萬千星輝頒獎典禮2023｜上位小花宣傳照眼袋浮現 炎明熹晚裝被指似潔廁刷
TVB頒獎禮宣傳照 繼續玩P圖
同往年相比，TVB發布宣傳照出來的效果依然是唔合格，多張宣傳照都被P到與背景格格不入，非常奇怪！似乎玩「P圖」已經成為一年一度的指定動作！騎呢程度更勝從前！
重溫2022年騎呢宣傳照：汪明荃P到好似飲醉酒 羅毓儀變「凌空」？
重溫2022年宣傳照，大部分照片都出現偏紅的情況，特別以汪明荃的宣傳照為例，身穿一身高貴晚裝裙的汪阿姐，塊面卻被P到好似飲醉酒一樣。部分女藝人更因為姿勢問題，搞到出來的效果變得非常滑稽，例如羅毓儀就成個人「凌空」咗。
2023年宣傳照仲破格：游嘉欣眼袋浮現 炎明熹晚裝似潔廁刷！
除此之外，個別女藝人的造型都「出事」，以「A0女神」游嘉欣的宣傳照為例，面色泛黃，仲有眼袋浮現，未知是否妝容累事，似足10日冇瞓過覺咁，相當顯老！而另一位今屆「女飛躍」大熱的何沛珈就有明顯色差問題，面容偏黑、下身偏白，髮型亦較其他女藝人老土，認真扣分！至於炎明熹早前「蝴蝶」遮胸亮相大騷夠晒搶眼，今次宣傳照以一身白色晚裝示人，不過其設計就被網友嘲似潔廁刷！更離奇是《聲夢傳奇》出身的潘靜文雖然冇服裝災難，但就疑似「黑面」，難道是得罪了揀相的小編？
傅嘉莉劉穎鏇玩長腿放題 做「養眼擔當」
今日發布靚相以「女飛躍」大合照最為搶焦，當中亦有養眼擔當！長腿女神劉穎鏇、戴祖儀、傅嘉莉以高貴晚裝上陣兼鬥晒美腿外，陳楨怡的低胸透視露腰裝亦別具美感。傅嘉莉穿上性感戰衣，其坐姿更疑似露出神秘三角，非常誘人！她表示：「我都希望今年可以攞埋最佳衣著獎，我到時會著得好閃耀。」戴祖儀則搞笑爆料指遭父親「睇死」：「我絕對冇諗過我會陪跑架，話我會陪跑嗰個係我爸爸咋，今年我覺得有信心嘅，因為《香港人》個角色我自己落咗好多苦功，都好慶幸劇集出街時都獲得咗好評。」
而今年先後憑《廉政狙擊》及《新聞女王》的突破性演出贏盡關注的陳楨怡，透露其實一直有默默受訓為挑戰打女路線做準備：「我一星期有 Train 兩次劍術，同理古裝通常都有打劍動作，學咗一定有好處。」
《聲夢》學員大合照企正C位
另外在「最具潛質新人」宣傳照，有網友發現唔少《聲夢》學員炎明熹、冼靖峰、黃奕斌企正C位，似足群星拱照《聲夢》，地位明顯高啲！有份爭獎的詹天文受訪感激粉絲落足力支持：「好感動，佢哋凌晨時分都仲投緊票。」
憑《亞洲超星團》人氣攀升不少的黃星綽及文佐匡不約而同透露透過參與《超星團》節目拍攝經歷很多兼成長不少。「東張女神」陳懿德則選擇以搞笑的「自爆年齡系列」路線拉票：「其他參賽者細過我好多，我尾班車，希望大家可以投票畀我支持吓。」
李佳芯1原因自我放棄拒爭獎
2023最佳主持方面，所有候選女星都盡情展現自己靚靚一面，參與場刊拍攝。陳庭欣和麥美恩都穿著低胸紅裙，展示出迷人的事業線。然而，李佳芯（Ali）作為即將合約到期的藝人，卻選擇了沿用在《萬千星輝賀台慶2023》時所穿的掛頸七彩長裙做宣傳照，沒額外準備戰衣上陣，似是自我放棄的感覺。
已憑《無窮之路》系列兩度勇奪「最佳女主持」的陳貝兒，今年再憑《無窮》系列入圍「女主持」十強，對此貝兒坦言《無窮》系列帶給她無限美好回憶，並謂對於能否再攞獎要隨緣：「之前兩年都有攞到獎，今年再入十強非常開心。嗰兩個獎我一直放喺客廳當眼處，激勵自己繼續努力，已經好開心同好滿足。」
至於去年單拖為台慶頒獎禮擔任主持並贏盡掌聲的周奕瑋，由於本身專業又有功架，加上過去一年先後主持了不同類型的綜藝節目，不但令他成為今年「男主持」頂頭大熱，更入圍「男飛躍」最後十強，對此周奕瑋謙稱很意外：「冇諗過仲可以（入圍）飛躍（10 強），今年算係非常豐收嘅一年，我睇番入圍名單，原來自己過去一年做咗咁多唔同類型嘅嘢。」
至於現為娛樂新聞台主播之一的許文軒，與周奕瑋一樣同時入圍「男主持」及「男飛躍」十強，對此許文軒笑言「入圍當贏咗」：「有本場刊永遠記錄低呢件事，仲要換咗兩套衫喎，我覺得自己已經攞咗獎。」
