自費包雙人房 隔絕胡定欣 黃心穎橫店箝實馬明
黃心穎 馬明去年撻着
去年宣傳《為食神探》期間撻着，今年初馬明同心穎BB被影到約會睇戲食飯親密關係因此曝光，可惜二人對公開戀情態度並不一致。心穎BB有意無意公開把馬明掛在口邊以示女友身份，不過馬明就一直表示仲係觀望狀態。出名孝順的馬明搵女友一向要睇媽媽頭，今年三月有傳心穎亦已經上過太古城馬家作客、亦被馬媽媽接受。
自費包雙人房
28歲 黃心穎 有觀眾緣、近年又被無綫力捧，不過《深宮計》始終係台慶大製作，所以就算得償所願同馬明齊齊喺劇中扮情侶，馬明喺劇中其實同周秀娜青梅竹馬、又同飾演王妃嘅胡定欣有曖昧，戲外正印在片場內只有份做第三選擇。
《深宮計》演員陣容龐大，依慣常規例除了主角們、娜姐、心悠呢啲大粒外援以外，演員一概要兩位共享一間酒店房，不過據知心穎BB冇助手跟身，依然要求單人獨享一間雙人房。有指出發前心穎BB已經搭通天地線主動聯絡場記，話自己想要多啲空間為由，俾全數房費都要獨享間房，仲搵相熟場記要求同馬明安排同一層！
日頭監場 夜晚傍實
《深宮計》在上海橫店分兩組拍攝，奈何馬明要到尾聲至同司設房女史黃心穎燃起愛火，整個橫店外景實情大部份糾纏於周秀娜同胡定欣之間。為咗睇實馬明，心穎BB完成拍攝第一時間撲去第二個景區拍攝場地，表面借詞旁觀學戲，其實就擺到明要宣示主權掌握馬明同舊愛所有交流。食飯時唔使多講，當然要黐實男友啦！
一名幕後爆料：「個個都慣咗，場戲明明冇佢份，但係只要見到馬明，就預咗會見到心穎BB，佢話嚟學嘢喎，真正係點大家都明啦，心穎BB對個個演員、幕後都好nice好好傾，不過同胡定欣就冇乜兩句。同埋人哋攞佢同馬明緋聞講笑，心穎都照單全收好受落。」心穎同定欣在IG相當活躍，但兩女就算同場，都冇任何合照，大合照都係有你冇我。
日對夜對心情靚
同情郎共處一地日對夜對，心穎BB心情特別好，就算落大雨取消拍攝、或者做Gym，一樣化行妝扮萌玩selfie。
