蕭正楠等做老竇 36歲翠如減產趕生狗仔
廣告
蕭正楠與黃翠如拍拖三年，近日不斷傳出好事近，就連好兄弟曹永廉亦爆響口話蕭正楠：「結咗婚係唔同啲！」令已婚傳聞甚囂塵上。剛踏入36歲的翠如知道蕭正楠恨做老竇，唔想做高齡產婦，一於減產等孕到，希望在明年生狗BB！日前翠如無去新加坡出席星和頒獎禮，在港出席完活動又即換上平底鞋，同好姊妹唐詩詠出街由對方做司機之餘，行超市仲緊張護肚！唔通雙囍臨門？
蕭正楠 翠如 趕生B
早前蕭正楠與黃翠如完成手頭上工作向公司請假外遊，去過日本與英國等地，盛傳已在外地註冊，不過回港後例牌否認，翠如還說笑表示要認真考慮一下向蕭正楠求婚。一直有指翠如BB事業心重，唔想收山做人妻，想在事業上搏殺多幾年，但時間唔等人，已經36歲的翠如與蕭正楠都鍾意小朋友，最近亦有意生B，希望出年狗年生個狗B，並由Edwin就負責努力工作擔起頭家！
翠如BB緊張護肚
早前翠如出席完活動，本來穿上4吋高踭鞋的翠如BB完場即換上平底涼鞋，之後駕車去清水灣半島接好姊妹唐詩詠，見面後即讓出司機位，等詩詠負責做司機。二人前往將軍澳超市，翠如全程拎住手機狂傾，詩詠負責揀哈蜜瓜與蛋糕，其時超市人來人往，只見翠如曾出手護住腹部位置。據知翠如跟詩詠情同姊妹，約定將來有子女都會互相上契！
蕭正楠再次否認已婚
早前本刊捕獲翠如與蕭正楠雙雙步出華景山莊愛巢，向來非常大方的翠如，見到記者在場突然與蕭正楠保持距離，蕭企定定即場接受訪問時，但翠如就離奇地彈到勁遠閃人！蕭公子先係再次否認兩人已婚：「佢 (曹永廉)真係口不擇言，我話咗佢！搞到個個都以為真，好多客戶打去公司話要贊助我哋。多謝晒咁多客戶同朋友畀面啦！但時機仲未到。」
蕭正楠唔撐女友做視后
另外提到翠如今年奪視后呼聲高，蕭公子就話翠如喺TVB日子尚短，仍然係學習中，但認為佢喺《使徒行者2》的確有好大進步：「佢演呢啲傻大姐夠晒入型入格，因為佢真係傻架嘛！演番自己就搞掂晒！」但同視后仲有一段距離。
翠如BB承認會減產
翠如BB日前出席活動，接受本刊訪問時承認來年會減產：「係！係想停一停嘅！有一啲其他嘢都想，想做啲慈善嘅嘢！」不過就表示未諗有BB後會唔會停工湊B。至於被問到認為自己與蕭公子會唔會係一對師職的父母，翠如表示真係幻想唔到，亦未見過蕭公子同小朋友相處，所以真係唔知！
