自認遲到 楊千嬅：我等就唔係時間咩！
撰文：東方新地｜圖片：新傳媒圖片、楊千嬅IG
楊千嬅拍劇又接戲
楊千嬅重返TVB拍攝劇集《多功能老婆》，同時又接拍同郭富城合作嘅電影《麥路人》，因為趕戲搞到拍劇頻頻遲到，千嬅解釋：「其實冇咩回應，因為呢啲報道成日都有，其實就唔真實，不過有啲係事實。」
承認遲到
事實就係千嬅的確有遲到，佢話感謝劇組包容：「因為拍攝時間長短一定有，我哋度期係留咗好充裕嘅時間，的確拍《多功能老婆》係有三、兩次遲到過，都係十分鐘、二十分鐘，通常兩個鐘頭前預知未收得工就即刻打電話去通知劇組，等佢哋可以跳拍，就算我或者助手都一定會做。」被指因遲到而辣著陳煒，千嬅表示唔多覺對方有嬲囉！
唔記得遲幾多
拍劇有遲到，連拍電影《麥路人》千嬅都有遲到：「拍《麥路人》就遲過一日，當日要去中環睇尾龍骨，唔醫就行唔到，你知中環有幾塞車啦，但遲幾多就真係唔記得喇，好耐之前嘅事。」佢笑住話：「其實呢啲我都唔明，我等咗啲時間就唔係時間咩！我拍咁多電影都冇呢個問題，點解拍電視劇就有呢？」
素顏去行山
早兩日千嬅走咗去行山，佢仲好大方將素顏look放上IG，見千嬅戴住頂太陽帽，鼻樑位置紅咗一撻咁，似乎當日真係幾曬吓！行完山後，千嬅又趕住為咗下月舉行嘅音樂會排練，真係忙到甩轆！
千嬅遲到辣著陳煒
年初簽約老公丁子高旗下，楊千嬅首項工作係回歸TVB拍攝劇集《多功能老婆》，不過，劇拍到一半，千嬅上月又接多一部電影，同郭富城合作拍電影《麥路人》，連踩兩邊戲咁博為乜，原來老公丁子高一早打好如意算盤，希望夫妻檔省靚招牌，憑電影電視劇幫老婆一箭雙鵰，擸齊TVB視后兼冧莊再做影后；不過，出師未捷，千嬅近日就因為趕戲搞到拍劇頻密遲到，令劇組怨聲載道，就連出名老練順得人的陳煒，都畀千嬅辣著，日前二人一齊拍外景，煒哥為等姍姍來遲的千嬅埋位等到面都黑晒，戲外更全程零交流！
撰文：東方新地｜圖片：新傳媒圖片、Instagram
楊千嬅新戲 題材貼地
17年冇拍電視劇，楊千嬅成功踢走鄧萃雯接拍殿堂監製陳寶華重頭劇《多功能老婆》，連月來日夜趕戲已經夠忙，不過上月千嬅再接拍同郭富城合作的電影《麥路人》，同一時間拍劇又拍電影，千嬅更試過連踩48小時冇得瞓，博到咁盡全因老公丁子高睇準該片題材夠貼地，希望千嬅繼五年前《春嬌與志明》封后後再擸影后，加埋對準無綫明年視后獎，務求一箭雙鵰！
據知情者透露：「除咗因為小美開到聲，話城城好想同千嬅拍，最重要都係丁生睇過劇本之後，覺得呢套戲角色有發揮，故事夠寫實，想千嬅憑呢部戲再擸影后，加上拍《多功能老婆》，佢亦睇準無綫明年個視后獎，如果一次過可以擸晒影后視后兩個獎！千嬅事業再突破之外，仲可以夫妻檔省靚招牌！」
頻密遲到
不過要同一時間兼顧電影同電視劇，對44歲的千嬅來說，其實有苦自己知。據知情者透露：「係人都知拍劇時間好長，趕完夜班又緊接開早班，咁耐冇拍TVB劇，千嬅初頭都唔係好慣，因為真係日接夜冇乜得抖，喺呢個時候，仲接多部電影，連幾粒鐘休息時間都冇埋，佢其實好吃 力，最辛苦嗰次更加係連踩48個鐘，攰到狂隊咖啡提神頂住！」
今天新挑戰🌟從這一分鐘開始，連續4組拍攝 🎬 #oncall48小時 #麥路人 #多功能老婆 #日夜無間 勁過三鉄 🤘🏻人生反高潮 👀👀👀#actresslife #多勞多得 希望大家喜歡我們所有用心製作演繹的作品🌟 #第一組
楊千嬅（@yeungchinwah）分享的貼文 於張貼
收工後再出發準備第二組拍攝🎬🤘🏻 #多功能老婆 #actresslife #藍飛 #ilovemyjob #overnight #oncall48小時 #第二組
楊千嬅（@yeungchinwah）分享的貼文 於張貼
可惜牽一髮動全身，楊千嬅唔夠瞓就話死頂捱到殘，但同劇演員亦因為佢頻密遲到連累經常收唔到工，一樣等到謝。據知情者透露：「千嬅都好識做嘅，一早講咗自己要疊住部戲，時間要遷就，佢講話寧願自己瞓少啲，但時間又邊有咁理想吖！有時電影嗰邊未搞掂唔放人，佢想走都唔得，咪又搞到套劇啲演員囉！成組人為等佢一個，就算Set好晒機，其他演員到齊一樣拍唔到！」
等到扯火
當中擔演《多功能老婆》女二的陳煒，劇中同千嬅有最多對手戲，亦因此經常要等天后駕到等到著晒火！
據知情者透露：「千嬅同煒哥最多對手戲，咪成日要煒哥等佢囉！煒哥講電話玩手機打發時間，喺呢行咁耐，煒哥份人好識做兼且出名好有耐性，但成日係咁等，本身已經拍到好攰想快啲拍完收工，愈等個人就愈躁，有時真係見佢呆等到面都黑埋，不過唔好話佢啦，其實班工作人員 咪一樣等到謝晒，但明知寶華姐都要就千嬅啲期，個個幾嬲都唔敢出聲囉！」
成棚人服侍
日前《多功能老婆》在渡船街趕拍外景埋尾，千嬅再次遲到。當日下午兩時許，在街上要拍一場開車戲，只見同場演出的陳煒、周柏豪、朱晨麗一早到齊化好妝呆等，只係千嬅遲遲未見影，一班演員及工作人員企喺街已經熱到木無表情，朱晨麗就不時上煒哥的七人車涼冷氣，換好戲 服的煒哥，唔知係咪企喺街曬到出火，見佢塊面愈嚟愈黑，連講電話都唔識笑。不過，姍姍來遲的楊千嬅，嚟到仲要成棚人慢慢服侍，拜神化妝整頭又搞足半個鐘，大家都只能望住佢繼續焗等。
姍姍來遲
全組人等咗天后大半個鐘，終於見千嬅趕到。
上香拜神
千嬅拍前第一時間先拜神上香。
掛住按摩
千嬅仲拎住大支按摩棒按摩一輪，未捨得埋位。
排場十足
除咗有助手跟身，千嬅仲帶埋私人化妝師及髮型師到場，排場十足。
幫埋試位
周柏豪、陳煒及朱晨麗呆在車上等千嬅，千嬅還在補妝遲遲未埋位。
終於拍得
千嬅上咗車，終於可以拍攝，不過一個開車鏡頭只拍咗大半個鐘，相對等嘅時間仲長啲！難怪個個冇表情！
拍完無交流
拍完一停機，千嬅已經大忙人上身忙於講電話，同身旁陳煒及朱晨麗完全零交流。
姊妹孖住走
之後轉場景再拍，朱晨麗孖住煒哥一齊走。
鬆一口氣
拍足四個多月的《多功能老婆》，日前正式煞科，連踩電視電影兩片冇覺好瞓的千嬅，終於可以鬆一口氣。
最開心真心的一刻❤️🙌🏼🎬 #多功能老婆 #actresslife #尾聲
楊千嬅（@yeungchinwah）分享的貼文 於張貼
陳煒朱晨麗在劇中演千嬅閨密，不過，千嬅巨星上身難埋堆，反而陳煒、朱晨麗就因拍劇變閨密經常行孖咇一齊收工直落食飯睇戲，仲試過睇戲遇到黃德斌。
兩人又約埋去睇舞台劇「偶然，徐志摩！」，捧胡定欣馬浚偉場。
