簽Juno撻Q 翻𢱑Paco 薛凱琪 拒被Kay騎住
見Kay頭威頭勢先聲奪人，難免令薛凱琪眼紅，同Juno傾足大半年約仍未成事，全因唔甘心過檔畀Kay騎住只做阿二，決定反口縮沙，近日有傳翻𢱑Paco以新形式合作留喺太陽娛樂！
薛凱琪 Juno 傾足大半年
12年離開效力十年、一手捧紅自己嘅華納唱片，薛凱琪就係貪可以喺太陽娛樂坐正一姐之位，兼且旨意Paco出力打入內地電影市場。六年來雖然靠太陽娛樂同Paco成功北闖佔一席位，不過又係簽完約即遇上鄧麗欣回流，表面一姐實情身份地位都遠遠不如Paco多年愛將，自然耿耿於懷。36歲未有拖拍唯一寄託就係事業同買磚頭，Fiona兩年前與Juno合作歌曲〈結〉時已經密密斟商量合約事宜，直到去年底落實細節，一心諗住今個月滿約就有得過檔，一圓一姐夢。
一山不能藏二琪
據知情人士透露，Fiona的如意算盤全部因為生完女自由身隨時可以簽約開工的謝安琪打亂：「Juno間幻國娛樂同電影公司一定會愈做愈大，第一步就係簽晒『雙琪』返嚟。其實Juno冇諗過邊個先係一姐，反而Kay好大方，佢好有音樂理想，一早話過新公司簽多啲人百花齊放仲多元化，係Fiona一直以為一姐過檔件事可以好隆重，點知佢舊約未完、嗰頭Kay已經簽咗約仲開緊工，第一首主打歌就係Juno監工導演動員全公司拍MV。見到Kay係威係勢，Fiona唔想過檔被人騎住，又咁啱Paco出動銀彈攻勢留人，所以臨時決定留低。」不過據聞再續約，形式已經大不同，Fiona今次會自組工作室自己話事，咁就唔怕又要做阿二！
碼實老闆娘
感情生活冇著落，Fiona只好將重心放在事業上又勤買磚頭養自己，去年開埋自家時裝寶號，仲好醒水送貨畀老闆娘Heidi著上身宣傳兼打關係。
去年12月Juno同Fiona傾定細節，等今年中滿約落筆，不過Kay產後復出先行開工仲出埋新歌，搞到Fiona不滿風頭被搶又做唔成一姐，因而同Juno合作撻Q。
Fiona要同舊東家滿約才能過檔，Juno於是照原定計劃先簽Kay仲做埋新歌，Kay在MV大露背又食煙，勁有noise，不過就被Fiona理解成搶去風頭和一姐地位。
親自出馬幫Kay新歌〈人妻的偽術〉執導、出動公司上下創意團隊打造、又班埋自家電影班底拍攝，Juno在Kay身上投放愈多、Fiona愈係深明過檔後又係冇得做一姐。
停工兩年、陀生女，去年底謝安琪復出同Juno傾合作，以自由身身份重新起步自然啱傾快落筆。
相對於Fiona進取向上精神，Kay更重視家庭生活同創意，所以同Juno理念特別合拍。
話就話復出，Kay工作量比起生女前後並沒有增加太多，重心還是放在家庭同一對仔女身上，日前就被拍到素顏自駕在寓所附近添購日用品。
高衩泳衣拍MV 薛凱琪自摸排骨胸
Kay拍MV大露背又食煙，Fiona都唔弱，曾經著高衩泳衣拍MV，仲自摸排骨胸！
Fiona話希望咁樣帶出女性power、有態度嘅自強信息：「呢首歌特別想送畀女仔，鼓勵大家自強， 尤其事業女性好辛苦，太強會令人覺得你man，太柔弱又令人感覺你冇用。而透過不同造型，希望令更多女生明白，只要有自信，穿咩都唔重要！」
Fiona笑言由於喺真實酒樓拍攝，所以要頂通拍攝完成：「拍十個鐘左右，唔算太耐，因為喺酒樓拍攝，天未光已經有茶客嚟幫襯，惟有加緊拍攝，期間仲有洗碗阿姐同赤裸上身嘅師傅喺我哋旁邊洗碗洗米，我覺得好搞笑！」
