羅天宇陳瀅被爆同遊日本睇芝櫻 假借與蔣家旻合照做煙幕

撰文：東方新地｜圖片：Instagram

話說，上年陳瀅同陳家樂有份合作拍攝無綫新劇《廉政行動2019》，更有傳二人成功擦出愛火花，而且仲極速發展，被爆一齊拍拖去日本溫馨共度4日3夜 ！

當時二人因被影到秘密單獨約會，喺中環撐完枱腳後更一齊返陳瀅香閏！不過其後家樂表示報料讀者太有創作力，指事件並非如此，而陳瀅則聲稱自己係單身！結果，之後暫時都未有再聽到家樂同陳瀅有好消息～

羅天宇陳瀅被爆同遊日本睇芝櫻

點知，今日就有消息指Jeannie和羅天宇被影到出現喺日本東京「富士芝櫻祭」，不過同行亦有幾位圈外朋友。據了解，Jeannie與羅天宇一直保持一定距離，反而女方與友人則不時密密斟，二人好似顯得好避忌！

據知「富士芝櫻祭」於今年4月中至5月底進行，睇返Jeannie曾於5月14日喺IG上載過該櫻祭嘅相，並留言表示自己放緊假，之後其他相都係單人照！東京之旅後，Jeannie亦隨即飛咗去夏威夷。

借與蔣家旻做煙幕

至於羅天宇，則喺5月27日上載與現時於東京留學嘅蔣家旻合照，以及於東京鐵塔前影嘅相，同時蔣家旻亦於同日上載咗多張與羅天宇嘅合照。雖然日子上羅天宇與Jeannie於日本嘅時間唔吻合，但就未知會唔會有一方為減低大家嘅注意而特登冇放相上IG啦～