袁文傑深情唱〈追〉再送花 女友張潔蓮感動落淚
袁文傑憑霸氣「游生」爆紅
今年46歲的袁文傑喺亞視打滾多年，直至去年在無綫大熱劇《不懂撒嬌的女人》中，憑住霸氣「游生」一角爆紅！袁文傑隨即工作機會大增，劇接劇、廣告接廣告，呢位身高188cm的型男成為風雲人物，無綫甚至邀請埋佢講波！
袁文傑張潔蓮拍拖七年
袁文傑爆紅，連帶其感情生活都備受注目，亦係呢個時候大家先知佢有個拍拖七年的女朋友，而且呢位靚女大家都認識，就係1995年落選港姐、人稱「Jackeline姐姐」的前無綫兒童節目主持張潔蓮！型男配靚女，襯到絕～
袁文傑張潔蓮 鍾意對方有愛心
袁文傑同Jackeline喺日前的《1+1的深情》擔任嘉賓，兩人都係黑白打扮襯到絕，言行舉止流露住甜蜜。主持阿田問到兩人到底鍾意對方啲咩，袁文傑同Jackeline同樣都係答「有愛心！」
對方有咩缺點呢？
好啦問完鍾意對方啲咩，都要問埋佢哋覺得對方有咩缺點呢？Jackeline就覺得袁文傑有時候個人太靜，而袁文傑就覺得女朋友有啲小朋友，唔夠成熟！
透露相識經過
那些年袁文傑同Jackeline分屬唔同電視台，到底佢哋係點認識呢？袁文傑就笑說係非常老套的情節，事緣佢認識Jackeline的妹妹車車在先，車車打算將袁文傑介紹俾家姐識，於是將Jackeline的照片send俾袁文傑。Jackeline姐姐咁靚女，游生當然心動！
拍拖七年未送過花
另外阿田又問到袁文傑有無做過一啲甜蜜舉動冧女朋友，但原來佢拍拖七年都未送過俾Jackeline！袁文傑好疑惑又壓低聲量咁話：「好似係你講過唔係必須送花…」Jackeline隨即回應：「必須㗎！」
袁文傑深情唱〈追〉
好啦既然一束花都未送過，呢晚袁文傑就為Jackeline送上驚喜！當晚喺中環摩天輪附近拍攝時，袁文傑突然出現喺一部流動展覽車上，在Live Band伴奏下深情唱出張國榮名曲〈追〉。雖然唔係話唱得好好聽，不過情深款款又有感情，Jackeline當然又驚又喜！
Jackeline姐姐感動落淚
聽多幾句，Jackeline仲忍唔住流下幸福的眼淚！
等了七年的玫瑰
拍拖七年都無送過一束花又真係差緊啲，袁文傑唱完〈追〉後向Jackeline送上一大紥玫瑰花，兩人再深情攬攬，成個畫面真係好感動！
