【1+1+1】剖白再婚的原因！蘇永康：要做女人最大後盾！
撰文：Kammy｜圖片來源：節目截圖、Instagram
蘇永康 曾經歷婚姻失敗
現年51歲嘅歌手蘇永康，喺遇上Anita之前，曾經有過一段婚姻，佢喺1999年同圈外女朋友、來自新加坡嘅馮麗清（Jane Foong）結婚，不過呢段婚姻亦喺2003年告終。
克服對婚姻的恐懼
經歷過一次婚姻失敗，蘇永康都曾經坦言根本冇再婚嘅打算，直到遇上Anita改變咗佢嘅一生，二人於2014年結婚，更於婚後3年誕下囝囝Jazz。
喺節目《1+1+1》中，蘇永康就透露原來陳奕迅同徐濠縈係佢哋嘅紅娘！因為蘇永康就係喺陳奕迅嘅婚禮上認識現任太太Anita，第一眼見到Anita時「覺得感覺唔錯」，當日仲同Anita形影不離，仲笑言「當時連仲係小朋友嘅劉浩龍都睇得出（想追Anita），陳奕迅同徐濠縈都知道，蘇永康要做嘢喇」。
蘇永康：骨子裏覺得婚姻係成立
曾經經歷婚姻失敗，蘇永康坦言自己冇打算再婚，當時仲同年近30歲嘅Anita講「如果你要搵結婚對象，我諗我唔係」。不過，Anita最終都決定要同蘇永康發展，結果拍拖六年後，蘇永康克服咗對婚姻嘅恐懼，決定迎娶Anita。
主持人車婉婉聽完之後，話Anita令蘇永康克服咗對婚姻嘅恐懼，而蘇永康就覺得自己依然相信「婚姻」呢件事，「儘管我第一次係失敗，但我骨子裏覺得婚姻係成立」，又指因為對方係對的人，生活上夾得嚟又冇畀壓力自己，所以決定要再婚。
蘇永康不反對囝囝做音樂
2017年，蘇永康以50歲之齡榮升做爸爸。被問到點解突然間想要小朋友，蘇永康表示，因為太太想要小朋友，但礙於二人年紀已經唔細，所以當時設咗兩年期限，經過中醫調理後，二人最終一索得男，誕下可愛囝囝Jazz。
唔少藝人都會反對自己嘅小朋友去加入演藝圈，正如蘇永康嘅爸爸當初都反對自己做音樂。不過，蘇永康就認為，音樂呢樣嘢係「唔可能唔喜歡」，仲話如果將來佢要一個自在嘅空間，而呢個空間係音樂先畀到佢，自己係冇理由反對佢。
老婆踢爆蘇永康求婚趣事
問到蘇永康究竟點樣向Anita求婚，Anita指當時係一個日本嘅Family Trip，點知蘇永康喺旅行期間突然話要返去換衫，仲冇啦啦有埋擴音器去餐廳度，當時Anita都估到蘇永康應該有所行動。雖然Anita指蘇永康一早露出馬腳，個人又唔係咁浪漫，但蘇永康最終都求婚成功！
Anita欣賞蘇永康孝順
蘇永康同Anita被問到對方有咩優點，兩個都不約而同地指欣賞對方孝順，Anita仲指蘇永康係一個好好嘅聆聽者，佢會願意提出問題並會從中作分析，而且好欣賞蘇永康會願意花時間喺囝囝度，令佢覺得好感動。
蘇永康一句話感動太太
要做一個在職媽媽並唔係一件容易嘅事，因為要兼顧工作同家庭兩方面，特別Anita要經常到外地工作，令佢覺得要時間分配得妥當係十分困難。不過，蘇永康就曾經同Anita講過：「如果工作得好辛苦，可以停低休息下。」雖然只係簡單一句話，但已經令到Anita好感動，因為佢好感受到老公對自己嘅支持。
蘇永康就認為男人要做女人最大嘅後盾，「就係當女人覺得攰嘅時候，張開雙臂攬住佢」，令對方可以成個人依靠自己，畀對方知道有啲咩事都好都有人支持佢，真係好Sweet呀！
Anita：佢見到阿仔就好開心
因為Anita想要小朋友佢哋兩公婆先決定生，但Anita就直言，自己都冇諗過原來生咗小朋友之後係咁開心，特別係感受到蘇永康同囝囝之間嘅喜悅，佢一見到Jazz就好開心。
生小朋友後溝通得更多
有人認為，生咗小朋友之後就會將成副心機放晒喺囝囝身上，令夫妻間嘅溝通減少。不過，對於蘇永康兩公婆嚟講，生咗小朋友之後反而令彼此間溝通有增無減，會更敢言，而且完全信任對方。蘇永康又指，作為老公要細心聆聽對方嘅說話，並且了解太太嘅情況，到底對方係想聽意見定係搵人傾訴。
蘇永康樂做湊仔公 帶埋老婆親自孭仔去⋯⋯
50歲的蘇永康，同老婆結婚三年多，去年成功追個慈姑椗，眨吓眼囝囝Jazz已經一歲大，以往鍾意蒲的他已變成住家男，開完工即歸心似箭撲返屋企，湊仔大過天。據身邊好友透露：「因為康嫂好鍾意小朋友，結婚之後好努力想快啲有BB，終於上年如願以償，仲生個慈姑椗，阿公 (蘇永康) 都畀囝囝溶化埋，平日cool到爆，冇諗過佢會落手落腳湊仔，成日搶住抱個仔不特止，連出街都係自己孭住阿仔行街，成個湊仔公咁！唔會乜都旨意晒老婆！」
星級好友爭住抱
自認唔靚仔的蘇永康，曾經表示好彩阿仔似媽咪多啲，咁囝囝對眼精靈，而且肥嘟嘟頭大大可愛到暈，一班星級好友都對Jazz愛不釋手。據知情者透露：「自從囝囝出世，阿公屋企真係多咗好多歡樂，班好朋友成日 約埋去佢屋企睇B，圍埋就係講仔女經好熱鬧，因為Jazz好少扭計，又唔怕陌生人，個個都好鍾意同佢玩！」
狂掃20分鐘
為畀家人有個安樂窩，入行多年一直無置業嘅蘇永康，今年一月豪掟2,830萬購入北角雲峰大廈，新居仍在裝修中。兩公婆都係時裝精，日前又再出動購物，不過，當日一家三口出巡唔係去掃大人名牌時裝，反而去咗名牌BB時裝店林立的利園睇BB衫，只見兩公婆入到一間BB時裝店，唔夠20分鐘已經掃咗大堆BB衫畀囝囝，買嘢畀阿仔毫不手軟。
日前蘇永康一家三口又同大班星級朋友聚會，仲有謝𩃀鋒做大廚！
BB仲遺傳咗蘇永康嘅音樂才華！慈父蘇永康仲好感性咁話：「對於孩子來說任何的物質其實只是很表面的東西⋯『陪伴』才是最重要！」
蘇永康 晒標緻B仔
去年3月B仔出世，蘇永康初次做爸爸，佢話佢媽媽最開心，可能係因為呢個家庭第一個孫。阿公仲話老友陳奕迅已經幫BB改咗名做「蘇爵士」！原來老婆生嗰陣，佢陪住老婆入去準備待產，期間舉住部機一直拍，仲話剪臍帶嗰陣都冇緊張，不過就覺得自己好似拍緊《妙手仁心》 咁，都係一個一世難忘經歷！佢仲話唔會再有第二次啦，因為唔打算生第二個。至於對阿仔嘅期望，蘇永康話只希望個囝生生性性、聽教聽話、健康快樂。
父愛爆棚
抱住囝囝嘅阿公真係同平時好唔一樣，充滿父愛！
