網友讚林曉峰大仔有明星相！15歲林寶高康子妮成個頭
撰文：Kayla(原文刊於：Sunday Kiss)｜編輯：東方新地｜圖片：Facebook、新傳媒圖片
15歲林寶 高媽咪成個頭
作為全能藝人嘅林曉峰，同本身係和音歌手嘅康子妮於2002年結婚，翌年誕下大仔林寶，2004年再誕下細仔林熙，一家四口樂也融融。林曉峰日前喺Facebook分享幾張相片，見到而家已經15歲嘅林寶，原來已經高媽咪成個頭，就連細仔林熙都係！
林曉峰大讚老婆「全能」
林曉峰同康子妮結婚16年依然恩愛，林曉峰仲藉住分享近況，隔空大讚老婆：「MaMa,Musician,Artiste,Chours（Chorus）, Beautician, Counseling, all in one !」（集媽媽、音樂家、藝術家、合唱、美容師、輔導員於一身）
林曉峰 囝囝高過老竇
睇住林曉峰、康子妮拍拖結婚到生仔，眨吓眼大仔林寶15歲、細仔林熙14歲，一家四口行出街，原來兩個仔已經牛高馬大，仲高過爸爸！幾時都話香港地行街買嘢夠晒集中，日前撞到兩公婆帶住兩個仔family day，買衫買鞋睇日用品又食埋飯，由朝到晚，親身示範真係一個地方就可以搞掂晒。
話說14年前淡出幕前，唔講唔知，原來康子妮生活絕對唔止相夫教子咁簡單，做埋伊健和音同「友情歲月演唱會」御用樂手、編鋼琴譜做音樂比賽評判、又幫學校編寫校歌拍埋MV、近年又撈埋網購仲密謀緊推出女子唱作組合，絕對真人不露相。
不過佢話最自滿嗰樣唔係個人音樂事業，都係教得兩個仔乖巧有禮人見人讚喎。睇落林寶林熙咁大個仔仲黐住爸爸媽媽行街、全程聽話聽教同林曉峰又攬頭攬頸玩到朋友一樣，就睇得出媽媽教得好、朋友亦都冇讚錯！
行到首飾店，康子妮忍唔住駐足睇多兩眼。
隨時留意住老婆喜好同所需，林曉峰𥄫到老婆睇實廚窗，立即加入埋一齊睇又畀吓意見，睇嚟有衝動買吓神物氹吓老婆。
林寶、林熙年紀只差一年、讀埋同一間國際學校、放假就喺教會夾band一個做主音一個彈結他參加崇拜，自然感情好無所不談。
行完商場、醫完肚，再由林曉峰帶隊去附近樓上鋪買新鞋畀一對寶貝仔。
26歲已經結婚做媽媽、十多年來又一直有自己事業唔會脫節，所以41歲康子妮依然省鏡又keep得好。
林寶超有明星相
現年15歲嘅林寶擺脫過去一物稚氣，搖身一變成為一個高大靚仔嘅少年，唔少網民都話佢好有明星相！林寶熱愛運動，同爸爸、細佬一樣鍾意打羽毛球，仲俾學校推薦加以特訓，兩兄弟都加入體育學院精英培訓計劃，前途無可限量。
康子妮之前出席活動時，話林寶最近多咗個興趣，就係唱歌同跳舞，仲話如果林寶想加入娛樂圈，爸爸媽媽都一定會支持！
唔做怪獸家長
熱愛家庭生活的林曉峰及康子妮 ，早年跟Sundaykiss做訪問中除提及兩個仔的學業，不在乎他們的成績，學懂做人才是最重。
林曉峰 自言教仔方法，繼承了父母。「我教仔方法比較舊式，會鬧得幾勁嘅，因為我carry我阿媽那套教小朋友的方法，屬於『長他人志氣，滅自己威風』那一種，認為做人要謙虛，做得好是應該的，讀書讀得好是應該的，或者讀書唔叻，做事勤力一點是應該的。但我阿爸就較為carefree，他認為唔讀書唔緊要，他會用另一種方法，例如話教你句英文『Hello John,Happy Hour! 在夜總會門口咁講，就可以叫人入去玩』。」始終舊式方法，對現今小朋友未必受落， 林曉峰 說自己有時說話說得過份，太太康子妮就會在他失控時，將他與兩個仔分開，讓他冷靜一下。「我知自己太過份，之後會同兩個仔講聲sorry囉!」
父母都是藝人，兩個仔是否遺傳了他們的演藝細胞？ 林曉峰 覺得兩個仔都有潛質。「細佬說過要上美國電視台節目，阿哥我看得出他有天分，其實好想做，但又忍住，唔expose出嚟，態度有點似我，例如太太鼓勵我做某一件事，我會說『唔好啦，大把人叻過我。』我大仔都一樣，他會說『我唔得㗎，我實死！』阿哥應該要多點時間自我發掘一下。」
問到兩個兒子的學業成績， 林曉峰 好大反應話：「佢兩個成績好差，講出嚟嚇死人，身邊冇朋友嘅細路成績係咁差，其實我同太太主張小朋友自由發展，不太在乎學校成績，每日返學8-9小時﹐做父母唔應該只關心學術成績，我哋最緊張反而係佢哋有冇禮貌、care唔care別人感受。」對兩個仔學業成績沒要求，此舉卻讓 林曉峰 康子妮周遭出現不認同的聲音。「所有都話咁係唔得㗎！學校又畀好大壓力，因為學校都有要求、要合格，但我哋唔會特登請假陪佢考試、溫書。」若果子女成績不理想，父母會暫停所有課外活動，他們卻由得兩個仔練羽毛球， 林曉峰 甚至話：「我想停咗返學囉！」
林曉峰 康子妮這對非一般父母，不注重學業，更不會因兒子成績不理想，會像一般家長送他們出國讀書。「坦白講我其實係好一般嘅藝人，唔係大家諗到咁風光，做呢行你見我曝光率多，但我嘅人工都唔係話好高，我都係循序漸進，喺外父幫助下，加埋自己儲落，到依家先買到樓。我哋連自己嘅生活都咁擔心嘅時候，仲要送佢哋去外國讀書，談何容易？」
不少父母都有女兒控，但 林曉峰 康子妮認為兩個仔已經足夠。「如果生第三個，我覺得都會係仔。我覺得現在兩個剛剛好，有時夜晚我會入房抱住兩個仔，同佢哋一齊瞓，如果再有多一個，對兩兄弟會唔fair。我太太也有說過一家四口剛剛好，出街食飯、搭車都方便。」對生第三個，康子妮也有保留，她認為有太多阻撓。「始終香港有很多限制，如唔夠床位、讀書問題等等，但如果生活在加拿大，情況又不一樣，可能依家仲生緊。」
