有片！陳詩欣「心口隊鏡頭」技術擊倒何依婷 《行山少女》河背水塘冧大叔呃雪條
撰文：東方新地 資料來源： 無線娛樂新聞台、河背水塘參考路線
《行山少女》陳詩欣Bra Top夠消暑
或者受到《美女郊遊遊》刺激，無綫推出新節目《行山少女》，結果亦受到高度關注，親親大自然行山欣賞風景其次，最好睇都係嗰班青春無敵女主持，郁啲就除外套bra top上陣，隔住個「芒」絕對要大嗌我愛夏日長，日前有一輯係陳詩欣同何依婷一齊去河背水塘行山，兩個都係新晉小花，行埋一齊自然有比較。
暢遊河背水塘 心口脹卜卜登場
甜美嘅何依婷雖然係港姐亞軍，但鬥身材同高度，陳詩欣稍勝一籌，呢次一齊著bra top出鏡簡直高下立見，身穿火紅色運動型bra top嘅何依婷明顯較保守，事業線冇晒影，陳詩欣件幼帶bra top就交到貨喇！將佢脹卜卜上圍完美表現出嚟。
何依婷冧爆士多阿叔
兩個女仔講到明要行山打卡放上社交網呃like，不過當日天氣太熱，佢哋第一站竟然係入士多，每人拎住一支雪條，士多阿叔見狀豪氣話：「呢個round我嘅！」何依婷即時吳若希上身以高八度聲線回應：「真係㗎？好好呀！」阿叔暈得一陣陣再送多兩支自家製涼茶，陳詩欣落多兩錢肉緊：「好nice呀你！多謝你！我哋會努力拍嘢！」
自拍出晒位
全程都係陳詩欣做主導多，行山期間攝影師索性將個cam交畀佢負責揸住，終於等到出位好時機喇！陳詩欣自揸嘅片段幾乎全部都focus自己心口，個頭影唔到個樣唔清楚都唔緊要，最緊要keep住對胸有曝光率，一邊行一邊心口隊鏡頭，真係好震撼！
陳詩欣著慣三點式肯搏肯露前途光明
憑無綫旅遊節目《3日2夜》上位嘅陳詩欣，美好身材無懈可擊，近年她在《愛·回家之開心速遞》飾演Suki，又曾在《姊妹淘》做Yoga引起哄動，早前更被安排加入《學是學非》，肯搏肯露前途一片光明。
