胡定欣《深宮計》激罕半裸上陣 心穎BB被打到嘔血
撰文：東方新地｜圖片：微博、劇照、網上截圖｜資料來源 :TVB
｜胡定欣踏上成魔之路
早前《深宮計》劇情劇情講述王蓁(胡定欣飾)因流產而體虛氣弱，未能為夫君李隆基(馬浚偉飾)誕下子嗣，隨即成為太平公主(陳煒飾) 的攻擊手段，太平更是迫李隆基寵幸佢一手安排的鄭純熙(周秀娜飾)。雖然皇后表面上對純熙示好，但其實已一步步踏上成魔之路！
作為皇后但未能為皇室傳宗接代，更中途殺出一個鄭純熙，皇后自然是妒火中燒，一心要置對方於死地！
｜周秀娜險被燒死
上星期《深宮計》劇情講到純熙聽從王皇后的建議，獨自到藏書閣閱讀抄寫名著《女則》與《女誡》，以學習先賢為婦之道。點知……
點知純熙在藏書閣閱讀抄寫期間突然昏迷，之後四處突然起火，幸好任三恕(馬國明飾) 將佢成功救出！
｜娜姐性感出浴
接下來劇情講到純熙去到皇后新建的「紫蘭湯」藥浴調理身體，亮點當然就係娜姐的出浴場面，雖然唔係露好多肉，娜姐亦沒有刻意賣弄性感，不過騷吓腿騷吓香肩，出水芙蓉好吸睛！
｜馬明中胡定欣奸計
之後重點來了，喺純熙好享受咁浸浴、任三恕又正在宮中巡邏之時，突然有位宮女邊跑邊大叫「紫蘭湯」中有刺客，於是任三恕立即衝入內追查刺客！
孤男寡女 共處一室
點知入到去竟然咩事都冇發生，皇后就與淑太妃(韓馬利飾) 好似計好時間咁出場在現場，見到女方衣衫不整，而且只有任三恕與純熙獨處一室，當然會懷疑兩人暗結私情，大興問罪之師！
｜心穎BB為馬明頂罪
整件案最大的疑點就係該個大叫有刺客的「宮女」，不過一直未能搵到此人，所以苦無證據證明純熙和任三恕的清白。此時元玥(劉心悠飾) 帶同被鎖上手扣的若芊(黃心穎飾) 出現在殿上，若芊為救任三恕，將一切罪名攬上身！
｜心穎BB被打到嘔血
若芊為救心上人以身犯險，以纖纖身驅抵受廷杖五十！真係睇見都心痛！
｜馬明深情錫錫
雖然若芊身受重傷，不過成功感動任三恕，搞咗咁耐兩人終成為一對！仲有馬明深情咀咀心穎BB！
｜胡定欣激罕半裸上陣
之後鏡頭一轉，竟然到皇后被人打？鏡頭見到胡定欣半裸趴在墊上，命宮女用樹藤大力拍打其臀部多達20下，真係睇見都痛！一邊被打，胡定欣就一邊咬緊牙關忍痛，原來此舉係文太醫(袁文傑飾) 建議，用樹藤抽打可以將久滯不通的經絡重新運行，增加懷孕機會。
皇后一直對自己未能懷孕耿耿於懷，為成功生仔不遺餘力，忍受百般痛楚都在所不惜！
｜周秀娜搶先有喜
皇后晚晚承受藤打，就係為了可以早日成功懷孕，點知不久後就傳來純熙有喜的消息，此刻皇后更加係怒髮衝冠，最後幾集將會愈來愈精彩！
