肥媽教去大灣區食鯇魚魚生 食安中心警告切勿進食！
撰文：東方新地｜圖片：節目截圖、食物安全中心、衞生署衞生防護中心
肥媽激讚「大灣區」
肥媽Maria Cordero，大家知佢除了歌藝驚人同成日教你食平啲外，仲出名有一顆愛國心，之前就試過公開激讚「大灣區」，表示內地無論生活環境、日常消費、買樓都係比較好，另外又話自己喺中山買咗樓，第時退休一定會返大灣區生活！肥媽稱雖然有啲人唔喜歡內地，但佢話身為一個中國人，住喺邊度你都係中國人！小編聽到熱血沸騰！
《大灣區 活好D》
呢排無綫十點半時段播緊的《大灣區 活好D》，宣傳大灣區的美好，又點可以唔搵肥媽做主持？節目中肥媽帶住一班年輕藝人喺大灣區唔同城市吃喝玩樂，再介紹埋樓盤教你置業。年輕人，你哋仲等咩呀？
鯇魚宴食魚生
不過有肥媽在，當然要食好西啦，早前第6集去到中山，由黃美棋及林伊麗試食佛山一間食肆的鯇魚宴，當中更特別推介招牌魚生，兩位靚女都食到好滋味咁喎！
大灣區奢華生活
之後去第7集，肥媽就主力介紹河鮮，去到當地一個佢話係佢老友的屋企作客，觀眾望到間屋都O晒嘴，靚到酒店咁，獨立屋有大草地有自設魚塘，搞到小編都好嚮往大灣區的生活呀！
無錯啦，大灣區人非常識得享受生活，人哋個魚塘養魚唔係想拎去賣，純粹係養嚟自己食，想食咩魚就養咩魚，即刻捉完即刻煮！
肥媽介紹鯇魚魚生
之後去到呢集節目的戲肉，主打係一道命為「風生水起」的鯇魚魚生，係用薄切的鯇魚魚生加上唔同配菜撈埋嚟食，幾位主持未食都已經話好正，覺得肯定又香又口感豐富！
順德人「放血」勁
食安中心呼籲 市民切勿進食淡水魚生
不過日前本港食物安全中心日前於FB發文，呼籲市民切勿進食如鯇魚及大頭魚等的淡水魚生：「在一般環境下飼養的淡水魚，除了致病菌外，還可能帶有寄生蟲，例如可造成膽管梗阻、肝硬化和引致膽管癌的中華肝吸蟲。酒、醋、日式芥辣、黃芥辣及香料均不能殺死包括中華肝吸蟲在內的寄生蟲。」
今早衞生署衞生防護中心亦在FB發帖，稱要發出正確衞生訊息：「鯇魚容易附帶肝吸蟲，市民如生吃鯇魚，有機會受到感染。因此鯇魚應徹底煮熟才進食，絶不適宜用來製作魚生！慢性肝吸蟲感染更會損害膽管和肝臟，增加患上膽管癌的風險。」大家要留意啦！
