偷食偷上癮？ 藝人裕美驚爆背男友撻著林作
撰文：東方新地｜圖片：Instagram、新傳媒圖片庫
偷食藝人黃子恆搞婚外情 裕美：「搞緊離婚。」
「Yamete~Yamete~搭錯車!」一聽到呢句歌詞真係好多回憶浮現出來，歌手和田裕美2014年嫁畀教友老公林恩浩，自此淡出娛樂圈，好一段日子冇在公開場合露面。不過裕美冇見一排後索咗勁多，下巴尖一尖，以前包包面離奇消失，唔講你真係未必認到佢呀！人妻愈變愈索，連感情生活都愈來愈精采，有報道指佢背夫偷食無綫藝人黃子恆，兩人齊齊去街市買餸返屋企煮飯仔，裕美之後更在男方屋企過夜！
有報道指裕美與吳若希過氣緋聞男友黃子恆關係匪淺，兩人齊到街市買餸，期間男方更主動攬實女方腰！親蜜關係不言而喻。兩人買完餸後就返到男方位於西貢的村屋，兩人夾手夾腳準備晚飯，猶如新婚夫妻般甜蜜，最後裕美更留低過夜！
對此裕美就表示當日係假期，所以一大班人開大食會，同行亦有其他幕後人員。一行人大約在八、九點離開，佢並沒有留低過夜。佢又話自己正拍攝劇集《心理追兇》，雖然同劇沒有黃子恆，不過自己好多嘢唔識，要向對方請教。最後佢話唔會理其他人點講，正如有人話佢整容一樣，佢唔會去理。
之後被問到老公會否介意，裕美就驚爆已經搞緊離婚！佢話自己已單身半年以上，現在辦離婚手續，不過就唔回答是否出現第三者，只係話兩人性格出現問題，曾經試過挽救呢段婚姻，但最終都係解決不了。裕美話剛剛簽咗新經理人，會拍劇重新出發。
裕美撻著有米外藉男友
事業愛情兩得意的裕美單拖遊街，去到藥房門口研究一陣買吓零食入吓貨。話說今年就滿30歲，裕美頭髮長咗、上圍又豐滿咗，多咗唔少女人味之餘，有愛情滋潤後人都靚咗，腰間其實亦都多咗小小肉地，呢啲唔通就係幸福肥？
據知，裕美男友Alex係英意混血兒，家住半山豪宅，身家豐厚而且事業有成，曾在一間大型私人銀行任投資工作，現在是本地一間外語學校的創瓣人。
裕美驚爆背男友搭上林作
有人透露裕美同麥明詩前男友林作喺舊年拍攝時認識，林作見到裕美即刻起晒痰仲主動撩傾偈。裕美亦主動交換電話同IG兼主動msg林作，顯得好合拍。有指二人曖昧一年，裕美上個月請林作做直播嘉賓時撻著，林作仲話要同裕美表白，嚇到裕美好驚畀男友見到。
林作喺直播時對著鏡頭講：「我今晚上嚟係想教大家一堂課，叫橫刀奪愛！」仲話阿媽教佢遇到鍾意嘅嘢就去搶，嘩講得咁明顯，係咪姐係想喺人手上搶裕美返嚟呢？點知林作竟然直接叫裕美同男朋友分手添！
林作仲喺社交網站發出一張同裕美嘅合照，嘟起個嘴仔，寫道：「我喜歡妳#放心沒有人信」。裕美就唔知係甜笑定係尷尬笑喇……
林作喺社交網仲寫：「我嘅女友美美。」有指「美美」就係林作對裕美嘅暱稱。
被指秘撻裕美，林作都有出Post回應，不過一方面又要做得咁出面，另一方面又澄清，真係好矛盾啊！
