簡淑兒入行逾10年終極回應再進化傳聞:連阿媽都唔認得嗰個係我
簡淑兒:由我一入行講到依家
簡淑兒自2012年參加香港小姐落選後入行,至今已逾10年,講到傳足咁多年的整容話題,簡淑兒冇咁好氣話:「由我一入行到依家,選完(港姐)出嚟就已經咁講,其實我已經答過無數咁多次,我已經唔想再答喇!如果要繼續講,呢個當然我控制唔到,但係我就選擇咗唔會再答呢個問題!」
![簡淑兒 簡淑兒過去曾多次否認整容,並一再強調只係妝容與角度問題。(圖片來源:《月傾會》圖片)](https://imgs.orientalsunday.hk/wp-content/uploads/2022/07/03_86782971062c7ee10d966c-682x1024.jpeg)
唔開心10年前舊照經常被翻炒
簡淑兒又講到在無綫10年最不開心的事,原來係因為一張相而起,她好嬲又好笑地說:「依家每一次睇關於我嘅報道,都會有一張好核突嘅相喺隔離,哈哈哈!我媽咪話有一次睇報紙,見到我張相隔籬有個女人,佢唔認得嗰個係我囉!」
![簡淑兒 就係呢張簡淑兒選港姐時嘅官方舊相,經常被傳媒翻炒。(圖片來源:tvb.com)](https://imgs.orientalsunday.hk/wp-content/uploads/2017/03/nhv4dxh3MJN7gxp/5_2175354458b9339f0a399-683x1024.jpg)
最開心識到陳婉衡
至於在無綫10年最開心的事,簡淑兒就話:「最開心就係我識到依家嘅best friend,大家係同一屆入選嘅Alycia(陳婉衡)!我諗我呢10年裏面,如果冇佢喺身邊,日子未必會咁開心囉!」
![簡淑兒 簡淑兒同陳婉衡係best friend。(圖片來源:IG@kan_jessica)](https://imgs.orientalsunday.hk/wp-content/uploads/2022/07/08_167223600362c7efd5ccd16-1024x1004.jpeg)
拒認有錢女:屋企搵幾多都唔關我事
除了整容傳聞外,簡淑兒亦一直被傳係有錢女,屋企好富貴,對此簡淑兒一直堅持父母只是在美國做珠寶小生意,仲話有錢過佢嘅人大把:「我真係唔係好有錢,屋企人就算搵幾多都好,都同你冇乜關連,因為你自己都要有你自己生活,冇理由呢一世都係靠屋企㗎嘛!」
![簡淑兒 簡淑兒的家族珠寶店於09年在香港創建了一個珠寶品牌「Dazzle」,並由她親自做代言人賣廣告。(圖片來源:微博@簡淑兒Jessica)](https://imgs.orientalsunday.hk/wp-content/uploads/2020/10/11_1193a_cove_p14_17_16289262745f86bf1cf3c5e-819x1024.jpg)
簡淑兒在美國讀書時曾被霸 凌
簡淑兒仲透露自己當年在美國讀書慘被霸 凌,甚至試過被人剪頭髮及推落樓梯:「我喺香港出世,但係我喺美國大,我啱啱過到去唔識講英文,所以嗰時成日畀人蝦,試過畀人剪頭髮呀、推我落樓梯呀,令我性格變到好內向,佢哋(父母)見到就覺得我出嚟做嘢會好蝕底,所以想我去見識下,去參加港姐識多啲嘢,但就冇諗過我會留喺呢行!」
![簡淑兒 簡淑兒8歲便隨家人移民美國,曾在美國紐約州立大學帕切斯分校修讀心理學學士,副修藝術設計。(圖片來源:《月傾會》圖片)](https://imgs.orientalsunday.hk/wp-content/uploads/2022/07/13_50200970562c7f46044cb4-1024x682.jpeg)
簡淑兒離開TVB跳出舒適圈
簡淑兒在6月20日出po宣告離開無綫,她直言不經不覺已入行10年,因此決心要跳出舒適圈:「10年前嘅我,都係因為跳出咗自己嘅comfort zone,先會入到呢一行;10年之後,不如再試下跳出comfort zone,睇下會唔會有更多進步!嚟到呢個位,自己好似stuck住咗,所以想跳出去囉!」
![簡淑兒 32歲的簡淑兒,早前突然宣布離巢無綫。(圖片來源:IG@kan_jessica)](https://imgs.orientalsunday.hk/wp-content/uploads/2022/06/111_46037088562b141a6cfaff.jpg)
自由身唔一定要簽公司
問到離開無綫後大計,簡淑兒話:「依家自由身,有好多嘢自己想試囉,唔一定要有公司,先有你嘅價值,一個人嘅價值,應該去到邊度都有!我依家就好努力去build up自己價值,睇下嚟緊會唔會有唔同project,或者自己試下拍片!」
![簡淑兒 簡淑兒話離開TVB後有好多嘢想試。(圖片來源:《月傾會》圖片)](https://imgs.orientalsunday.hk/wp-content/uploads/2022/07/05_61165469962c7eecf92cf7-1024x576.jpeg)
簡淑兒哽咽:我唔肯放棄!
簡淑兒回想入行初期,有同事曾經同佢講過一番說話:「佢話呢一行,靚嘅女仔大把,你又冇名銜、又唔係讀藝訓、又冇讀過演藝,你又冇後台,你覺得自己憑咩呢?」今時今日嘅簡淑兒想同對方講:「我好想可以同番佢講,我憑咩呢?就係憑我真係好鍾意呢一行,同埋我真係唔肯放棄囉!」講講下,簡淑兒忍唔住哽咽:「好想話畀大家聽,如果你真係好鍾意嘅話,你就去做!」明星同演員,簡淑兒想做邊樣?佢諗都唔使諗:「我想做演員!」
![簡淑兒 講到對演藝事業嘅堅持,簡淑兒講到喊。(圖片來源:《月傾會》圖片)](https://imgs.orientalsunday.hk/wp-content/uploads/2022/07/14_21476824362c7f4a564e62-1024x576.jpeg)
簡淑兒兜巴星視后田蕊妮驚到震
講番喺無綫嘅作品,當年一齣《迷》,簡淑兒做田蕊妮個女,仲要兜巴星阿媽,呢個角色都好深入民心,她說:「嗰時大家啱啱認識我,跟住會覺得點會咁大膽冚視后,其實我係好驚,因為嗰日係我第一日拍嗰套劇!田蕊妮好nice,佢知道我係新人,會同我對晒(稿),佢直頭話真係冚落嚟啦一take過,但係我都驚!」
![簡淑兒 簡淑兒第一日拍《迷》已經要大膽冚視后!(圖片來源:《月傾會》圖片)](https://imgs.orientalsunday.hk/wp-content/uploads/2022/07/06_173812943162c7eefe92de2-1024x576.jpeg)
「少女標本」Kabby最啱傾
再問到曾經組過女團「少女標本」,簡淑兒同三位隊友許雅婷(Kabby)、袁紫僑(CoCo)同溫心(Swan),邊個最friend?同邊個最冇偈傾呢?她回答:「我諗最唔熟嘅係溫心囉,因為大家都知,其實佢出現咗一個公開活動之後就冇,所以唔係不和嘅,係完全唔熟囉!少女標本其實一開始唔係我㗎,我係replacement,出道前一個月改咗人,攝咗我落去。最close多啲偈傾係Kabby(許雅婷),因為佢係一個好大情大性嘅人!」
![簡淑兒 2015年,簡淑兒與許雅婷、袁紫僑和溫心等人,組成香港女子音樂組合「少女標本」,不過甚少合體演出,漸漸地各有發展。(圖片來源:新傳媒照片庫)](https://imgs.orientalsunday.hk/wp-content/uploads/2020/10/29_1193a_cove_p14_17_6898745295f86c0db5f051.jpg)
同麥大力唔認唔得
今次離開無綫的決定,男友麥大力梗係支持啦,眨下眼兩人拍拖已經超過1年。簡淑兒話當初真係冇諗過公開:「好老實講,真係因為影到,嗰陣時大家都冇諗住公開㗎!」有傳聞話簡淑兒離開無綫,係為咗方便同本身為機師嘅男友,等通關後周圍飛?佢話:「據我所知,佢仲未飛返㗎,因為都仲係封緊關,所以佢都仲未飛到,同埋據我所知,佢都仲係(無綫)合約演員!」
![簡淑兒 麥大力自爆對簡淑兒一見鍾情。(圖片來源:IG@kan_jessica)](https://imgs.orientalsunday.hk/wp-content/uploads/2021/07/t6vy1ih04mrydxxixudc5otn2oqsxhjt3k3wotyt8do_121624247460d965f56f939-752x1024_175797571860e6789d9c2cf-752x1024.jpeg)
男友麥大力上山下海追求
同麥大力拍拖超過1年,男友做過最sweet一件事?簡淑兒話,當初同麥大力發展,對方真係上天下海乜都做齊:「我問佢有冇興趣去行山,因為我係夜晚黑去行,跟住之後就去潛水啦,仲有一次就係我去捐血!行山嗰次,佢本身諗住女仔行山都係行下啫,但係嗰次我哋攞埋繩去爬,跟住就刮損咗佢!上山下海,佢就話,如果我都追唔到呢個女仔,我都唔知仲有啲咩可以做喇,佢講完畀我聽,我都覺得有少少感動!」
![簡淑兒 簡淑兒同麥大力一起學潛水一起去考牌,志趣相投,麥大力亦曾指同簡淑兒好夾好多共同嗜好,大家都有潛水牌,不時會在「水底談情」,非常浪漫。(圖片來源:IG@derekmackesy)](https://imgs.orientalsunday.hk/wp-content/uploads/2021/06/kan_jessica_176088657_466219828044468_3433321741530392169_n_60206323960d1734ba47c8-1024x1024.jpg)
試過前男友出軌 拒check男友電話
而問到兩人鬧交最勁嗰次係為乜嘢?簡淑兒表示:「我記得有一次係因為我電話冇signal收唔到,之後佢搵唔到我就好擔心,但係我嘅性格就覺得,我都唔知你打畀我,唔關我事㗎嘛!」問到有冇互相check對方電話,係咪有齊對方電腦、手機密碼?同埋如果麥大力出軌,簡淑兒會點處理?佢話:「我冇佢電話、電腦password呀,佢都冇我嘅!我從來都冇睇過佢電話,唔好話check,就算佢玩緊電話,我都係連望都冇望!」簡淑兒話試過前男友出軌:「以前都試過男朋友出軌,跟住畀佢氹到囉,我冇真係捉姦在床嗰啲,我選擇算啦、信佢啦,但係依家我就唔會喇!」
![簡淑兒 簡淑兒過去曾有個圈外男友Marcus,二人拍拖數年,分手後又再度復合,2020年Marcus更被本刊影到親自駕車接送簡淑兒返工放工,雖然簡淑兒在去年表示已同Marcus分手,但卻直言心中仍會為舊愛永遠留下一個位置。(圖片來源:新傳媒照片庫)](https://imgs.orientalsunday.hk/wp-content/uploads/2020/10/33_1193a_cove_p14_17_9007410685f86c8744abb4-1024x589.jpg)
即將踏入33歲
最後仲有驚喜彩蛋,林柏希預備咗蛋糕,為即將生日(7月18日)嘅簡淑兒提早慶生。簡淑兒話係今年第一個生日蛋糕,驚喜之餘最希望就係疫情快啲過去!
![簡淑兒 林柏希為簡淑兒提早慶祝33歲生日。(圖片來源:《月傾會》圖片)](https://imgs.orientalsunday.hk/wp-content/uploads/2022/07/02_158524054462c7eda818f18-1024x682.jpeg)
即睇簡淑兒《月傾會》訪問:
簡淑兒曾回應整容傳聞:我以前只係黑同肥
雖然簡淑兒出名樣子甜美,但其實由佢16年加入《愛回家之八時入席》出演秘書仔時開始,整容傳聞就傳到㷫烚烚。當時簡淑兒經已反客為主,自post在2011年回流前美國留學舊照,自嘲曾經又肥又黑、再自嘲EQ差、話傳媒專揀妝頭出事的相片對比,水蛇春咁長hashtags,曲線自辯係女大十八變唔係整容囉!
![簡淑兒 簡淑兒曾貼出在美國留學時的舊照,自嘲以前又肥又黑。(圖片來源:IG@kan_jessica)](https://imgs.orientalsunday.hk/wp-content/uploads/2017/03/nhv4dxh3MJN7gxp/001_156235326358b9338e6b714_67760748058b94cb8ec60c.png)
真面目判若兩人
對於簡淑兒的變臉疑雲,本刊曾獲得一批2012年香港小姐競選官方照,當年簡淑兒20強不入,一早做咗炮灰。係同屆黃心穎、朱千雪、湯洛雯等太高質,還是簡淑兒方面、細眼、扁鼻實力差太遠?雖然話女大十八變啫,點解事隔多年冇人話心穎BB同千雪BB唔同晒樣嘅?又點解可以變變吓變咗撞埋Baby樣呢?
![簡淑兒 簡淑兒選港姐照(圖片來源:TVB)](https://imgs.orientalsunday.hk/wp-content/uploads/2017/03/nhv4dxh3MJN7gxp/1_85661939458b933909c4ca-683x1024.jpg)