華姐余思霆 林宣妤加盟 TVB終於有新面孔
女一未得觀眾心
TVB近年瘋狂捧女藝人，特別係香港小姐出身嘅藝人，好似新一代小花陳凱琳、蔡思貝等被上頭欽點力谷上位，頻頻開劇做女一，但係出鏡機會多就唔代表演技好嘅，仲可能會有反效果。佢兩個係咁擔正做女主角，不斷俾人批評演技爛仲要係咁捧，觀眾緣愈來愈差……
翠如BB 主持好過拍劇
另一個老是常出現嘅無綫女藝員就係黃翠如，旅遊節目出身嘅佢做主持就真係幾好睇嘅，但係演戲啦喎…不過係無綫缺人嘅情況之下，黃翠如都有幾多劇擔正做女主角，近日有《幕後玩家》同《我瞞結婚了》等。雖然演技飽受批評，不過你有你批評，黃翠如就繼續出現喺幕前。
華姐冠亞軍加盟
不過大家唔使擔心之後仲要不停睇同樣嘅人演出啦！因為最近有兩個新面孔加入TVB，同陳凱琳、蔡思貝一樣係冠亞軍，佢哋就係今年國際中華小姐冠亞軍余思霆同林宣妤啦！
陽光紐約女孩余思霆
來自紐約嘅余思霆（Stitch）有着健康膚色及豐滿身材，加上陽光燦爛的笑容，如同一個活潑可愛嘅美國女孩！喺今年國際中華小姐決賽第二環節中，眾佳麗穿上代表自己城市嘅服飾，Stitch戴上頭飾、手持火把扮演自由神像，再加上性感低胸裝及甜美笑容，令人難忘！Stitch最終力壓林宣妤及馮盈盈成為國際中華小姐冠軍！
余思霆 《Big Big Channel》開工
芳齡22歲嘅Stitch原來算係半個台妹，佢喺台灣花蓮出生後移居美國，去年贏得美國華裔小姐冠軍，代表紐約出戰國際中華小姐。原來Stitch早在三年前已經參加過紐約華裔小姐，可惜當時落選，故今年再接再勵參選，更成為當地嘅四料冠軍！佢都曾經講過要成為出色的演員或主持，而家加入TVB，早前《Big Big Channel》發布會已經有佢份，希望可以帶嚟一番新氣象啦！
仙氣逼人賽前超級大熱林宣妤
林宣妤（Serene）今年只有20歲，正在大學修讀Food Science，另亦有擔任主持、代言及封面女郎等工作。其實Serene去年於Astro國際華裔小姐競選2016奪得冠軍、最上鏡小姐、全民女神三大奬項，在華姐決賽前已經係超級大熱，可惜最終只得亞軍！佢亦係繼楊秀惠後，第二個來自馬來西亞的華姐加入TVB大家庭。
來自吉隆坡的Serene有着典型美女嘅大眼睛、白裏透紅肌膚加上一把飄逸長髮，身材修長、儀態萬千，甜笑時散發陣陣仙氣，如果真係有機會睇佢拍劇，小編一定晚晚開電視！(題外話，Serene啲廣東話都算講得幾好，拍劇應該聽得明！)
