胡鴻鈞挑戰娜姐出人肉攬枕網民唾棄建議出刀削麵

Sep 4 2020

「胡鴻鈞攬枕」到底是什麼概念？！胡鴻鈞唱歌係掂，拍劇都唔錯，最近竟然推出「人肉攬枕」畀粉絲貼身享受？！香港動漫電玩節同無綫合作，喺big big shop推出其中一款產品「胡鴻鈞幸福攬枕」，男星出攬枕令唔少網民震驚，不過最驚喜係售港幣399蚊，網民海量回應，笑問胡鴻鈞係咪得罪咗無綫高層，建議佢不如出刀削麵仲有噱頭，又話寧願要汪阿姐同阿Bob嘅攬枕都唔要胡鴻鈞，售前反應插晒水。

撰文：東方新地

胡鴻鈞推出「幸福攬枕」

胡鴻鈞攬枕造形照 — 香港動漫電玩節同無綫合作，喺big big shop推出產品，其中一款係星夢當紅男歌手胡鴻鈞嘅人肉攬枕。

胡鴻鈞攬枕尺寸大小 — 無綫喺big big shop推出嘅「Hubert 胡鴻鈞幸福攬枕」，尺寸為130cm x 40cm，仲係雙面印刷，成個中童咁高，夠晒份量。

胡鴻鈞攬枕實物 — 雖然個攬枕唔係人形設計，但big big shop溫馨提示：「打開攬枕後請拍打攬枕以令PP棉均勻分佈，以達至最佳最舒適效果。」

胡鴻鈞攬枕網購 — 胡鴻鈞攬枕售價為港幣$399，絕對唔平！預售廣告中介紹指：「big big shop首度推出藝人攬枕！攬住『胡鴻鈞幸福攬枕』，就好似攬住Hubert真人咁幸福！以後無論你想聽歌或是睇戲，都有『胡鴻鈞』陪著你！」留意番，係首50名粉絲先可以獲得親筆簽名卡。

網民回應：無綫蝕到傻咗！不如出阿Bob攬枕好過！

今屆書展同動漫節因疫情緣故延期舉行，而香港動漫節決定同無綫合作，將啲產品放上big big shop度賣，而無綫就搞搞新意思食住商機，為旗下藝人胡鴻鈞推出人肉攬枕，並命名為「胡鴻鈞幸福攬枕」。究竟呢個胡鴻鈞攬枕有幾幸福？喺big big shop廣告中有介紹：「攬住『胡鴻鈞幸福攬枕』，就好似攬住Hubert真人咁幸福！以後無論你想聽歌或是睇戲，都有『胡鴻鈞』陪著你！」開價係港幣399蚊，仲附送胡鴻鈞親筆簽名卡一張。