叱咤樂壇流行榜頒獎典禮2020 | 莫文蔚向廣東歌致敬Solo 網民嗌悶（有片！）
撰文、圖片：東方新地
莫文蔚奪叱咤樂壇至尊歌曲大獎
在五台聯播加持下，莫文蔚《呼吸有害》 成為「專業推介叱咤十大：叱咤樂壇至尊歌曲大獎」莫文蔚在台上發言表示：「今日返到嚟我屋企，香港係我起步點。呢個旅程好圓滿。多謝香港！」
其後莫文蔚在 「我們的廣東歌」環節上演唱了近十數年來多首叱咤得獎歌曲，將多年來的「我最喜愛的歌曲」以串燒歌形式獻唱。
莫文蔚《呼吸有害》2020首次為無綫劇唱主題曲
去年年中，無綫大製作《飛虎之雷霆極戰》同優酷合拍、製作費上億、雲集無綫最強卡士、亦被安排搶先喺全國播放（首播錄得45億破紀錄點擊），所以連主題曲都要重金禮聘個有番咁上下份量、紅遍全亞洲嘅莫文蔚至得！
為隆重其事，去年優酷首播有國語版〈只是不夠愛〉，今個月無綫啟播，再配番首廣東話版〈呼吸有害〉，講緊亞洲天后、金曲歌后上次出廣東話新歌已經係十年前嘅事，今次仲係莫文蔚出道27年來第一次幫無綫唱電視劇集主題曲，真係好巴閉喎！
第一代星女郎兼全裸先鋒
既然係相隔十年再唱廣東歌，仲係第一次幫無綫唱電視劇主題曲，相信唔少聽吳若希、菊梓喬、許廷鏗、胡鴻鈞大嘅90後、00後都未必知呢件事有幾隆重、莫文蔚有幾巴閉！今年50歲，出道27年，莫文蔚係少數同時喺電影及音樂事業上取得極高成就嘅全方位女藝人。唔止係周星馳舊愛兼御用嘅第一代「星女郎」、兩屆台灣金曲獎歌后，亦喺中國內地及台北小巨蛋舉行最多場個人演唱會嘅香港女歌手㖭！仲有一樣嘢你一定要知，就係廿年前曾拍過全裸唱片封套，被公認為最完美體態女星，廿年後依然fit到零走樣，去年台北個唱一襲肉色透視歌衫，今時今日啲所謂女神全盛時期都未必carry到！
