結婚兩年 聞妻楊怡有喜 羅仲謙：承你貴言！
羅仲謙 為老婆練大隻
這兩年謙謙在國內拍戲，有段時間因為工作疏於健身，本來脹卜卜的身形突然大縮水，楊怡覺得謙謙貨不對辦，曾公開投訴老公說：「佢追我嗰時，身形較健碩、後來瘦咗，攬住佢嘅時候冇晒感覺。」只因老婆一句嫌棄，當時身在國內拍戲的謙謙即自動加操，結果二頭肌及三頭肌全部歸位，能滿足老婆一己私慾，謙謙又鍾意健身，絕對是一舉兩得。
返港後謙謙keep住日日操肌，本刊記者一連幾日都見他獨自駕車到大埔健身室，而且每次都逗留超過兩小時，好神心，練到手瓜幾乎粗過大髀的他，無見一排成熟了不少，男人要照顧老婆擔起頭家，除了要努力搵錢，亦要有強壯的體魄，婚後有了人生方向的謙謙，曾被問及長期在國內搵人仔辛唔辛苦，當時他這樣回答：「當你好辛苦嘅時候，你會知道為咗乜嘢，我辛苦時會諗吓老婆，佢喺屋企睇緊電視、上網，好舒服好得閒，你嘅辛苦換到某個人好開心係值得嘅。」老公靚仔、大隻又有責任心，依家仲要搵到錢，難怪楊怡成日都要北上𥄫實啦！
謙謙：要錫住老婆身體！
謙謙離開健身室後接受本刊記者訪問，講到生B就話最少生兩個，有兄弟姊妹家庭先會美滿。
記者：阿怡係咪成日去國內探你班？
羅仲謙：落返嚟啦！之前我拍《征途》初期佢有嚟，依家都返嚟休養。
記者：嚟緊有咩搞作？係咪會留喺香港？
羅仲謙：係呀！因為老婆就嚟生日吖嘛！
記者：仲以為你話老婆就嚟生得！
羅仲謙：哈哈哈！承你貴言呀吓！承你貴言！
記者：依家係咪努力中，加緊油造人？
羅仲謙：我之前嗰三個幾月都唔喺香港，依家返到嚟多啲時間陪佢囉！
記者：有冇同老婆一齊做運動？
羅仲謙：有呀！會同佢去會所健身。
記者：依家阿怡有冇嘢做緊呀？
羅仲謙：佢依家都係休息緊。
記者：係咪為咗迎接小生命？
羅仲謙：佢依家要開始宣傳《再創世紀》，我諗佢仲有其他嘢傾緊。
記者：咁佢宣傳完新劇仲有咩工作？
羅仲謙：我諗到時可能到我要開工。
記者：係咪已經有好消息唔方便講呀？
羅仲謙：大家好似好關心，比我更加著急喎！我順其自然，唔想畀壓力屋企人。
記者：你哋好似好鍾意小朋友喎！
羅仲謙：係呀！順其自然啦！
記者：有冇話想生幾多個？
羅仲謙：呢啲係天賜，我覺得有兄弟姊妹會比較美滿啲！兩個以上都ok！不過都要錫住老婆身體嘅！
記者：好想快啲聽到你哋好消息。
羅仲謙：承你哋貴言！
操肌養精等湊B
風雨不改日日去健身室的謙謙，有私人教練幫佢練大隻，操肌操足超過兩個鐘，目測其胸肌已過40吋，手瓜孔武有力，為做人父湊B做足準備。
結婚兩年
楊怡與謙謙拍拖六年結婚兩年，婚後感情有增無減，曾揚言想三年抱兩，不過因工作聚少離多未能好好配合。
去年10月結婚一周年紀念，楊怡因要到布拉格拍《再創世紀》外景，謙謙請定假做跟得人夫，兩人在當地慶祝。
夫唱婦隨
年初謙謙返國內拍攝陳德森執導的新戲《征途》，楊怡人肉速遞飛去無錫探班，謙仔說：「因為返唔到香港，所以拍攝初期阿怡有飛來探班，我哋仲去咗太湖、古鎮散步、飲嘢，聽落好悶，但我已經開心、好滿足。」
飛上海氹妻
之前有傳謙謙與內地女星朱銳拍激咀戲事前冇向楊怡備案，激嬲老婆，搞到要由台東急飛上海，氹番在上海工作的楊怡，更陪玩陪食陪濕平，連人肉GPS都做埋！謙謙肯做阿四贖罪，羅太最後收貨唔再嬲豬。
甜蜜開P慶生
楊怡與謙謙同於8月牛一，日前壽星夫婦齊齊搞生日P提早慶生，又在社交網po相放閃，更甜蜜咀嘴勁恩愛。不少粉絲笑二人閃爆全宇宙，祝他們早生貴子。
羅太冧爆
生日會的布置童真盡現，羅生與羅太置身波波池玩得投入，孖住滿場飛之外，仲不時深情對望互冧。
