：「你請蚊姐(鐘點女工) 係照顧我，你想食好啲就搵個女人啦！」
之後兩父子講講吓仲突然「過番兩招」，其實現實中凱博真係識功夫㗎！下文繼續話你知！
《天命》皇帝與太子
無幾耐之前先大結局的《天命》中，譚俊彥及楊凱博都係做兩仔爺，分別飾演嘉慶皇帝和太子綿寧，不過兩人的互動都比較嚴肅，唔及《特技人》中咁過癮！譚俊彥接受傳媒訪問時，就直言同凱博確係默契十足，兩個人拍《特技人》時一齊生活咗幾個月，又一齊打功夫，佢透露之後會有更多兩父子的情節！
楊凱博真人幾靚仔㗎！
《城寨英雄》童年陳展鵬
唔知大家仲記唔記得楊凱博有份演過早年大熱劇《城寨英雄》？《城寨》第一集劇情講述朝猛山(陳展鵬分飾)與段通天(袁偉豪分飾)同為八極門高手，二人不打不相識，合作對付惡霸。其中小演員楊凱博飾演朝猛山的兒子朝陽(即童年陳展鵬)，年紀小小但外表俊朗，而且有一身好功夫，令人難忘！
之後劇情講到，楊凱博逃出後想折返救父母，便叫妹妹在炮台處等候，自己跑回家。但發現眾人已經離開，而且四出搜尋自己及妹妹，凱博只好重返炮台打算帶妹妹走。
保險廣告成經典
小演員楊凱博的演出經驗不少，不過最令人難忘當然係呢個2012年的保險廣告！佢在廣告中戴住眼鏡好可愛，而且表情趣緻地講出︰「乜嘢叫保險呀？」輕易令人留下深刻印象！
使出真功夫
而另一個廣告版本中，楊凱博的對白係︰「做警察唔使打功夫。」佢仲喺廣告中露番兩手，有姿勢有實際！原來凱博真係識功夫，師承香港著名武術運動員李暉，曾經喺兒童武術比賽中獲獎。難怪凱博之前喺《城寨英雄》耍功夫都甚有功架！唔知劇集之後仲有冇機會見到佢使出真功夫呢？
延伸閱讀：
黃子華《金盆𠺘口》尾聲鳴謝故事合輯
