胡杏兒搵Coffee教瑜伽 呻拍《肥田囍事》變肥底
廣告
扮靚同keep fit永遠都係女人嘅終身事業，雖然胡杏兒同老公李乘德（Philip）都好心急再追多過B，希望可以三年抱兩，但keep fit大業胡杏兒都未有放低，近日佢就跟Coffee（林芊妤）學做瑜伽，又要做倒立又要做拱橋，睇見都戥佢辛苦，佢仲大呻自從12年前拍《肥田囍事》後已變肥底，想瘦番落嚟一啲都唔容易！
胡杏兒拱橋倒立嗌辛苦
胡杏兒喺2015年同李乘德閃電結婚，未到兩周年結婚紀念，現年38歲嘅胡杏兒，已經成功幫三代單傳老公李乘德誕下囝囝Brendan（李奕霆），杏兒從來不諱言希望抓緊時間在40歲之前要生至少兩個。不過keep fit係女人嘅終身事業，為瘦身佢最近就跟住Coffee去學做瑜伽。不過話晒都有番咁上下年紀，胡杏兒做倒立同拱橋時都大呻辛苦，佢仲諗番起06年增肥到152磅拍《肥田囍事》時，每次做訪問記者都會問佢覺唔覺得自己犧牲好大，佢話自己當時每次都會回答：「又唔係唔俾我瘦返轉頭，唔俾瘦返就話大犧牲啫！」
但依家相隔超過10年，胡杏兒話發覺其實當年拍《肥田囍事》真係有一定嘅犧牲：「因為我的身體再不能像以前那麼容易瘦回來，因為脂肪細胞已經膨脹了，到現在keep fit真的不是像以前那麼輕鬆。」不過杏兒話即使再揀一次都會再演「肥田」呢個角色，因為挑戰愈大，滿足感都愈大！
胡杏兒老公 恨追多一個
早前胡杏兒夫婦為囝囝Brendan喺九龍塘一會所搞百日宴，大宴親朋好友，而杏兒老公仲喺Instagram貼咗張相，相中二人拎住印有Brendan唔同樣子嘅紙板，並喺Instagram留言話：「Hopefully we will have the chance to carry two real babies one day (好希望有一日我哋有機會抱兩個真嘅BB！)」老公開到口，杏兒追多一個，真係事在必行！
