再做老竇 湊個好字！謝天華 晒B女相報喜
廣告
謝天華05年就同圈外女友李天恩(Tina)結婚，2014年Tina以42歲高齡懷孕生咗個仔謝浩飛(小天天)，今年4月，天華就喺微博宣布太太再度懷孕，天天好快做哥哥！而早前Laughing喺宣傳新戲嘅時候，還透露太太第二胎陀女。今日謝天華就在其社交網貼B女照報喜，湊成個「好」字，恭喜晒呀！
謝天華 晒B女相報喜
51歲謝天華再做老竇喇！佢喺社交網晒出B女嘅相報喜，並留言：「Hello 我來了。先跟大家打個招呼！我叫 Mia 體重 2.88kg （6磅5安士）願各位哥哥姐姐 身體健康。 妹妹 MIA。 」
見謝天華抱實囡囡，父愛出晒嚟！
謝天華4月宣布 太太再度懷孕
謝天華在4月時，於微博貼出一張超聲波圖片，佢好開心咁留言話：「今年將會迎接家裏的新成員，感恩感恩天天要做哥哥了也辛苦了媽媽。」
謝太高齡再懷孕會好辛苦，所以最後天華不忘寫上「I love u」送俾老婆，抵讚！
早前謝天華同陳小春、鄭伊健、錢嘉樂同林曉峰宣傳佢哋主演嘅新片《黃金兄弟》時，公佈BB性別：「係開心事嚟嘅！嚟緊屋企會再多個新成員，今次係粉紅色嘅！」即係囡囡，湊成個「好」字，囝囝天天好快就會多個妹妹喇，恭喜晒！
今年父親節，Tina送上印有天天和老公合照的水杯做禮物，睇相真係好sweet好冧，天天也長大不少，好可愛！
