被傳有喜 李嘉欣：恭喜我肥咗？
廣告
早前被傳再度有喜，李嘉欣今日穿花裙及3吋高踭鞋現身活動，記者上前恭喜佢，嘉欣否認：「唔係，恭喜我肥咗？(係咪有BB？)唔知點解會咁傳，大家多心咗。(想唔想追個女？)見到人啲女cute嘅就想，不過隨緣啦。(老公想唔想追多個？)佢零興趣，最無所謂，當初話冇小朋友都得，都唔會悶。」
問到仔仔Jayden想唔想要細佬妹，嘉欣笑言：「佢係特別嘅case嚟，佢好擔心有人分薄咗我，佢唔乖時我會同佢講話如果有乖嘅BB就好喇，咁講佢會好緊張，會乖番。我啲朋友話我唔應該咁講，冇理由咁講，好過份。(佢好依賴你？)佢係個生活上好獨立嘅男仔，但係如果見到我抱住其他BB或者聽到都會覺得好威脅。」
