不折不扣嘅美魔男！揭八大凍齡男星保養秘技

56歲杜德偉爆肌舞媚男

出晒名身材fit爆嘅杜德偉邊度似一個已經56歲嘅叔叔，他曾經話自己保持年輕嘅方法好簡單，就係唔煙唔酒、多菜少肉和少鹽少油，總之對身體唔好嘅習慣佢全無。

再加上哥哥杜德智係個專業健身教練，時刻督促佢操fit自己，真係不折不扣嘅美魔男。有傳佢會搞笑咁每日催眠自己，對住塊鏡大叫「25!25!25!」，唔通係譚校長教嘅？

鄭敬基喺80年代憑住一首〈酒杯敲鋼琴〉瘋魔萬千少女，仲有喺劇集《卡拉屋企》、《烈火雄心》等入面嘅演出深入民心。佢早年移民加拿大，於2013年回流返港重投演藝事業，但最令人驚訝係現年52歲嘅佢竟然同1987出道嗰陣分別不大，保持一副帶稚氣嘅童顏，確係得天獨厚。

鄭敬基稱對飲食幾有研究，例如好多水果佢會連皮吃，勤飲各種抗氧化嘅果汁，例如紅菜頭汁、蕃茄汁等，可以幫助身體排清毒素。佢又話自己每晚都有護膚四部曲，洗面、爽膚水、眼霜同保濕，缺一不可。

影帝級人馬偉仔出晒名識用對眼嚟做戲，一個微笑一個眼神足以殺死人，多年來都係以一副帶點沉鬱嘅俏臉瘋魔萬千影迷。重點係，佢個靚仔樣多年來都無乜變。佢話唔好以為男人唔使護膚，偉仔的秘訣係…

令偉仔成為美魔男的秘訣，原來他平均每日在面上花15分鐘時間，搽上保濕、控油或深層清潔產品，難怪每次偉仔現身都青靚白淨。而且偉仔熱衷於茶道，平時喜歡在家中歎茶，而茶入面的茶多酚正正有助肌膚抗老化。而且生活習慣亦都好重要，偉仔如非拍夜戲，會早睡早起，且保持心境愉快，生活開心咁人都會年輕啲。

劉天王除咗型之外一向都俾人活力十足嘅感覺，可能都同佢日常生活有關。雖然貴為天王不過華仔嘅生活一切從簡，甚少見佢有咩負面新聞或者不良嗜好，而且佢對皮膚保養亦甚講究，保濕控油缺一不可，所以我哋先睇到肌膚保持緊致嘅劉華。

另一方面，華仔喺飲食方面特別講究，原來佢已經好多年無飲凍嘢，平時只係會飲溫水或者果汁，奶類產品幾乎完全唔會掂。另外為咗保持好身材，華仔平時食得好清淡，早餐食麥片同粥，午晚餐都係以蔬菜同魚類為主。

就算你唔識呂良偉，你都唔會唔識丁力啩，就誇張嘅係現年58歲嘅佢外表依然係同當年嘅丁力沒兩樣。都已經五十到尾嘅佢真係話佢四十歲都有人信，健美嘅body令佢無論着T-shirt定西裝都一樣咁好睇。

佢話就算拍戲幾攰都堅持每日做運動，平時不煙不酒，飲食清淡為主，而且只係食半飽就夠。佢話有健康嘅心境係保持年輕嘅不二法門，而且信佛多年嘅佢生活一向簡單，無咩壞習慣，可能真係相由心生都唔定。

人稱豹哥嘅單立文除咗係知名演員，亦係香港其中一個最出色嘅低音結他手，而大家都應該知佢喺《賭俠》飾演大反派侯賽因，佢嘅一句「想偷我雞!?」直頭係深入民心。喺娛樂圈多年嘅佢今年已經59歲，不過企埋一班年輕美女身邊都完全唔似隔咗一代，加上佢成日戴住副粗黑框眼鏡勁有潮味，形象同中年阿叔完全扯唔上關係。

豹哥就成日話最緊要係保持心態開心同年輕，唔好成日記住自己幾多歲，又唔好成日覺得上咗年紀就唔做呢樣唔做嗰樣。佢又鍾意同年輕一代打成一片，唔當自己係長輩。連自己都呃埋，難怪豹哥外表年輕又有活力！

三哥苗僑偉縱橫娛樂圈同商界三十幾年，可以話係乜風浪都見過晒，佢嘅身材一直都係高佻健碩，雙目炯炯有神，無論27歲定57歲都係咁適合做一啲有型有款嘅正派角色。三哥平時最愛運動，同娛樂圈一班老友一齊踢波打golf，加上佢近年演出都係一年一劇左右，拍劇只為過戲癮唔為賺大錢，人都自然輕鬆啲。

三哥話自己好少會敷mask，更加唔會打botox，最多都係早晚搽cream保濕。同埋佢透露自己食得多冬蟲夏草，晚晚都瞓得勁好，自然就容光煥發！

出晒名好戲嘅華哥演出電影無數，原來不經不覺已經63歲，不過佢就保養得非常好，皺紋都唔多一條，真係完全無老態。佢幾乎每次出場都係咁man，加上佢一向結實嘅身材，真係型過唔少後生仔。

華哥話佢飲食方面都不外乎少油少鹽，平時最鍾意食杜拜椰棗，不過就會食豬皮，貪佢夠多膠原蛋白！佢亦多做運動、經常健身。華哥話唔少上咗年紀嘅藝人都可能會做微調嘅整型手術，不過佢自己就崇尚自然美，仲話要有番少少皺紋先做到戲喎！

關鍵詞