羅嘉良秘密返港 現身癌症醫療中心

文：東方新地 ｜ 圖：羅嘉良微博、新傳媒圖庫

羅嘉良數度出入癌症醫療中心

57歲羅嘉良貴為無綫三屆視帝，近年主要在內地發展，加上妻女長居內地，所以甚少返港。但近日有報導指羅嘉良日前秘密由內地返港，經14天隔離期後，被拍到出入港島區一間癌症醫療中心，足足逗留約3個小時才離開，見他身形明顯消瘦，神情落寞。其實早前羅嘉良在內地工作時，已因身體突然消瘦，而傳出他患肝癌的消息，後來證實純屬炒作。及後羅嘉良接受訪問時否認患癌，稱到醫療中心只是找朋友，順道接受核酸檢測及見醫生，叫大家放心，並稱：我人冇事！

羅嘉良內地騎呢look帶貨

57歲羅嘉良貴為無綫三屆視帝，最近為搵銀不惜聯同內地網紅，喺網上直播促銷賣貨，為開闢新財路，虎紋長褸加短打造型行catwalk、塞拳頭入口等騎呢事做勻，有網民嘆「淪落到扮小丑」，不過最慘係咁博命都係兩萬人睇，人仔都唔係咁易賺﹗

一哥降呢借網紅谷人氣

撈家羅家良喺電視史演過不少經典角色，創下三奪視帝紀錄，17年回巢拍無綫劇《與謀同謀》仍然叫好叫座，話晒係無綫一哥，最近卻在內地降呢做網紅，從來唔活躍於社交網的撈家，最近順應內地趨勢在抖音開設帳戶，近日更變身網紅首開直播銷售商品，降呢網紅已被指自貶身價，撈家仲唔可以「獨當一面」主持大局，要孖住內地網紅「廣東夫婦」拍了數條宣傳片去谷人氣，宣傳片上，撈家扮鬼扮馬重現過去經典劇造型，又披上虎紋毛毛長褸加短打孭個紅白藍袋行catwalk，睇開撈家在戲內戲外都盡是一哥氣勢，如今卻變得如此騎呢，被網民狠批浮誇又娘。

賣貨變點唱交易成績差

直播開始時，羅嘉良亦用上美肌濾鏡令面色泛紅又變白，但卻遮唔住浮腫的大眼袋同黑眼圈，真係慘不忍睹，直播時撈家說話唔多，而且表現有點生硬，不時露出尷尬神情，不過相當順得人，被人即時點唱，撈家二話不說唱出〈歲月的童話〉等多首歌，令直播賣貨變成音樂會，為搵人仔乜都做齊，又被人批自眨身價去扮小丑，現場只有二萬人收看，以內地下下上億的數字，「業績」強差人意。唔知下次撈家又要扮乜去賣嘢呢﹗

演奸角攞男配獎

57歲羅嘉良絕對係一哥中嘅一哥，曾先後憑《難兄難弟》、《天地豪情》、《流金歲月》奪得視帝，2003年撈家離巢無綫外闖主攻內地市場，更因而邂逅第二任太太蘇岩，二人於09年結婚，三年後誕下女兒Sela，長居北京生活，主力拍劇，2014年憑《精忠岳飛》飾演秦檜一角奪得華鼎獎最佳男配角獎，喺內地甚有江湖地位。