藐爆李佳芯 胡定欣撐宣萱攞視后
廣告
被喻為是台慶頒奬禮前哨戰的新加坡《星和無綫電視大奬 》，賽前一直係視后大熱的胡定欣最後輸畀《踩過界》中只係做女二的李佳芯 (Ali)，唔單止網民鬧爆，大熱倒灶的胡定欣都藐爆未夠班的Ali。定欣自知已經攞咗兩屆視后，今次在《萬千星輝頒奬禮》贏面不大，故寧願棄奬都搵齊班胡説八道會好姊妹到時投票，撐同樣係大熱的宣萱做視后！
李佳芯爆冷贏視后
《星和無綫電視大獎》中，李佳芯 (Ali)撼低胡定欣田蕊妮等前輩奪視后，令人大跌眼鏡，連佢上到台都忍唔住問句「點解嘅」，話以為搞錯咗，真係幾諷刺！最後要頒奬嘉賓陳展鵬黎耀祥幫口打圓場。
定欣叫姊妹撐宣萱
今次盛裝出席的大熱胡定欣，更加認為Ali未夠班，輸得唔服氣！據知定欣一路睇好返TVB拍咗兩部劇的宣萱，覺得對方演技夠出色，兩個角色都入晒屋，完全冇諗過會係Ali攞視后，講資歷，佢班好姊妹黃智雯同姚子羚都未攞到。據知佢已經同班好姊妹講好，嚟緊台慶頒奬禮唔使投票畀佢，反而叫佢哋投畀宣萱。呢啲咪識英雄重英雄囉！
宣萱回巢人氣高企
10年拍罷《飛虎》，宣萱離開無綫五年，直至去年先被無綫助理總經理杜之克邀請回巢拍劇救收視，兩部劇《不懂撒嬌的女人》和《使徒行者2》都叫好叫座，尤其《不懂撒嬌》Mall姐真係好多人鍾意！有演技又受歡迎，大有機會問鼎今屆台慶視后！
宣萱：定欣攞我都開心！
早在1999年攞過封后的宣萱，對於今年再次成為視后大熱，佢表示以平常心對待：「有獎就開心，冇就繼續拍一些自己喜歡嘅劇集，拍劇唔係為攞奬，過程享受同開心最重要，攞獎唔代表最好，只係鼓勵性質，其實我最喜歡鮑姐，定欣都很好，所以邊個攞都無所謂，一樣開心！」
