許凱寫錯粉絲名被網民嘲笑自行罰抄補獲！

許凱寫錯粉絲名被網民嘲笑

《延禧攻略》令一眾劇中演員人氣急升，雖然劇集經已播完，但亦無阻演員趁機食埋個尾水。日前，飾演富察傅恒嘅許凱就搞咗個簽名會，吸引咗大批粉絲撐場，不過就因寫錯粉絲名而成為熱話！

有一名署名「麻辣燙」嘅粉絲喺社交網上載一張許凱親筆簽名嘅相，上款本應寫「麻辣燙」，但許凱竟然寫到「辣」字冇了一半，「燙」就變成「湯」，三個字都寫錯兩個，今次傅恒都幾失威！

其後，該粉絲仲大爆許凱叫自己將字補一下：「他說，你自己補一下吧！我們懂的。他在那個辣字，卡了有一分多鐘，你看看那筆跡就能看出他的急迫，我們很努力教了，他說你們誰倒是給我打一個啊！然後，沒人理，最後，寫了湯，火要我自己補。這是甚麼天才啊。」

不過事後許凱都有反醒自己嘅過錯，仲自己罰抄「麻辣燙」三字，之後上載罰抄紙喺微博，認真搞笑！相信日後許凱都會銘記呢三個字點寫！

早排「傅恒」許凱來到香港，出席商場活動時用廣東話話：「中秋節快樂！我愛你哋！」台下尖叫聲不絕，而許凱仲同吳謹言耳語，原來現場教授佢用廣東話講：「大家好，中秋節快樂，多謝你哋！」真係識做！

吳謹言同許凱亦合唱，仲同現場觀眾玩遊戲，吳謹言又餵粉絲食湯丸，好親民友善！

許凱到達香港落機時，被指冷待粉絲唔收佢哋嘅禮物兼全程黑面，呢日佢出席商場活動時解畫兼鞠躬道歉：「下機的時候還是被拍醒了，所以太矇，甚麼反應都做不過來，真的對不起。」佢又話錫fans都嚟唔切，只係近來經常四圍飛四出宣傳，身心疲倦，加上有啲唔舒服同喉嚨痛，絕對唔係耍大牌！

講到最近與內地女演員白鹿合演古裝劇《招搖》而傳緋聞，許凱更被影到到女方屋企過夜，他否認：「大家在網上怎麼說，自己控制不到，就不去講了，現在集中工作上，沒有考慮戀愛。」許凱指自己現時單身，但卻不接受姊弟戀。

高顏值小鮮肉許凱喺《延禧攻略》中飾演與女主角魏瓔珞（吳謹言飾）曖昧嘅富察傅恒，因為呢部劇集擄獲唔少各年齡層女性嘅心，仲人氣急升成為一線小生，被封「最帥侍衛」！

其實許凱唔單止有顏值，演技亦都有返咁上下，充份詮釋到傅恆成熟穩重、足智多謀嘅個性，更被《延禧攻略》嘅製作人于正稱讚係「眼技戲骨」！

于正就話佢眼神憂鬱，特別撩人，大家又覺唔覺呢？

劇中嘅傅性大部分時間都Cool到爆，卻有特別嘅魅力！對其他女人都冷若冰霜，唯獨對女主角魏瓔珞會展開笑容，傅恆深情嘅形象令唔少觀眾都好受落啊！

許凱真係可以話係天生為了古裝而生嘅男人！雖然年輕嘅佢今年先23歲，但天生高大有型，加上一雙濃密劍眉、立體深邃嘅五官，令佢就算著起官服、剃咗光頭都份外有英氣！

許凱被網民大讚擁有星眉劍目，絕招係「側臉殺」！

據聞，許凱仲十分敬業，為咗好好詮釋傅恆呢個角色所以決定提前入劇組讀本，就算要剃光頭都毫不在意！

許凱喺2013年參加中國模特兒大賽，18歲仔就身高181公分，勇奪全國平面組軍，理所當然以模特兒身分出道。

平時許凱鍾意行運動潮流風為主，又鍾意健身！

劇內包到實一實，但原來平時許凱除低戲服係爆肌型男！！！

2017年，許凱搭檔女演員白鹿主演古裝仙俠劇《招搖》，點知戲假情真，兩人喺現實生活保持情侶關係，一直交往到依家！

人紅是非多，許凱今年二月被前女友、內地網紅「大金」踢爆疑似家暴事件！雖然被指係炒作，但大金都係企硬！

事情愈滾愈大，令許凱嘅經理人公司要出聲明維護返許凱。

但係討論度愈嚟愈高嘅時候，許凱竟然出文承認自己曾經係「壞男生」！

究竟現實中嘅許凱係咪同劇中嘅深情傅恆判若兩人呢？呢啲嘢就好難講啦！小編都係繼續煲劇算啦～

關鍵詞